പാചകവാതക സബ്‌സിഡി നേരിട്ട് ഉപഭോക്താക്കളുടെ ബാങ്ക് അക്കൗണ്ടില്‍ എത്തിക്കുന്ന പദ്ധതിക്ക് (പഹല്‍ യോജന) കേരളത്തില്‍ മികച്ച പങ്കാളിത്തം. നിലവില്‍ കേരളത്തില്‍ 85 ശതമാനം ഉപഭോക്താക്കള്‍ പദ്ധതിയില്‍ ചേര്‍ന്നതായി ഇന്ത്യന്‍ ഓയില്‍ കോര്‍പ്പറേഷന്‍ വ്യക്തമാക്കി.
കഴിഞ്ഞ നവംബര്‍ 15 ന് ഇന്ത്യയില്‍ 54 ജില്ലകളില്‍ തുടങ്ങിയ പദ്ധതി ജനവരി ഒന്നു മുതലാണ് രാജ്യവ്യാപകമായി നടപ്പാക്കിയത്. നിലവില്‍ 62.96 ലക്ഷം പേര്‍ പഹല്‍ യോജന പദ്ധതിയില്‍ രജിസ്റ്റര്‍ ചെയ്തിട്ടുണ്ട്.
ഇന്ത്യയില്‍ ശരാശരി 80 ശതമാനം പങ്കാളിത്തമാണ് ഇതിന് ലഭിച്ചിരിക്കുന്നത്. നവംബര്‍ 15 ന് ശേഷം 344.72 കോടി രൂപയാണ് പാചകവാതക സബ്‌സിഡിയായി ഉപഭോക്താക്കളുടെ അക്കൗണ്ടിലൂടെ നല്‍കിയത്. കേരളത്തില്‍ ഇത് 1.04 കോടി രൂപയാണ്. മാസം തോറും പാചകവാതക വിലയനുസരിച്ച് സബ്‌സിഡി തുകയില്‍ വ്യത്യാസമുണ്ടാകും. സിലിണ്ടറിന് പരമാവധി 568 രൂപയാണ് ഇത്തരത്തില്‍ നല്‍കുന്നത്.

സബ്‌സിഡി സിലിണ്ടറുകളുടെ ദുരുപയോഗം തടയാന്‍ പദ്ധതി ഏറെ ഫലപ്രദമാണെന്നാണ് വിലയിരുത്തപ്പെടുന്നത്. സബ്‌സിഡി ആവശ്യമില്ലാത്തവര്‍ക്ക് ആവശ്യമെങ്കില്‍ പദ്ധതിയില്‍ നിന്ന് പിന്‍മാറാനും അവസരമുണ്ട്. ഏപ്രിലോടെ രാജ്യത്ത് പൂര്‍ണമായി പാചകവാതക സബ്‌സിഡി ബാങ്ക് അക്കൗണ്ടിലൂടെ ആക്കാനാണ് കേന്ദ്ര സര്‍ക്കാര്‍ ലക്ഷ്യമിടുന്നത്.