റിയല്‍ എസ്‌റ്റേറ്റ് ബില്‍ഡര്‍മാര്‍ക്ക് സ്വന്തം ഇഷ്ടപ്രകാരം പുതിയ ജി എസ് ടി നിരക്കോ പഴയ ജി എസ് ടി നിരക്കോ തെരഞ്ഞെടുക്കാന്‍ അവസരം നല്‍കുമെന്ന് ജി എസ് ടി കൗണ്‍സില്‍ യോഗം. നിര്‍മ്മാണത്തിലിരിക്കുന്ന പ്രോജക്ടുകള്‍ക്ക് ഇന്‍പുട്ട് ടാക്‌സ് ക്രെഡിറ്റോടുകൂടിയ (ITC) ഉയര്‍ന്ന ജി എസ് ടി (പഴയ നിരക്ക്) അല്ലെങ്കില്‍ ഐ ടി സി ഇല്ലാത്ത കുറഞ്ഞ ജി എസ് ടി (പുതിയ നിരക്ക്) ഇതിലേതെങ്കിലും തെരഞ്ഞെടുക്കാം.

ചെലവ് കുറഞ്ഞ വീടുകള്‍ക്ക് 8 ശതമാനത്തില്‍ നിന്ന് 1 ശതമാനമായും മറ്റുള്ള വീടുകള്‍ക്ക് 12 ശതമാനത്തില്‍ നിന്ന് 5 ശതമാനമായും നികുതി കുറക്കാന്‍ കഴിഞ്ഞ ജി എസ് ടി കൗണ്‍സില്‍ യോഗത്തില്‍ തീരുമാനമായിരുന്നു. കുറഞ്ഞ നിരക്ക് ഏപ്രില്‍ ഒന്നിന് നടപ്പില്‍വരും. മെട്രോ നഗരങ്ങളില്‍ 60 ചതുരശ്രമീറ്റര്‍, അല്ലാത്തിടങ്ങളില്‍ 90 ചതുരശ്രമീറ്റര്‍, വില പരമാവധി 45 ലക്ഷം രൂപ ഇതാണ് ചെലവ് കുറഞ്ഞ പാര്‍പ്പിടത്തിന്റെ നിര്‍വചനം. കേരളത്തില്‍ മെട്രോ നഗരങ്ങള്‍ ഇല്ല.

പാര്‍പ്പിടങ്ങള്‍ക്കുള്ള കുറഞ്ഞ ജി എസ് ടി നിരക്ക് ലഭിക്കണമെങ്കില്‍ നിര്‍മാണ സാമഗ്രികളില്‍ 80 ശതമാനവും രജിസ്‌റ്റേര്‍ഡ് വ്യാപാരികളില്‍നിന്നു വാങ്ങണം. രജിസ്‌ട്രേഷനില്ലാത്ത വ്യാപാരികളില്‍ നിന്നും സിമന്റ് വാങ്ങിയാല്‍ 28 ശതമാനം നികുതി ചുമത്തും. ഇന്നലെ ചേര്‍ന്ന ജി എസ് ടി കൗണ്‍സിലാണ് ഇതു തീരുമാനമായത്. ഈ നിബന്ധനക്കെതിരെ ബില്‍ഡര്‍മാര്‍ രംഗത്ത് വന്നിട്ടുണ്ട്. ചെറുപട്ടണങ്ങളിലും നാട്ടിന്‍പുറങ്ങളിലും രജിസ്‌റ്റേര്‍ഡ് വ്യാപാരികളല്ല കല്ലും മണലും ഇഷ്ടികയുമൊക്കെ വില്‍ക്കുന്നത്. ചെറുനഗരങ്ങളിലും പട്ടണങ്ങളിലുമുള്ള ബില്‍ഡര്‍മാര്‍ക്ക് ഇതു ബുദ്ധിമുട്ടാകും.

പാര്‍പ്പിടത്തിന് പണിയുന്ന കെട്ടിടത്തില്‍ 15 ശതമാനം വരെ വാണിജ്യ ആവശ്യങ്ങള്‍ക്ക് ഉപയോഗിക്കാമെന്നും ജി എസ് ടി കൗണ്‍സില്‍ തീരുമാനിച്ചു. നിര്‍മ്മാണത്തിലിരിക്കുന്ന പാര്‍പ്പിടങ്ങള്‍ക്ക് പുതിയ നിരക്കോ പഴയ നിരക്കോ വേണ്ടത് എന്നു തീരുമാനിക്കാന്‍ ബില്‍ഡര്‍മാര്‍ക്ക് ഒരു നിശ്ചിത സമയം അനുവദിക്കും. ഇത്് സംസ്ഥാനങ്ങളുമായി കൂടിയാലോചിച്ച് സമയം നിശ്ചയിക്കും. പുതിയ പാര്‍പ്പിടങ്ങള്‍ക്ക് ഏപ്രില്‍ ഒന്നു മുതല്‍ പുതിയ നിരക്കുതന്നെ.

നികുതി കുറക്കുമ്പോള്‍ ബില്‍ഡര്‍മാര്‍ക്ക് ഇന്‍പുട്ട് ടാക്‌സ് ക്രെഡിറ്റ് ലഭ്യമാകില്ലെന്നതുകൊണ്ടാണ് പഴയ നികുതി നിരക്കോ പുതിയ നികുതി നിരക്കോ സ്വീകരിക്കാന്‍ അവസരം നല്‍കാന്‍ ജി എസ് ടി കൗണ്‍സില്‍ തീരുമാനിച്ചത്. മാര്‍ച്ച് 31ന് നിര്‍മാണം പൂര്‍ത്തിയാക്കാത്ത വീടുകളെയാണ് നിര്‍മ്മാണത്തിലിരിക്കുന്നവയായി കണക്കാക്കുക. ഏതു നിരക്ക് വേണമെന്ന് തീരുമാനിക്കാന്‍ ഒറ്റത്തവണയേ അവസരമുണ്ടാകൂ. ഐ ടി സി ഇല്ലാത്ത പുതിയ നിരക്കുകള്‍ ബാധകമാവുക ഏപ്രില്‍ ഒന്നിന് ശേഷം നിര്‍മാണം തുടങ്ങുന്ന പ്രോജക്ടുകള്‍ക്കാണ്.