തിരുവനന്തപുരത്തെ വിനോദസഞ്ചാരകേന്ദ്രങ്ങള്‍ ഭിന്നശേഷി സൗഹൃദമാകുന്നു
തലസ്ഥാനനഗരത്തിലെ വിനോദസഞ്ചാരകേന്ദ്രങ്ങള്‍ ഭിന്നശേഷി സൗഹൃദമാകും. ഒപ്പം അത്യാധുനിക സൗരോര്‍ജ വിളക്കുകള്‍ കൊണ്ട് വേളി ടൂറിസ്റ്റ് വില്ലേജ് പ്രകാശപൂരിതമാവുകയും ചെയ്യും. വേളിയിലെ തന്നെ സ്വിമ്മിങ്പൂളിന്റെയും പാര്‍ക്കിന്റെയും നവീകരണ പ്രവര്‍ത്തനങ്ങളും പുതിയ വര്‍ഷത്തില്‍ പണിയാരംഭിക്കും.
നഗരത്തിലെ എല്ലാ കേന്ദ്രങ്ങളിലും ഇ-ടോയ്‌ലെറ്റ് എന്ന വിനോദസഞ്ചാരവകുപ്പിന്റെ പദ്ധതിക്ക് തത്വത്തില്‍ അംഗീകരമാവുകയും ചെയ്തു. പദ്ധതികള്‍ സമയബന്ധിതമായി പണി ആരംഭിക്കുകയും പൂര്‍ത്തിയാവുകയും ചെയ്താല്‍ 2018-ല്‍ തിരുവനന്തപുരത്തെ വിനോദസഞ്ചാര മേഖലയുടെ മുഖം തന്നെ മാറും.
95.57 ലക്ഷം രൂപ മുടക്കിയാണ് നഗരത്തിലെ വിനോദസഞ്ചാരകേന്ദ്രങ്ങളില്‍ ഭിന്നശേഷി സൗഹൃദ സംവിധാനങ്ങളൊരുക്കുന്നത്. ശംഖുംമുഖത്തെ മുത്തുച്ചിപ്പി പാര്‍ക്ക്, സുനാമി പാര്‍ക്ക്, ചാച്ചാ നെഹ്രു പാര്‍ക്ക്, വേളിയിലെ പാര്‍ക്ക്, ആക്കുളം ചില്‍ഡ്രന്‍സ് പാര്‍ക്ക്, കനകക്കുന്ന് പാര്‍ക്ക്, വെള്ളാറിലെയും വിഴിഞ്ഞത്തെയും ആര്‍ട്ട് ആന്‍ഡ് ക്രാഫ്റ്റ് വില്ലേജ്, മ്യൂസിയത്തെ നിശാഗന്ധി കോംപ്ലക്‌സ്, കോവളത്തെ ബീച്ചുകള്‍ എന്നിവിടങ്ങളില്‍ ഭിന്നശേഷി സൗഹൃദ സംവിധാനങ്ങളൊരുക്കും.
റാംപുകള്‍, ഭിന്നശേഷി സൗഹൃദ ശൗചാലയങ്ങള്‍, സൈന്‍ബോര്‍ഡുകള്‍, വീല്‍ചെയറുകള്‍, വാക്കിങ് സ്റ്റിക്കുകള്‍ , ശബ്ദസഹായസംവിധാനം, ലിഫ്റ്റ് തുടങ്ങിയവയൊക്കെ ഏര്‍പ്പെടുത്തും. ഒരോയിടത്തെയും ആവശ്യങ്ങള്‍ കണക്കിലെടുത്താകും എന്തൊക്കെ വേണമെന്നത് തീരുമാനിക്കുക. വിനോദസഞ്ചാര വകുപ്പിന്റെ ഈ പദ്ധതി നടപ്പിലാക്കുന്നത് ജില്ലാ ടൂറിസം പ്രൊമോഷന്‍ കൗണ്‍സിലായിരിക്കും. വേളി ടൂറിസ്റ്റ് വില്ലേജില്‍ 37 സൗരോര്‍ജ വിളക്കുകള്‍ സ്ഥാപിക്കുന്നതിന് തത്വത്തില്‍ അംഗീകാരമായി കഴിഞ്ഞു. ഇന്റഗ്രേറ്റഡ് ഇന്റലിജന്‍സ് സോളാര്‍ സ്ട്രീറ്റ് ലൈറ്റ് ആണ് സ്ഥാപിക്കുന്നത്. 28.4 ലക്ഷം രൂപയാണ് ഇതിനായി ചെലവിടുന്നത്. മൊബൈല്‍ ഫോണ്‍ ഉപയോഗിച്ച് നിയന്ത്രിക്കാനാവുന്നതാണ് ഈ തെരുവുവിളക്ക്.
അഞ്ചുവര്‍ഷത്തേക്കുള്ള പ്രതിവര്‍ഷ അറ്റകുറ്റപ്പണിയും വിളക്കുകള്‍ നല്‍കുന്ന കമ്പനി തന്നെ വഹിക്കും. പുതുവര്‍ഷത്തിന്റെ ആദ്യ പാദത്തില്‍ തന്നെ വേളിയില്‍ അത്യന്താധുനിക സൗരോര്‍ജ വിളക്കുകള്‍ വെളിച്ചംവിതറുമെന്നാണ് പ്രതീക്ഷിക്കുന്നത്. വേളിയിലെ സ്വിമ്മിങ് പൂളും പാര്‍ ്ക്കും 2.5 കോടി രൂപ ചെലവിലാണ് നവീകരിക്കുന്നത്. ഇതിനുള്ള പ്രവര്‍ത്തനങ്ങള്‍ 2018-ന്റെ തുടക്കത്തില്‍ തന്നെ ആരംഭിക്കുമെന്നാണ് പ്രതീക്ഷ. വാട്ടര്‍ ആന്‍ഡ് പവര്‍ കണ്‍സള്‍ട്ടണ്‍സി സര്‍വ്വീസസ് ലിമിറ്റഡ് എന്ന ഏജന്‍സിയാകും പ്രവര്‍ത്തനങ്ങള്‍ നടത്തുക. വിനോദസഞ്ചാരവകുപ്പും ജില്ലാ ടൂറിസം പ്രൊമോഷന്‍ കൗണ്‍സിലുമായി കരാര്‍ ഒപ്പിട്ട് ആദ്യഗഡു തുക കിട്ടിയാലുടന്‍ വര്‍ക്ക് ഓര്‍ഡര്‍ നല്‍കാനാവുമെന്ന പ്രതീക്ഷയിലാണ് ജില്ലാ ടൂറിസം പ്രൊമോഷന്‍ കൗണ്‍സില്‍.
വേളിയില്‍ ബാര്‍ബിക്യു സ്‌നാക്ക് ബാര്‍്, ഓപ്പണ്‍ സ്‌റ്റേജ്, ബോര്‍ഡ് വാക്ക്, ബെഞ്ചുകള്‍, പ്ലാന്റര്‍ ബോക്‌സുകള്‍്, ശില്പങ്ങള്‍ തുടങ്ങിയവ സ്ഥാപിക്കും. ഇതൊടൊപ്പം തന്നെ സ്വിമ്മിങ് പൂളിന്റെ നവീകരണം, നിലവിലുള്ള കെട്ടിടത്തിന് പുതിയ മേല്‍ക്കൂര, ചുറ്റുമതിലിന്റെ നവീകരണം, ലോക്കര്‍റൂമുകളുടെ നവീകരണം തുടങ്ങിയവയും പ്രവര്‍ത്തനങ്ങളില്‍ ഉള്‍പ്പെടുത്തിയിട്ടുണ്ട്. 18 മാസമാണ് പണി പൂര്‍ത്തിയാക്കുന്നതിനായി അനുവദിച്ചിട്ടുള്ളത്.
ഈ പ്രവര്‍ത്തനങ്ങള്‍ കൂടാതെ ശംഖുംമുഖം, കോവളം, അരുവിക്കര, വര്‍ക്കല തുടങ്ങിയ കേന്ദ്രങ്ങളില്‍ ഇ-ശൗചാലയങ്ങള്‍ സ്ഥാപിക്കുന്നതിനുള്ള തീരുമാനവും വിനോദസഞ്ചാര വകുപ്പ് തത്വത്തില്‍ അംഗീകരിച്ചിട്ടുണ്ട്. 2016/17 സാമ്പത്തിക വര്‍ഷത്തില്‍ ജില്ലാ ടൂറിസം പ്രാമോഷന്‍ കൗണ്‍സിലിന് 10 പ്രോജക്ടുകള്‍ അനുവദിച്ചു കിട്ടിയിരുന്നു. അതില്‍ നാലെണ്ണം പൂര്‍ത്തിയാക്കിക്കഴിഞ്ഞു.
https://www.facebook.com/Malayalivartha
