സംസ്ഥാന ജൂനിയര്‍ അത്‌ലറ്റിക്മീറ്റിലെ വിജയകിരീടം നിലനിര്‍ത്തി പാലക്കാട്. പാലക്കാടിന് ജൂനിയര്‍ താരങ്ങളുടെ ക്രിസ്മസ് സമ്മാനം. 22 സ്വര്‍ണം, 23 വെള്ളി, 22 വെങ്കലം എന്നിവ നേടി 491 പോയന്റോടെയാണ് പാലക്കാട് വീണ്ടും ജേതാക്കളായത്.

30 സ്വര്‍ണവും 17 വെള്ളിയും 12 വെങ്കലവുമായി എറണാകുളം 421.5 പോയന്റോടെ രണ്ടാം സ്ഥാനത്തും കഴിഞ്ഞതവണ രണ്ടാമതായ കോഴിക്കോട് ഇക്കുറി 24 സ്വര്‍ണവും 16 വെള്ളിയും 12 വെങ്കലവും (375.5 പോയന്റ്) നേടി മൂന്നാമതുമെത്തി.

ആണ്‍കുട്ടികളുടെ അണ്ടര്‍ 20, അണ്ടര്‍ 18, അണ്ടര്‍ 16 വിഭാഗങ്ങളില്‍ പാലക്കാടാണ് മുന്നില്‍. പെണ്‍കുട്ടികളുടെ അണ്ടര്‍ 20 വിഭാഗത്തില്‍ എറണാകുളവും അണ്ടര്‍ 18, അണ്ടര്‍ 16, അണ്ടര്‍ 14, ആണ്‍കുട്ടികളുടെ അണ്ടര്‍ 14 എന്നീ വിഭാഗങ്ങളില്‍ കോഴിക്കോടും മുന്നിലെത്തി. അവസാനദിവസം ആറു മീറ്റ് റെക്കോഡുകള്‍ പിറന്നു.

ഇരട്ടറെക്കോഡ് നേടി നാലു താരങ്ങള്‍. കെ.സി. സെര്‍വാന്‍ (അണ്ടര്‍-16), മുബസ്സിനാ മുഹമ്മദ് (അണ്ടര്‍-18), അഖിലാ രാജു(അണ്ടര്‍-20), മീരാ ഷിബു (അണ്ടര്‍-20) എന്നിവരാണ് നേട്ടം കൊയ്തത്.


മീരാ ഷിബു ട്രിപ്പിള്‍ ജമ്പിലും ഹൈജമ്പിലും റെക്കോഡിട്ടു. തൃശ്ശൂര്‍ ക്രൈസ്റ്റ് കോളേജില്‍ രണ്ടാംവര്‍ഷ ബി.കോം. വിദ്യാര്‍ഥിയും എറണാകുളം അശ്വ സ്പോര്‍ട്‌സ് അക്കാദമി താരവുമാണ്.

ലക്ഷദ്വീപുകാരിയായ മുബസ്സിനാ മുഹമ്മദ് ലോങ്ജമ്പിലും ഹെക്‌സത്തലണിലും റെക്കോഡ് നേടി. പുല്ലൂരാംപാറ സെയ്ന്റ് ജോസഫ് ഹയര്‍സെക്കന്‍ഡറി വിദ്യാര്‍ഥിയും മലബാര്‍ സ്പോര്‍ട്‌സ് അക്കാദമി താരവുമാണ്. അഖിലാ രാജു ഷോട്ട്പുട്ടിലും ഡിസ്‌കസ് ത്രോയിലും റെക്കോഡ് നേടി.