ഏപ്രില്‍ 1 മുതല്‍ ജി എസ് ടി ബില്ലുകള്‍ നല്‍കാത്ത വ്യാപാരികള്‍ക്കുമേല്‍ പിഴ ഈടാക്കുന്നു. ഏറ്റവും കുറഞ്ഞത് 20,000 രൂപ പിഴ ഈടാക്കാനാണ് സര്‍ക്കാര്‍ തീരുമാനം. സാധനങ്ങള്‍ വാങ്ങുമ്പോള്‍ ബില്ലുകള്‍ നല്‍കുകയും വാങ്ങുകയും വേണമെന്ന സന്ദേശം ജനങ്ങളിലെത്തിക്കാന്‍ ഒരു കോടി രൂപ ബജറ്റില്‍ നീക്കിവച്ചിട്ടുണ്ട്. ഇതുപയോഗിച്ച് നികുതി വെട്ടിപ്പ് തടയാന്‍ വ്യാപക പ്രചാരണം നടത്തും. തുടര്‍ന്ന് പിഴ ഈടാക്കിത്തുടങ്ങും.

ജി എസ് ടി നടപ്പാക്കിയ ശേഷം ഇവേ ബില്ലുകളില്‍ വെട്ടിപ്പു നടത്തിയും വില്‍പന നടക്കുമ്പോള്‍ ബില്ലുകള്‍ നല്‍കാതെയും വന്‍തോതില്‍ നികുതി വെട്ടിപ്പു നടത്തുന്നെന്ന് ജി എസ് ടി വകുപ്പ് കണ്ടെത്തിയിരുന്നു. 20,000 രൂപ വരെ നികുതി രേഖപ്പെടുത്തേണ്ട ബില്ലുകള്‍ നല്‍കിയില്ലെങ്കില്‍ 20,000 രൂപ പിഴ ഈടാക്കാനും അതിന് മുകളില്‍ നികുതി വരുന്ന ബില്ലുകള്‍ നല്‍കിയില്ലെങ്കില്‍ നികുതിയും അത്ര തന്നെ തുക പിഴയായി ഈടാക്കാനുമാണ് നിയമം. അടുത്ത സാമ്പത്തിക വര്‍ഷം നികുതി വരുമാനം 30% വര്‍ദ്ധിപ്പിക്കുമെന്നാണ് ബജറ്റ് പ്രഖ്യാപനം. നികുതി വെട്ടിപ്പിന്റെ എല്ലാ പഴുതുകളും അടച്ചുകൊണ്ട് ഇത് സാധ്യമാക്കാനാണ് പരിഷ്‌കാരങ്ങള്‍ നടപ്പാക്കുന്നത്. 

ഇതിനായി സംസ്ഥാനത്തെ എല്ലാ അതിര്‍ത്തികളിലെയും മോട്ടോര്‍ വാഹന, എക്‌സൈസ് ചെക്‌പോസ്റ്റുകളില്‍ 3 ജി എസ് ടി ഉദ്യോഗസ്ഥരെ വീതം നിയമിക്കും. ചരക്കു വാഹനങ്ങളിലെ ഇവേ ബില്ലുകള്‍ പരിശോധിക്കുകയാണ് ഇവരുടെ മുഖ്യ കടമ.