മത്സ്യ കൃഷിയോടൊപ്പം വിനോദ സഞ്ചാരവും പ്രോത്സാഹിപ്പിക്കുന്ന പാലാക്കരി
നഗരത്തിരക്കുകളില് നിന്ന് മാറി ശുദ്ധവായുവും പ്രകൃതി സൗന്ദര്യവും ആസ്വദിച്ച് റിലാക്സ് ചെയ്യാനുളള സ്ഥലം നിങ്ങള് അന്വേഷിക്കുന്നവര് ഉണ്ടോ? എങ്കില് ധൈര്യമായി വൈക്കത്തിനടുത്തുള്ള മത്സ്യഫെഡിന്റെ പാലാക്കരി അക്വാ ടൂറിസം ഫാമിലേക്ക് പോകാം.
200 രൂപയ്ക്ക് ഭക്ഷണം ഉള്പ്പെടെ ഒരു ദിവസം മുഴുവന് ഉല്ലസിക്കുവാനുളള അവസരമാണ് ഇവിടെ ഒരുക്കിയിട്ടുളളത്. 5 മുതല് 12 വയസ്സുള്ളവര്ക്ക് 100 രൂപ മതി. വൈക്കം -തൃപ്പൂണിത്തുറ റോഡില് കാട്ടിക്കുന്ന് എന്ന സ്ഥലത്താണ് മത്സ്യഫെഡിന്റെ 125 ഏക്കറിലുളള ഈ ഫാം സ്ഥിതി ചെയ്യുന്നത്. മത്സ്യ കൃഷിയോടൊപ്പം വിനോദ സഞ്ചാരവും പ്രോത്സാഹിപ്പിക്കുക എന്ന ഉദ്ദേശത്തോടെയാണ് ഈ ഫാമിന്റെ പ്രവര്ത്തനം.
ഉളളം തണുപ്പിക്കുന്ന കായല് സൗന്ദര്യമാണ് ഇവിടെ സഞ്ചാരികളെ കാത്തിരിക്കുന്നത്. നോക്കെത്താ ദൂരത്തോളം വെളളം, കായലിനെ വകഞ്ഞ് മാറ്റിക്കൊണ്ട് കടന്നു പോകുന്ന റോഡ്. റോഡിന്റെ വശങ്ങളിലായി വിശ്രമിക്കാന് ബെഞ്ചുകള്, ദൂരക്കാഴ്ച കാണാന് വാച്ച് ടവറുകള്. കായല് കാറ്റേറ്റ് തെങ്ങോലകളുടെ തണല്പറ്റി മെല്ലെ നടന്നാല് ഫാമിലെ ഉല്ലാസ കേന്ദ്രമെത്തി.
കായലിനരികെ വന്നിട്ട് നടന്നു പോവാനോ എന്ന് ചിന്തിക്കുന്നവര്ക്ക് പ്രവേശന കവാടത്തില് നിന്ന് ബോട്ട് സൗകര്യവും ഏര്പ്പെടുത്തിയിട്ടുണ്ട്. ഒരാള്ക്ക് 25 രൂപ എന്ന നിരക്കില് ഉല്ലാസ കേന്ദ്രത്തിലേക്ക് എത്തിക്കും. 200 രൂപയ്ക്ക് ഒരു പകല് മുഴുവന് ആസ്വദിക്കാന് അനുയോജ്യമായ സ്ഥലമാണ് പാലാക്കരി അക്വാഫാം
ഫിഷ് കറിയും ഫിഷ്ഫ ഫ്രൈയും ഉള്പ്പെടുന്ന വിഭവങ്ങളോടെയാണ് ഉച്ചയൂണ്. ശേഷം ഐസ്ക്രീമും ലഭിക്കും. ഇതിന് പ്രത്രേക നിരക്ക് നല്കേണ്ടതില്ല. ഭക്ഷണം വിഭവ സമൃദ്ധമാക്കാന് കൊഞ്ചും കക്കയും കരിമീനും മറ്റും ലഭിക്കും. ഇവയ്ക്ക് പ്രത്യേക നിരക്കാണ്.
വൈക്കം-തൃപ്പൂണിത്തുറ റൂട്ടില് കാട്ടിക്കുന്നിലാണ് പാലാക്കരി അക്വാ ടൂറിസം ഫാം. വൈക്കത്തു നിന്ന് 9 കിലോ മീറ്ററും തൃപ്പൂണിത്തുറയില് നിന്ന് 25 കിലോ മീറ്ററും സഞ്ചരിച്ചാല് ഫാമിലെത്താം.
https://www.facebook.com/Malayalivartha