സ്വര്‍ണവിലയില്‍ നേരിയ ഇടിവിനുശേഷം വന്‍ കുതിപ്പ്. ഇന്ന് രണ്ടു തവണയാണ് സ്വര്‍ണവില ഉയര്‍ന്നത്. ഗ്രാമിന് രാവിലെ 100 രൂപ ഉയര്‍ന്നിരുന്നു. ഉച്ചയോടെ 30 രൂപ കൂടി വര്‍ധിച്ചു. 130 രൂപയായി. പവന് ഇതോടെ ഇന്നു മാത്രം 1,040 രൂപ വര്‍ധിച്ചു. ഗ്രാമിന് 5,030 രൂപ ആയി. പവന് 40,240 രൂപയായി.

കൊവിഡ് ലോക്ഡൗണിനെ തുടര്‍ന്നാണ് സ്വര്‍ണവില ആഗോളവിപണിയില്‍ ഉയര്‍ന്നത്. ഓഹരി വിപണിയേക്കാള്‍ സ്വര്‍ണത്തില്‍ നിക്ഷേപം കൂടിയതും യു.എസ്-ചൈന വ്യാപാര കരാര്‍ തര്‍ക്കവുമെല്ലാം സ്വര്‍ണവിലയില്‍ പ്രതിഫലിച്ചു.

കഴിഞ്ഞ ഏതാനും ദിവസങ്ങളായി സ്വർണവില കുറഞ്ഞിരുന്നു. ഇന്നലെ 160 രൂപയും ശനിയാഴ്ച്ച 80 രൂപയും കുറഞ്ഞിരുന്നു. ഓഗസ്റ് ഏഴിന് പവന് 42,000 രൂപ എന്ന നിലയിലേക്ക് ഉയർന്നതിന് ശേഷം സ്വർണവിലയിൽ ഇടിവ് രേഖപ്പെടുത്തിയിരുന്നു. ഇടയ്ക്ക് സ്വർണവിലയിൽ വർധനവുമുണ്ടായിരുന്നു. അമേരിക്കൻ തിരഞ്ഞെടുപ്പും ചൈന- യുഎസ് ബന്ധവും സ്വർണവിലയിൽ ഇനിയും ചാഞ്ചാട്ടത്തിന് കാരണമായേക്കാമെന്നാണ് സൂചന.

ഇന്ത്യയിലെ സ്വര്‍ണ ഇറക്കുമതിയിലെ കുറവ് തുടരുകയാണ്. സാമ്പത്തിക മാന്ദ്യം മൂലം കഴിഞ്ഞ വര്‍ഷം നേരിട്ട ഇറക്കുമതി കുറവ് ഈ വര്‍ഷവും തുടരുകയാണ്. ജൂലൈ മാസത്തില്‍ സ്വര്‍ണ ഇറക്കുമതിയില്‍ മുന്‍വര്‍ഷത്തെ അപേക്ഷിച്ച് 24 ശതമാനം കുറവാണ് രേഖപ്പെടുത്തിയത്.

സ്വര്‍ണ ഇറക്കുമതിയില്‍ കുറവ് തുടരുമ്പോഴും സ്വര്‍ണത്തിലെ ഇ ടി എഫ് നിക്ഷേപത്തില്‍ (ഗോള്‍ഡ് എക്‌സ്‌ചേഞ്ച് ട്രേഡഡ് ഫണ്ട്) വന്‍കുതിപ്പാണ് ഇന്ത്യയില്‍ നടന്നിരിക്കുന്നത്. ജൂണ്‍ മാസത്തേക്കാള്‍ 86 ശതമാനം നിക്ഷേപമാണ് ജൂലൈയില്‍ സ്വര്‍ണത്തിലെ ഇ ടി എഫില്‍ വര്‍ധിച്ചത്