വിനോദസഞ്ചാരത്തിന് അനന്തസാധ്യതകളുള്ള മനോഹരമായ ജലസംഭരണി
ഷൊര്ണൂരില് നിന്നും 12 കിലോമീറ്റര് അകലെയായി സ്ഥിതി ചെയ്യുന്ന, അസുരകുണ്ട് ജലസംഭരണി ആകര്ഷകമായ ഒരു ഭൂപ്രദേശമാണ്. വാഴാനി വന്യജീവി സങ്കേതത്തിന്റെ ഭാഗമായ ഇവിടെ, 1977-ലാണ് ജലസംഭരണി നിര്മ്മിക്കുന്നത്.
ഷൊര്ണൂരില് നിന്നും സംസ്ഥാന പാത 22-ലൂടെ യാത്ര ചെയ്താല് ആറ്റൂര് ഗ്രാമപ്രദേശത്ത് എത്തിച്ചേരാം; അവിടെ നിന്നും പഴയന്നൂര് റോഡിലൂടെ സഞ്ചരിച്ച് അസുരകുണ്ടിലെത്താം. തൃശൂര് വനംവകുപ്പിന്റെ കീഴിലുള്ള മച്ചാട് ഡിവിഷനിലാണ് ജലസംഭരണി സ്ഥിതിചെയ്യുന്നത്. 10 മീറ്റര് മാത്രം ഉയരമുള്ള അണക്കെട്ടാണിത്.
നാട്ടുകാര്ക്കിടയില് കുപ്രസിദ്ധിയാര്ജ്ജിച്ചതാണ് അസുരകുണ്ട് ജലസംഭരണി. കൊലപാതകമൊക്കെ നടന്ന സ്ഥലമാണെന്നും അതിനാല് പോകുന്നത് സുരക്ഷിതമല്ലെന്നും പറയപ്പെടുന്നു. ചെക്പോസ്റ്റില് പോലീസുകാരൊക്കെയുണ്ട്. എന്നാല് ഉള്ളില് സാമൂഹിക വിരുദ്ധര് കൈയ്യടക്കിയിരിക്കയാണവിടം എന്നു കാണാം. വനംവകുപ്പിന്റെ ചെക്ക്പോസ്റ്റ് കടന്നുള്ള വഴിയായിട്ടുകൂടി, അങ്ങിങ്ങായി മദ്യപിച്ചുകൊണ്ടിരിക്കുന്ന ചെറുകൂട്ടങ്ങളെ ധാരാളം കാണാമിവിടെ. വഴിയുടെ നടുക്ക് കുപ്പിവെച്ച് അടിക്കുന്നവര് വരെയുണ്ട് ഇക്കൂട്ടത്തില്.
അതൊക്കെ മനംമടുപ്പിക്കുമെങ്കിലും അണക്കെട്ടിന്റെ അകത്തേക്ക് പ്രവേശിക്കുന്നതോടെ അതൊക്കെ മാറും. കരിമ്പനയും കുടപ്പനയും ഉള്പ്പടെ നിരവധി വൃക്ഷലതാദികളാല് ചുറ്റപ്പെട്ട ഒരു തടാകമാണിവിടെ ഉള്ളത്. തടാകത്തിന് മിഴിവേകുവാന് നൂറുകണക്കിന് പക്ഷികളും. വേനലിന്റെ ബാക്കിപത്രമായി, അണക്കെട്ടില് തെളിഞ്ഞുവന്ന പാറക്കെട്ടുകളും ചതുപ്പ് നിലങ്ങളും, അസുരകുണ്ടിനെ കൂടുതല് ആകര്ഷണീയമാക്കുന്നു. പാറക്കെട്ടുകളും ഇളം പുല്ലുകള് നിറഞ്ഞ നദീതടങ്ങളും പക്ഷികളുടെ കളകൂജനവും തടാകത്തിന് ചുറ്റുമുള്ള വൃക്ഷലതാദികളും ചേര്ന്ന് ആനന്ദദായകമായ ഒരന്തരീക്ഷമാണ് ഇവിടെ ഒരുക്കിയിട്ടുള്ളത്.
സാമൂഹികവിരുദ്ധരുടെ അതിപ്രസരം മൂലം, ഈ സൗന്ദര്യത്തിലേക്ക് എത്തിപ്പെടുക എന്നതാണ് ഏറ്റവും ബുദ്ധിമുട്ടേറിയ കാര്യം. അതുകൊണ്ട് തന്നെ സ്ത്രീകളേയും കുട്ടികളേയും കൂട്ടി ഇവിടെ വരുവാന് ആരും ധൈര്യപ്പെടാറില്ല. 'അസുരകുണ്ട്' അക്ഷരാര്ത്ഥത്തില് അസുരന്മാരുടെ കുണ്ടാകുന്നതും അങ്ങനെയാണ്. വിനോദസഞ്ചാരത്തിന് വളരെയധികം സാധ്യതകളുള്ള ഈ മനോഹരമായ ജലസംഭരണി, അധികൃതരുടെ അനാസ്ഥമൂലം കുത്തഴിഞ്ഞ നിലയിലെത്തിച്ചേര്ന്നിരിക്കുന്നു.
https://www.facebook.com/Malayalivartha