ഓസ്ട്രേലിയന്‍ ഓപ്പണ്‍ പുരുഷ സിംഗിള്‍സില്‍ ഡാനി മെദ്‌വെദെവിനെ പരാജയപ്പെടുത്തിയശേഷം റാഫേല്‍ നദാല്‍ സംസാരിച്ചത് വികാരാധീനനായി. തനിക്ക് പറയാന്‍ വാക്കുകള്‍ ലഭിക്കുന്നില്ലെന്നും ഈ വിജയം തന്റെ ടെന്നിസ് ജീവിതത്തിലെ ഏറ്റവും വൈകാരികമായ നിമിഷമാണെന്നും നദാല്‍ പറഞ്ഞു.

ഒന്നരമാസം മുമ്ബ് തനിക്ക് ടെന്നിസിലേക്ക് മടങ്ങിവരാന്‍ പോലും സാധിക്കുമോ എന്ന് പോലും ഉറപ്പ് പറയാന്‍ സാധിക്കാത്ത അവസ്ഥയിലായിരുന്നെന്നും കരിയര്‍ തന്നെ അവസാനിപ്പിക്കാന്‍ താന്‍ തീരുമാനിച്ചിരുന്നതായും നദാല്‍ പറഞ്ഞു. എന്നാല്‍ ഇനിയും ഒട്ടേറെ മത്സരങ്ങള്‍ ജയിക്കാനുള്ള ഊര്‍ജവും ആത്മവിശ്വാസവും ഈയൊരൊറ്റ വിജയത്തിലൂടെ തനിക്ക് ലഭിച്ചെന്നും ഇനിയും ഒരുപാട് നാളുകള്‍ താന്‍ ടെന്നിസ് കളിക്കുമെന്നും നദാല്‍ കൂട്ടിച്ചേര്‍ത്തു. ഒരു മാസം മുമ്ബ് നദാലിന് കൊവിഡ് പിടിപ്പെട്ടിരുന്നു.

ഏറ്റവും കൂടുതല്‍ ഗ്രാന്‍ഡ്സ്ലാം കിരീടങ്ങള്‍ സ്വന്തമാക്കിയ പുരുഷതാരമെന്ന റെക്കാഡ് ഈ വിജയത്തോടെ നദാലിന് സ്വന്തമായി. 21 ഗ്രാന്‍ഡ്സ്ലാം കിരീടങ്ങളാണ് നദാലിന്റെ പേരില്‍ ഉള്ളത്. തൊട്ട് താഴെയുള്ള ഫെഡററിനും ജോക്കോവിച്ചിനും 20 കിരീടങ്ങള്‍ വീതമാണുള്ളത്. 14 കിരീടങ്ങള്‍ സ്വന്തമാക്കിയ പീറ്റ് സാംപ്രസാണ് മൂന്നാം സ്ഥാനത്ത്.

അഞ്ച് സെറ്റ് നീണ്ട ഫൈനല്‍ മത്സരത്തില്‍ 2-6, 6-7(5), 6-4, 6-4, 7-5 എന്ന സ്കോറിനാണ് റഷ്യയുടെ ഡാനി മെദ്‌വെദെവിനെ നദാല്‍ അടിയറവ് പറയിച്ചത്. ആദ്യ രണ്ട് സെറ്റുകളിലും പരാജയപ്പെട്ട നദാല്‍ അവസാന മൂന്ന് സെറഅറുകളില്‍ ശക്തമായ തിരിച്ചുവരവാണ് നടത്തിയത്.