മത്സരത്തിലുടനീളം മിന്നി ശ്രീജേഷ് ....എഫ്.ഐ.എച്ച് പ്രോ ലീഗ് ഹോക്കി യൂറോപ്യന്‍ പാദത്തില്‍ ഇന്ത്യക്ക് അര്‍ജന്റീനക്കെതിരെ ജയവും തോല്‍വിയും.

ഷൂട്ടൗട്ടിലേക്ക് നീണ്ട മത്സരത്തില്‍ പുരുഷന്മാര്‍ വിജയം സ്വന്തമാക്കിയപ്പോള്‍ വനിതകള്‍ ദയനീയ തോല്‍വി ഏറ്റുവാങ്ങി. നിശ്ചിത സമയം കളി 2-2ല്‍ കലാശിച്ചതിനെത്തുടര്‍ന്നാണ് ഷൂട്ടൗട്ട് വേണ്ടിവന്നത്. തുടര്‍ന്ന് മലയാളി ഗോള്‍ കീപ്പര്‍ പി.ആര്‍. ശ്രീജേഷ് നടത്തിയ തകര്‍പ്പന്‍ സേവുകള്‍ സഡന്‍ ഡെത്തില്‍ 5-4ന്റെ ജയം സമ്മാനിക്കുകയായിരുന്നു.

11ാം മിനിറ്റില്‍ മന്ദീപ് സിങ് നേടിയ ഗോളില്‍ ഇന്ത്യ മുന്നിലെത്തി. 20ാം മിനിറ്റില്‍ മാര്‍ട്ടിനസ് സമനില പിടിച്ചു. 56ാം മിനിറ്റില്‍ ലളിത് ഉപാധ്യായ് സ്‌കോര്‍ ചെയ്തതോടെ ഇന്ത്യക്ക് വീണ്ടും ലീഡ്. എന്നാല്‍, അവസാന മിനിറ്റിലെ പെനാല്‍റ്റി കോര്‍ണറില്‍ തോമസ് ഡോമീനും സമനില കണ്ടെത്തി. മത്സരത്തിലുടനീളം മിന്നിയ ശ്രീജേഷ് ഷൂട്ടൗട്ടില്‍ രണ്ട് ഗോളുകളും നിഷേധിച്ചു.

അതേസമയം, പുതിയ പരിശീലകന്‍ ഹരേന്ദ്ര സിങ്ങിന് കീഴില്‍ ആദ്യ മത്സരത്തിനിറങ്ങിയ ഇന്ത്യന്‍ വനിതകള്‍ എതിരില്ലാത്ത അഞ്ച് ഗോളിനാണ് പരാജയപ്പെട്ടത്.