സൈലന്റ് വാലി ബഫര്‍സോണ്‍ മലകളില്‍ കാട്ടുതീ പടര്‍ന്ന് വന്‍നാശം
വേനല്‍ ശക്തമായതോടെ പശ്ചിമഘട്ടമലനിരകളില്‍ കാട്ടുതീ പടര്‍ന്നു. സൈലന്റ് വാലി ബഫര്‍സോണ്‍ മലനിരകളോടുചേര്‍ന്നാണ് കാട്ടുതീ പടര്‍ന്നുപിടിച്ചത്. കിലോമീറ്ററുകളോളം പടര്‍ന്നുപിടിച്ച കാട്ടുതീ ജൈവസമ്പത്തിനും വന്യജീവികള്‍ക്കും നാശമുണ്ടാക്കി.
ബുധനാഴ്ച ഉച്ചയോടെ തീ നിയന്ത്രണവിധേയമാക്കാന്‍ കഴിഞ്ഞതായി സൈലന്റ് വാലി റെയ്ഞ്ച് ഓഫീസര്‍ നജ്മല്‍ അമീന്‍ പറഞ്ഞു. എല്ലാ വേനല്‍ക്കാലത്തും അട്ടപ്പാടി മലനിരകളില്‍ കിലോമീറ്ററുകളോളം ആളിപ്പടരുന്ന തീ ഉണ്ടാകുന്നത് പതിവാണ്. ഇത് നിയന്ത്രിക്കാന്‍ ഇക്കുറി വനംവകുപ്പ് കാട്ടുതീ പ്രതിരോധത്തിനായി ശില്‍്പശാല സംഘടിപ്പിക്കുകയുംചെയ്തു. എന്നിട്ടും മേഖലയിലെ കാട്ടുതീ നിയന്ത്രിക്കാന്‍ അധികൃതര്‍ക്കായില്ല. സൈലന്റ് വാലി ബഫര്‍ സോണ്‍ മേഖലയിലുണ്ടായ കാട്ടുതീ മലനിരകളുടെ ഒത്തമുകളിലാണ് പടര്‍ന്നുപിടിച്ചത്.
പാറക്കെട്ടുകളും പുല്ലുകളും നിറഞ്ഞ പ്രദേശമാണിത്. കാട്ടുതീ പടര്‍ന്ന് മണ്ണൊലിപ്പും ക്രമേണ മലയിടിച്ചിലും ഉണ്ടാകുമെന്നതാണ് പ്രധാനപ്രശ്‌നം. നിലവിലുള്ള വനംവകുപ്പിന്റെ സംവിധാനങ്ങള്‍ തീയണയ്ക്കാന്‍ അപര്യാപ്തമാണ്.
ചൊവ്വാഴ്ച ഉച്ചയോടെയുണ്ടായ കാട്ടുതീയില്‍ പത്തിലധികം ഹെക്ടര്‍ വനമാണ് അഗ്‌നിക്കിരയായതെന്നാണ് വനംവകുപ്പ് വ്യക്തമാക്കുന്നത്. മലനിരകളില്‍ പടരുന്ന തീ നിയന്ത്രിക്കാന്‍ വനംവകുപ്പ് നടപടികള്‍ ഊര്‍ജിതമാക്കുമെന്ന് ഡി.എഫ്.ഒ. വി.പി. ജയപ്രകാശ് പറഞ്ഞു.
ഡിവിഷനുകീഴില്‍ ഇപ്പോള്‍ 40-ഓളം ഫയര്‍വാച്ചര്‍മാരാണുള്ളത്. വിസ്തൃതിയേറെയുള്ള ഈ ഡിവിഷനുകീഴില്‍ ഫയര്‍വാച്ചര്‍മാര്‍ കൂടുതലായി നിയമിക്കപ്പെടേണ്ടതുണ്ട്. സൈലന്റ് വാലി ഡിവിഷന് കീഴിലാണെങ്കില്‍ 17 ഇടത്ത് ക്യാമ്പ് ഷെഡ്ഡുകള്‍ പ്രവര്‍ത്തിക്കുന്നുണ്ട്. എന്നിരുന്നാലും അമ്പതോളം ഫയര്‍വാച്ചര്‍മാരെക്കൂടി കിട്ടിയെങ്കില്‍മാത്രമേ ഫലവത്താവുകയുള്ളൂവെന്ന് അധികൃതര്‍ പറഞ്ഞു. ഫണ്ടിന്റെ ലഭ്യതയാണ് ഫയര്‍വാച്ചര്‍മാരെ നിയോഗിക്കുന്നതിനുള്ള പ്രധാനതടസ്സം.
https://www.facebook.com/Malayalivartha
