രണ്ട് തവണ ഒളിമ്പിക് മെഡല്‍ നേടിയ ഇന്ത്യയുടെ പി.വി.സിന്ധുവും മലയാളി താരം എച്ച്.എസ് പ്രണോയിയും സിങ്കപ്പൂര്‍ ഓപ്പണ്‍ സൂപ്പര്‍ 500 ബാഡ്മിന്റണിന്റെ ക്വാര്‍ട്ടര്‍ ഫൈനലില്‍.


വനിതാ സിംഗിള്‍സ് വിഭാഗത്തില്‍ മൂന്നാം സീഡായ സിന്ധു, വിയറ്റ്നാമിന്റെ തുയ് ലിന്‍ എന്‍ഗുയെനെ കീഴടക്കി. മൂന്ന് ഗെയിം നീണ്ട പോരാട്ടത്തിനൊടുവിലാണ് സിന്ധു വിജയം നേടിയത്. സ്‌കോര്‍: 19-21, 21-19, 21-18.

ആദ്യ ഗെയിം നഷ്ടപ്പെട്ടശേഷം മത്സരത്തിലേക്ക് ശക്തമായി തിരിച്ചുവന്ന സിന്ധു വിജയം നേടുകയായിരുന്നു. ലോകറാങ്കിങ്ങില്‍ 59-ാം സ്ഥാനത്തുള്ള തുയ് ലിന്‍ ഗംഭീര പ്രകടനമാണ് പുറത്തെടുത്തത്. മുന്‍ലോകചാമ്പ്യനായ സിന്ധുവിനെതിരേ മികവ് പുലര്‍ത്താന്‍ വിയറ്റ്നാം താരത്തിന് സാധിച്ചു. ക്വാര്‍ട്ടറില്‍ ചൈനയുടെ ഹാന്‍ യുവാണ് സിന്ധുവിന്റെ എതിരാളി.

പുരുഷവിഭാഗത്തില്‍ സിംഗിള്‍സില്‍ പ്രണോയി ലോകമൂന്നാം നമ്പര്‍ താരമായ ചൈനീസ് തായ്പേയിയുടെ ചൗ ടിയെന്‍ ചെന്നിനെ അട്ടിമറിച്ചു. ഒരു ഗെയിം നഷ്ടപ്പെട്ട ശേഷമാണ് പ്രണോയ് തിരിച്ചടിച്ച് വിജയം നേടിയത്. മൂന്നാഴ്ച മുന്‍പ് ഇരുവരും ഏറ്റുമുട്ടിയപ്പോഴും പ്രണോയ് തന്നെയാണ് വിജയം നേടിയത്. സ്‌കോര്‍: 14-21, 22-20, 21-18. മത്സരം ഒരു മണിക്കൂറും ഒന്‍പത് മിനിറ്റും നീണ്ടുനിന്നു.

കഴിഞ്ഞ അഞ്ചുവര്‍ഷമായി ഒരു കിരീടം പോലും നേടാനാകാത്ത പ്രണോയ് ക്വാര്‍ട്ടറില്‍ ജപ്പാന്റെ കൊഡായ് നറോക്കയെയാണ് നേരിടാനൊരുങ്ങുന്നത്.