കിഫ്ബി ധനസമാഹരണത്തിനായി പുറത്തിറക്കിയ മസാല ബോണ്ട് സംബന്ധിച്ച് ദുരൂഹതയും വ്യക്തതയില്ലായ്മയും ഉണ്ടെന്നും, സംസ്ഥാനത്തിന് കനത്ത സാമ്പത്തിക ഭാരം ഉണ്ടാക്കുമെന്ന പ്രതിപക്ഷ ആരോപണത്തെ തുടര്‍ന്ന് നിയമസഭയില്‍ പ്രത്യേകം ചര്‍ച്ച ചെയ്യാമെന്ന് സര്‍ക്കാര്‍. ധനമന്ത്രി ഡോ.തോമസ് ഐസക് ആണ് സര്‍ക്കാരിന്റെ നിലപാട് സഭയെ അറിയിച്ചത്. സംസ്ഥാന സര്‍ക്കാര്‍ ഗ്യാരന്റി നല്‍കി മസാല ബോണ്ട് വഴി 2,150 കോടിരൂപയുടെ ധനസമാഹരണമാണ് കിഫ്ബി ലക്ഷ്യമിടുന്നത്. മസാലാ ബോണ്ട് വിവാദത്തില്‍ ശൂന്യവേളയുടെ ആരംഭത്തില്‍ കെ.എസ് ശബരീനാഥന്‍ നല്‍കിയ അടിയന്തര പ്രമേയനോട്ടീസ് പരിഗണിച്ചാണ് സര്‍ക്കാര്‍ ചര്‍ച്ചയ്ക്ക് വഴങ്ങിയത്.

മസാലാ ബോണ്ട് ഉയര്‍ന്ന പലിശയ്ക്ക് വില്‍ക്കുന്നതു മൂലം സംസ്ഥാനത്തിന് വലിയ തോതില്‍ സാമ്പത്തിക ബാധ്യതയുണ്ടാകുമെന്ന് നോട്ടീസില്‍ പ്രതിപക്ഷം ചൂണ്ടിക്കാട്ടിയിരുന്നു. മസാലാ ബോണ്ടിലെ നിക്ഷേപം സംബന്ധിച്ച വിവരങ്ങള്‍ പുറത്തുവന്നതോടെ സര്‍ക്കാരിനെ പ്രതിക്കൂട്ടിലാക്കുന്ന ആരോപണങ്ങളുമായി പ്രതിപക്ഷ നേതാവ് രമേശ് ചെന്നിത്തലയും രംഗത്തെത്തിയിരുന്നു. മസാലാ ബോണ്ടില്‍ എസ്.എന്‍.സി ലാവ്‌ലിന്‍ ബന്ധമുള്ള കമ്പനിക്ക് നിക്ഷേപം വന്നത് പ്രതിപക്ഷം വലിയ വിഷയമായി തെരഞ്ഞെടുപ്പ്കാലത്ത് ഉയര്‍ത്തിക്കാട്ടിയിരുന്നു.

ലണ്ടന്‍ സ്‌റ്റോക്ക് എക്‌സ്‌ചേഞ്ചില്‍ ഇതുവരെ ലിസ്റ്റ് ചെയ്യപ്പെട്ട ഏറ്റവും ഉയര്‍ന്ന പലിശ നിരക്കായ 9.273 ശതമാനത്തിനാണ് ഈ ബോണ്ടുകള്‍ വിറ്റഴിച്ചിരിക്കുന്നത്. 5 വര്‍ഷം കൊണ്ട് 3,195 കോടി രൂപ തിരിച്ചടവ് വരുന്ന ബോണ്ട് കേരളത്തിനു കടുത്ത സാമ്പത്തിക ഭാരം ഉണ്ടാക്കുമെന്നാണ് പ്രതിപക്ഷത്തിന്റെ ആരേപണം.