കടബാധ്യതയില്‍ മൂക്കുകുത്തി ജെറ്റ് എയര്‍വേയിസ്; വാടകയ്ക്ക് വിമാനങ്ങള്‍ നല്‍കിയ കമ്പനികള്‍ പിന്മാറുന്നു
ജെറ്റ് എയര്‍വേസ് വിമാനം വാടകയ്ക്ക് നല്‍കിയിട്ടുള്ള കൂടുതല്‍ കമ്പനികള്‍ വാടകക്കുടിശ്ശിക വര്‍ദ്ധിച്ചതിനെ തുടര്‍ന്ന് കരാറില്‍നിന്ന് പിന്മാറാന്‍ തയ്യാറെടുക്കുന്നു. കരാര്‍ റദ്ദാക്കുന്നതിന്റെ ഭാഗമായി നിലവിലുള്ള രണ്ട് കമ്പനികള്‍ അഞ്ചു വിമാനങ്ങളുടെ രജിസ്‌ട്രേഷന്‍ ഒഴിവാക്കണമെന്നാവശ്യപ്പെട്ട് ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന് (ഡി.ജി.സി.എ.) അപേക്ഷ നല്‍കി.
ഏകദേശം 6900 കോടി രൂപയുടെ കടബാധ്യതയാണ് കമ്പനിക്കുള്ളത്. മാസങ്ങളായി പൈലറ്റുമാരുടെ ശമ്പളം, സാധനങ്ങള്‍ നല്‍കുന്ന കമ്പനികള്‍ക്കുള്ള പ്രതിഫലം, വിമാന കമ്പനികള്‍ക്ക് നല്‍കുന്ന വാടക തുടങ്ങിയവ മുടങ്ങികിടക്കുകയാണ്. വായ്പാ തിരിച്ചടവും മുടങ്ങി. ഈ സാഹചര്യത്തിന്‍ അടിയന്തര ആവശ്യങ്ങള്‍ക്കുള്ള തുക കണ്ടെത്താന്‍ ജെറ്റ് എയര്‍വേസ് രാജ്യത്തെ ബാങ്കുകളുമായി ചര്‍ച്ച നടത്തിവരികയാണ്.
വിമാനങ്ങള്‍ വാടകയ്ക്ക് നല്‍കുന്ന ജി. ഇ. ക്യാപിറ്റല്‍ ഏവിയേഷന് സര്‍വീസസ്, ഏര്‍ക്യാപ് ഹോള്‍ഡിങ്‌സ്, ബി.ഒ.സി. ഏവിയേഷന് തുടങ്ങിയ അന്താരാഷ്ട്ര കമ്പനികള്‍ കുടിശ്ശിക വര്‍ദ്ധിച്ചതില്‍ അതൃപ്തി രേഖപ്പെടുത്തിയിട്ടുണ്ട്. ചില കമ്പനികള്‍ വിമാനങ്ങള്‍ തിരിച്ചെടുക്കുകയും ചെയ്തിരുന്നു. മറ്റു കമ്പനികള്‍ വിമാനങ്ങള്‍ പിന്‍വലിക്കുന്നത് ജെറ്റുമായി ബന്ധപ്പെട്ടുനില്‍ക്കുന്ന കമ്പനികളുടെ ആത്മവിശ്വാസത്തെ ബാധിച്ചേക്കാം. വിമാനങ്ങളുടെ രജിസ്‌ട്രേഷന്‍ റദ്ദാക്കിയാല്‍ ഇതിന്റെ ഉടമകള്‍ക്ക് അവ രാജ്യത്തുനിന്ന് കൊണ്ടുപോകാനാകും.
അതേസമയം, വിമാനങ്ങളുടെ രജിസ്‌ട്രേഷന്‍ പിന്‍വലിക്കാന്‍ ചില കമ്പനികള്‍ അപേക്ഷ നല്‍കിയതുസംബന്ധിച്ച് അറിവില്ലെന്നും വാടകയ്ക്ക് വിമാനങ്ങള്‍ സര്‍വീസില്‍ ചേര്‍ക്കുന്നതും ഒഴിവാക്കുന്നതും പതിവാണെന്നുമാണ് ജെറ്റ് എയര്‍വേസിന്റെ പ്രതികരണം.
https://www.facebook.com/Malayalivartha
