തിരുവനന്തപുരം നഗരത്തെ ആവേശത്തിൽ ആറാടിച്ച് പതിനായിരത്തിലധികം റണ്ണർമാർ യു എസ് ടി തിരുവനന്തപുരം മാരത്തൺ 2025ന്റെ രണ്ടാം പതിപ്പിനെ അവിസ്മരണീയമാക്കി. തലസ്ഥാന നഗരം നാളിതു വരെ കണ്ടതിൽ വച്ച് ഏറ്റവും വലിയ മരത്തണിനാണ് ഒക്ടോബർ 12 ഞായറാഴ്ച സാക്ഷ്യം വഹിച്ചത്. എ ഐ, ടെക്നോളജി ട്രാൻസ്ഫർമേഷൻ സൊല്യൂഷൻസ് രംഗത്തെ മുൻ നിര കമ്പനിയായ യു എസ് ടി, എൻ.ഇ.ബി സ്പോർട്സിന്റെ സഹകരണത്തോടെയാണ് മാരത്തൺ സംഘടിപ്പിച്ചത്.

നിരവധി പ്രശസ്തരായ കായികതാരങ്ങളും സെലിബ്രിറ്റികളും പങ്കെടുത്തു. യു എസ് ടി തിരുവനന്തപുരം മാരത്തൺ 2025ന്റെ ബ്രാൻഡ് അംബാസഡറായ നടനും മോഡലും ഫിറ്റ്നസ് പ്രേമിയുമായ മിലിന്ദ് സോമൻ നയിച്ച മാരത്തണിൽ തിരുവനന്തപുരം ജില്ലാ കളക്ടർ അനു കുമാരി ഐ എ എസ്; എസ് എ എസ് ഒ സതേൺ എയർ കമാൻഡ് എയർ മാർഷൽ തരുൺ ചൗധരി വി എസ് എം; പ്രമുഖ ബാഡ്മിന്റൺ താരം യു വിമൽ കുമാർ; കേരളം വനം വകുപ്പിലെ കൺസർവേറ്റർ ഓഫ് ഫോറസ്ററ്സ് നരേന്ദ്ര നാഥ് വെല്ലൂരി ഐ എഫ്എസ്; തുടങ്ങിയവർ പങ്കെടുത്തു. യു എസ് ടി പ്രസിഡന്റുമാരായ അലക്സാണ്ടർ വർഗീസ്, മനു ഗോപിനാഥ്; സി ഒ ഒ മാരായ ഗിൽറോയ് മാത്യു, പ്രവീൺ പ്രഭാകരൻ; ചീഫ് വാല്യൂസ് ഓഫീസർ സുനിൽ ബാലകൃഷ്ണൻ; സി പി ഒ കൊളീൻ ഡോഹർട്ടി; സി എം ഒ ലെസ്ലീ ഷൂൾട്സ് ; സീനിയർ ഡയറക്ടറും തിരുവനന്തപുരം കേന്ദ്രം മേധാവിയുമായ ശില്പ മേനോൻ; ജനറൽ മാനേജർ ഷെഫി അൻവർ തുടങ്ങിയവരും മരത്തണിന്റെ ഭാഗമായി.

യു എസ് ടി തിരുവനന്തപുരം ക്യാമ്പസിൽ നിന്ന് ആരംഭിച്ച് നഗരത്തിലെ പ്രധാന പാതകളിലൂടെ സഞ്ചരിച്ച മാരത്തണിന്റെ ഭാഗമായി, ഫുൾ മാരത്തൺ, ഹാഫ് മാരത്തൺ, 10 കെ റൺ, 5 കെ റൺ എന്നീ വിഭാഗങ്ങൾ ഉൾപ്പെടുത്തിയിരുന്നു. വിജയികൾക്ക് 22 ലക്ഷം രൂപയുടെ സമ്മാനത്തുക വിതരണം ചെയ്തു.

“യൂ.എസ്.ടി തിരുവനന്തപുരം മാരത്തണിന്റെ രണ്ടാം പതിപ്പ്, കഴിഞ്ഞ വർഷത്തേക്കാൾ വലിയ വിജയമായി മാറിയതിൽ ഞാൻ അതീവ സന്തോഷവാനാണ്. പതിനായിരത്തിലധികം റണ്ണർമാർ ഇതിൽ ഭാഗമായി എന്നത് ഞങ്ങളുടെ ഈ ഉദ്യമത്തിന് വർധിത ശക്തിയാണ് പകർന്നിരിക്കുന്നത്. ആരോഗ്യകരമായ ശീലങ്ങളെക്കുറിച്ചുള്ള ബോധവൽക്കരണത്തിനായും, മാനസിക-ശാരീരിക ആരോഗ്യമുള്ള സമൂഹം സൃഷ്ടിക്കുക എന്ന ലക്ഷ്യത്തോടെയും സംഘടിപ്പിച്ച മാരത്തൺ അതിന്റെ ലക്‌ഷ്യം നേടി,” യു എസ് ടി പ്രസിഡന്റ് അലക്സാണ്ടർ വർഗീസ് പറഞ്ഞു.

“കോർപ്പറേറ്റ് പ്രതിബദ്ധതയും ജനങ്ങളുടെ ആവേശവും ഒത്തുചേരുമ്പോൾ എന്തെല്ലാം സാധ്യമാണ് എന്ന് തെളിയിക്കുന്നതുതന്നെയാണ് യു എസ് ടി തിരുവനന്തപുരം മാരത്തൺ. ഫിറ്റ്‌നസിനെയും ഉൾക്കൊള്ളലിനെയും പ്രോത്സാഹിപ്പിക്കുന്നതിൽ യു എസ് ടിയുടെ പിന്തുണ വിലപ്പെട്ടതാണ്,” എൻ.ഇ.ബി സ്പോർട്സ് സി.എം.ഡി. നാഗരാജ് അഡിഗ പറഞ്ഞു.