രണ്ടാമത് ഇന്ത്യന് ഗ്രാന്പ്രീയില് സുവര്ണനേട്ടത്തിന് അര്ഹരായി കേരളത്തിന്റെ ആര്. അനുവിനും എല്ദോസ് പോളും
രണ്ടാമത് ഇന്ത്യന് ഗ്രാന്പ്രീയില് കേരളത്തിന്റെ ആര്. അനുവിനും എല്ദോസ് പോളിനും സുവര്ണനേട്ടം. രണ്ട് സ്വര്ണവും നാല് വെള്ളിയും മൂന്ന് വെങ്കലവുമായി കേരളത്തിന്റെ താരങ്ങള് മികച്ച പ്രകടനമാണ് ചന്ദ്രശേഖരന്നായര് സ്റ്റേഡിയത്തില് കാഴ്ചവെച്ചത്.
വനിതകളുടെ 400 മീറ്റര് ഹര്ഡില്സ് 58.53 സെക്കന്ഡില് ഫിനിഷ് ചെയ്താണ് കേരളത്തിന്റെ ആര്. അനു സ്വര്ണത്തിന് അവകാശിയായത്.
മലയാളി താരങ്ങള് തമ്മിലുള്ള വാശിയേറിയ പോരാട്ടം കണ്ട പുരുഷവിഭാഗം ട്രിപ്പിള് ജംപില് 16.95 മീറ്റര് ചാടി എല്ദോസ് പോള് സ്വര്ണം നേടി.
16.70 മീറ്റര് പിന്നിട്ട് അബ്ദുല്ല അബൂബക്കര് വെള്ളിനേട്ടം കേരളത്തിനായി കൈവരിച്ചപ്പോള് തമിഴ്നാടിന്റെ ഗെയ്ലി വിനിസ്റ്റര് 16.09 മീറ്റര് ചാടി വെങ്കലത്തിന് ഉടമയായി. പുരുഷന്മാരുടെ 3000 മീറ്റര് സ്റ്റീപ്പിള് ചേസില് ദേശീയ റെക്കോഡോടെ സ്വര്ണം നേടിയ മഹാരാഷ്ട്രയുടെ അവിനാശ് സാബ്ലേയുടെ പ്രകടനമാണ് ഏറെ ശ്രദ്ധേയമായത്.
കോമണ്വെല്ത്ത്, ഏഷ്യന് ഗെയിംസ് മെഡല് പ്രതീക്ഷയുള്ള അവിനാശ് കഴിഞ്ഞ ഒളിമ്പിക്സില് സ്ഥാപിച്ച ദേശീയ റെക്കോഡാണ് (8:18.12 മിനിറ്റ്) തിരുത്തിയത് (8:16.21 മിനിറ്റ്). പുരുഷവിഭാഗം 400 മീറ്ററില് കേരളത്തിനുവേണ്ടി നോഹാ നിര്മല് ടോം (46.19) വെള്ളിയും വി. മുഹമ്മദ് (46.29) വെങ്കലവും നേടി. തമിഴ്നാടിന്റെ രാജേഷ് രമേഷിനാണ് (46.09) സ്വര്ണം.
പുരുഷവിഭാഗം 100 മീറ്റര് ഓട്ടത്തില് കേരളത്തിന്റെ കെ.പി. അശ്വിന് 10.70 സെക്കന്ഡില് ഫിനിഷ് ചെയ്ത് വെള്ളി നേട്ടത്തിന് അര്ഹനായി. തമിഴ്നാടിന്റെ തമിഴ് അരശുവിനാണ് (10.66) ഈയിനത്തില് സ്വര്ണം. 800 മീറ്ററില് പി. മുഹമ്മദ് അഫ്സല് 1:48.65 മിനിറ്റില് ഓടിയെത്തി വെള്ളി സ്വന്തമാക്കിയപ്പോള് ഹിമാചല് പ്രദേശിന്റെ അന്കേഷ് ചൗധരിക്കാണ് (1:48.27) സ്വര്ണം. 400 മീറ്റര് ഹര്ഡില്സില് എം.പി. ജാബിര് (50.40) വെള്ളിക്ക് ഉടമയായി. തമിഴ്നാടിന്റെ ടി. സന്തോഷ് കുമാറിനാണ് (50.15) സ്വര്ണം.
https://www.facebook.com/Malayalivartha