കേരളത്തിന്റെ പുനര്‍നിര്‍മാണത്തിന് പണം കണ്ടെത്താന്‍ ബജറ്റില്‍ പ്രഖ്യാപിച്ച പ്രളയ സെസ് ജൂണ്‍ ഒന്നു മുതല്‍ നടപ്പാക്കുന്നതോടെ സാധനങ്ങള്‍ക്ക് വിലയേറും. 5 ശതമാനത്തിന് മുകളില്‍ ജി എസ് ടി ഈടാക്കുന്ന എല്ലാ സാധനങ്ങള്‍ക്കുമാണ് ജൂണ്‍ മുതല്‍ 1% അധിക നികുതി ചുമത്തുന്നത്. 12%, 18%, 28% ജി എസ് ടി നിരക്കുകള്‍ക്ക് കീഴില്‍ വരുന്ന 928 ഉല്‍പന്നങ്ങള്‍ക്കാണ് വില ഉയരുന്നത്. 100 രൂപയ്ക്ക് മുകളില്‍ വിലയുള്ള ഉല്‍പന്നങ്ങള്‍ക്കാണ് സെസ് ബാധ്യത ഒരു രൂപ മുതല്‍ വന്നു തുടങ്ങുക.

ഇതിലൂടെ വര്‍ഷം 600 കോടി രൂപ അധികം സമാഹരിക്കാമെന്നാണു പ്രതീക്ഷ. ജി എസ് ടിക്കുമേല്‍ 1% അധിക സെസ് ഏര്‍പ്പെടുത്താന്‍ രണ്ടുവര്‍ഷത്തേക്കാണ് കേന്ദ്രാനുമതി. ഇതോടെ ചില അവശ്യവസ്തുക്കള്‍ ഒഴികെ 5 ശതമാനത്തിന് മുകളില്‍ ജി എസ് ടിയുള്ള നിര്‍മാണ സാമഗ്രികള്‍, ഗൃഹോപകരണങ്ങള്‍, ഇലക്ട്രോണിക് ഉല്‍പന്നങ്ങള്‍ തുടങ്ങി എല്ലാ വസ്തുക്കള്‍ക്കും വാഹനങ്ങള്‍ക്കും വില ഉയരും. ഇതോടൊപ്പം സര്‍ക്കാര്‍ സേവനങ്ങളുടെ നിരക്കു കൂട്ടുന്ന കാര്യവും ധനവകുപ്പിന്റെ പരിഗണനയിലുണ്ട്. സ്വര്‍ണം, വെള്ളി, പ്ലാറ്റിനം ആഭരണങ്ങള്‍ക്ക് കാല്‍ ശതമാനം സെസ് ഏര്‍പ്പെടുത്താനുള്ള നിര്‍ദേശം തല്‍ക്കാലം നടപ്പാക്കേണ്ടെന്നാണ് ധനവകുപ്പിന്റെ നിലപാട്. 

ഏപ്രില്‍ ഒന്നു മുതല്‍ പ്രളയ സെസ് ഏര്‍പ്പെടുത്താനായിരുന്ന ബജറ്റ് നിര്‍ദേശം. ലോക്‌സഭാ തെരഞ്ഞെടുപ്പ് മൂലമാണ് നീട്ടിവച്ചത്. യു എന്‍ ഏജന്‍സികള്‍ നല്‍കിയ പോസ്റ്റ്് ഡിസാസ്റ്റര്‍ നീഡ്‌സ് അസസ്‌മെന്റ് പ്രകാരം 36,706 കോടി രൂപയാണ് പുനര്‍നിര്‍മാണത്തിന് വേണ്ടത്. വിദേശ വായ്പകള്‍ അടക്കമുള്ള ധനസമാഹരണ മാര്‍ഗങ്ങളും ഇതിനായി പരിഗണിക്കേണ്ടിവരും. വരുമാനം വര്‍ദ്ധിപ്പിക്കാനും ചെലവ് ക്രമീകരിക്കാനുള്ള മാര്‍ഗങ്ങളും കരടുരേഖയില്‍ നിര്‍ദേശിച്ചിട്ടുണ്ട്.