ഫോര്‍മുല വണ്‍ ഗ്രാന്‍പ്രീ കാറോട്ട മത്സരം: ലൂയിസ് ഹാമില്‍ട്ടണ്‍ മൈക്കിള്‍ ഷൂമാക്കറിന്റെ ഏഴ് ലോക കിരീടങ്ങളെന്ന റെക്കോഡിനൊപ്പമെത്തി
മെഴ്സിഡസിന്റെ ബ്രിട്ടീഷുകാരന്‍ ഡ്രൈവര്‍ ലൂയിസ് ഹാമില്‍ട്ടണ്‍ ഫോര്‍മുല വണ്‍ ഗ്രാന്‍പ്രീ കാറോട്ട മത്സരത്തില്‍ ചരിത്രം കുറിച്ചു. ഇന്നലെ നടന്ന തുര്‍ക്കി ഗ്രാന്‍പ്രീയില്‍ ജേതാവായതോടെ ഹാമില്‍ട്ടണ്‍ ലോക ചാമ്പ്യന്‍ഷിപ്പ് ഉറപ്പാക്കി. ഇതിഹാസ താരം മൈക്കിള്‍ ഷൂമാക്കറിന്റെ ഏഴ് ലോക കിരീടങ്ങളെന്ന റെക്കോഡിനൊപ്പമെത്താനും ഹാമില്‍ട്ടണിനായി.
തുര്‍ക്കി ഗ്രാന്‍പ്രീയില്‍ ജേതാവായതോടെ 94 കരിയര്‍ ജയങ്ങള്‍ ഈ ബ്രിട്ടീഷുകാരന്‍ ഡ്രൈവറിനു സ്വന്തമായി. ഫോര്‍മുല വണ്‍ സീസണില്‍ മൂന്നു റേസുകള്‍ കൂടി ശേഷിക്കേയാണു ഹാമില്‍ട്ടണിന്റെ കിരീട നേട്ടം.ലോക ചാമ്പ്യന്‍ഷിപ്പില്‍ രണ്ടാമതുള്ള സഹ ഡ്രൈവര്‍ വാല്‍റ്റേറി ബോതാസിനെ ബഹുദൂരം മറികടക്കാന്‍ ഹാമില്‍ട്ടണിനായി. ഹാമില്‍ട്ടണിന്റെയും ബോതാസിന്റെയും പ്രകടന മികവില്‍ മെഴ്സിഡസ് കണ്‍സ്ട്രക്റ്റേഴ്സ് ചാമ്പ്യന്‍ഷിപ്പ് നേരത്തെ ഉറപ്പാക്കിയിരുന്നു.
ഇസ്താംബൂള്‍ റേസിങ് ട്രാക്കില്‍ മഴയും മോശം കാലാവസ്ഥയും വില്ലനായി. പ്രതികൂല കാലാവസ്ഥയില്‍ ബുദ്ധിപൂര്‍വമാണ് ഹാമിള്‍ട്ടണ്‍ കാറോടിച്ചത്. പോള്‍ പൊസിഷനില്‍ ആറാം സ്ഥാനത്തായതിന്റെ ക്ഷീണവും ഹാമില്‍ട്ടണ്‍ കിരീട നേട്ടത്തോടെ തീര്‍ത്തു. മെഴ്സിഡസിന്റെ സഹ ഡ്രൈവര്‍ ബോതാസ് ഇന്നലെ തിരിച്ചടി നേരിട്ടു. ഫിന്‍ലന്‍ഡ് താരം 14 -ാം സ്ഥാനത്താണു റേസ് അവസാനിപ്പിച്ചത്. 11-ാമത് ആയി തുടങ്ങിയ റേസിംഗ് പോയിന്റിന്റെ സെര്‍ജിയോ പെരസ് രണ്ടാമത് ഫിനിഷ് ചെയ്തു. അവസാന ലാപ്പില്‍ സഹ ഡ്രൈവര്‍ ചാള്‍സ് ലേക്ലര്‍ക്കിന്റെ പിഴവ് മുതലെടുത്ത് ഫെരാരിയുടെ മുന്‍ ലോക ചാമ്പ്യന്‍ സെബാസ്റ്റിയന്‍ വെട്ടല്‍ മൂന്നാമത് ഫിനിഷ് ചെയ്തു. ഒരിടവേളയ്ക്കു ശേഷമാണ് വെട്ടല്‍ മെഡല്‍ പട്ടികയില്‍ ഇടംപിടിക്കുന്നത്. ഹാമിള്‍ട്ടണിനെ റെക്കോഡ് നേട്ടത്തില്‍ ആദ്യം അഭിനന്ദിച്ചതും വെട്ടലായിരുന്നു. കോവിഡ്-19 വൈറസ് മഹാമാരി കണക്കിലെടുത്ത് ഇസ്താംബൂള്‍ റേസിങ് ട്രാക്കില്‍ കാണികളെ അനുവദിച്ചിരുന്നില്ല.
'' ഏഴിനെ ഒരു സംഖ്യ മാത്രമായി കാണാനാണ് ഇഷ്ടം. പക്ഷേ ഷൂമാക്കറിനെപ്പോലുള്ള ഇതിഹാസത്തിനൊപ്പമാകുന്നതിന്റെ സന്തോഷം വേറെയാണ്'' - മത്സരത്തിനു ശേഷം വികാരാധീനായ ഹാമില്‍ട്ടണ്‍ പറഞ്ഞൊപ്പിച്ചു. കരിയര്‍ തുടങ്ങിയതേയുള്ളു എന്ന തോന്നല്‍ എപ്പോഴുമുണ്ടെന്നും അദ്ദേഹം പറഞ്ഞു. അടുത്ത സീസണില്‍ മെഴ്സിഡസില്‍ തുടരുന്നതിനെ കുറിച്ചുള്ള ചോദ്യങ്ങള്‍ക്കു ഹാമില്‍ട്ടണ്‍ മറുപടി നല്‍കിയില്ല.
https://www.facebook.com/Malayalivartha
