കേന്ദ്ര സർക്കാരിൽ ജോലികിട്ടാൻ വെറും പ്ലസ്ടു യോഗ്യത മതി .. ഏതാണീ അദ്ഭുത പരീക്ഷയെന്നല്ലേ? കമ്പൈൻഡ് ഹയർസെക്കൻഡറി ലെവൽ (സി.എച്ച്.എസ്.എൽ.) പരീക്ഷയെക്കുറിച്ചാണ് പറഞ്ഞുവരുന്നത്. സ്റ്റാഫ് സെലക്ഷൻ കമ്മിഷൻ (എസ്.എസ്.സി.) വർഷാവർഷം നടത്തുന്ന സി.എച്ച്.എസ്.എൽ. പരീക്ഷയെഴുതാൻ പ്ലസ്ടു യോഗ്യതമാത്രംമതി. സംസ്ഥാന സർവീസിനെക്കാൾ ശമ്പളക്കൂടുതലും സർവീസ് ആനുകൂല്യങ്ങളും ഗ്ലാമറുമുള്ള കേന്ദ്രസർക്കാർ ജോലിയാണ് കിട്ടാൻ പോകുന്നത് എന്നതാണ് ഈ പരീക്ഷയുടെ ഏറ്റവും വലിയ നേട്ടം

https://ssc.nic.in എന്ന വെബ്സൈറ്റ് വഴിയാണ് പരീക്ഷയ്ക്ക് അപേക്ഷിക്കേണ്ടത് . അപേക്ഷ നൽകുന്നതിന് ജനുവരി 10 വരെ സമയം ഉണ്ട്

സി.എച്ച്.എസ്.എൽ കേന്ദ്രസർക്കാർ വകുപ്പുകളിലെ ലോവർ ഡിവിഷൻ ക്ലാർക്ക്/ജൂനിയർ സെക്രട്ടേറിയറ്റ് അസിസ്റ്റന്റ്, ഡേറ്റ എൻട്രി ഓപ്പറേറ്റർ, ഡേറ്റ എൻട്രി ഓപ്പറേറ്റർ ഗ്രേഡ് 'എ', തപാൽ വകുപ്പിൽ പോസ്റ്റൽ അസിസ്റ്റന്റ്/സോർട്ടിങ് അസിസ്റ്റന്റ് തസ്തികകളിലെ നിയമനത്തിനാണ് പരീക്ഷ. സമാന റാങ്കിലുള്ള തസ്തികകളാണെങ്കിലും എൽ.ഡി. ക്ലാർക്ക്/ജെ.എസ്.എ. തസ്തികകളെക്കാൾ ഡേറ്റ എൻട്രി ഓപ്പറേറ്റർക്കും (ഡി.ഇ.ഒ.) പോസ്റ്റൽ അസിസ്റ്റന്റിനും അല്പം ശമ്പളം കൂടും. പേ ലെവലിലെ വ്യത്യാസം കൊണ്ടാണിത്. അപേക്ഷിക്കുമ്പോൾത്തന്നെ ഏത് തസ്തികയോടാണ് കൂടുതൽ താത്പര്യം എന്നത് വ്യക്തമാക്കണം.

18 വയസ്സ് കഴിഞ്ഞ പന്ത്രണ്ടാംക്ലാസ് വിജയം അല്ലെങ്കിൽ തത്തുല്യ യോഗ്യതയുള്ള 18-നും 27-നും ഇടയിൽ പ്രായമുള്ള ആർക്കും പരീക്ഷ എഴുതാം. 2020 ജനുവരി ഒന്നിനകം യോഗ്യത നേടണം. 1993 ജനുവരി രണ്ടിനും 2000 ജനുവരി ഒന്നിനും ഇടയിൽ ജനിച്ചവരാകണം.

എഴുത്തുപരീക്ഷ രണ്ട് ഘട്ടങ്ങളായി ആണ് നടത്തുന്നത് ടയർ വൺ പരീക്ഷയിൽ രണ്ട് മാർക്ക് വീതമുള്ള നൂറ് ചോദ്യങ്ങൾ ആയിരിക്കും ഉള്ളത് . ഒബ്ജക്ടീവ് രീതിയിൽ ഉള്ള ഓൺലൈൻ പരീക്ഷക്ക് ഒന്നേകാൽ മണിക്കൂർ ആണ് സമയ ദൈർഘ്യം

ജനറൽ ഇന്റലിജൻസ്, ഇംഗ്ലീഷ്, ക്വാണ്ടിറ്റേറ്റീവ് ആപ്റ്റിറ്റ്യൂഡ്, ജനറൽ അവേർനസ് എന്നീ മേഖലകളിൽനിന്ന് ചോദ്യങ്ങൾ പ്രതീക്ഷിക്കാം . പരീക്ഷ മാർച്ച് 16 മുതൽ 27 വരെ.

ടയർ ടു പരീക്ഷ വിവരണാത്മക രീതിയിൽ ഉള്ളതാണ് . 100 മാർക്കിന്റെ പരീക്ഷ ഒരു മണിക്കൂർ കൊണ്ടെഴുണം. ഉദ്യോഗാർഥിയുടെ ഭാഷാമികവും രചനാശേഷിയും മനസ്സിലാക്കാനുതകുന്ന പരീക്ഷ ആണ് ഇത് . ഇംഗ്ലീഷിൽ 200-250 വാക്കുകളുള്ള ഉപന്യാസവും 150-200 വാക്കുകളുള്ള അപേക്ഷ തയ്യാറാക്കുന്നതിനോ കത്ത് എഴുതുന്നതിനോ ഉള്ള ചോദ്യങ്ങളാണ് പ്രതീക്ഷിക്കേണ്ടത്
. ചുരുങ്ങിയത് 33 ശതമാനം മാർക്കെങ്കിലും ഈ പരീക്ഷയിൽ നേടിയാലേ അന്തിമ ലിസ്റ്റിൽ ഇടംകിട്ടൂ. പരീക്ഷ ജൂൺ 28-ന് ആയിരിക്കും

സ്കിൽ, ടൈപ്പിങ് ടെസ്റ്റ് ഈ രണ്ട് പരീക്ഷകൾക്കുശേഷം ഡേറ്റ എൻട്രി ഓപ്പറേറ്റർ തസ്തികയിലേക്ക് അപേക്ഷിച്ചവർക്ക് സ്കിൽ ടെസ്റ്റും പോസ്റ്റൽ അസിസ്റ്റന്റ്/സോർട്ടിങ് അസിസ്റ്റന്റ്, എൽ.ഡി. ക്ലാർക്ക് തസ്തികകളിലേക്ക് അപേക്ഷിച്ചവർക്ക് ടൈപ്പിങ് ടെസ്റ്റുമുണ്ടാകും. മണിക്കൂറിൽ 8000 കീ ഡിപ്രഷൻ വേഗമാണ് സ്കിൽ ടെസ്റ്റിന് വേണ്ടത്. 2000-2200 അക്ഷരങ്ങളുള്ള ഇംഗ്ലീഷിൽ അച്ചടിച്ച ഭാഗം ഉദ്യോഗാർഥികൾക്ക് നൽകും. 15 മിനിറ്റുകൊണ്ട് അത് ടൈപ്പ്ചെയ്തു തീർക്കണം. മിനിറ്റിൽ 35 വാക്കുകളുടെ ഇംഗ്ലീഷ് ടൈപ്പിങ് വേഗമാണ് പങ്കെടുക്കുന്നവർക്ക് ഉണ്ടാവേണ്ടത്. അച്ചടിച്ച മാറ്റർ 10 മിനിറ്റിനുള്ളിൽ കംപ്യൂട്ടറിൽ ടൈപ്പ് ചെയ്ത് തീർക്കേണ്ടിവരും.

സ്കിൽ ടെസ്റ്റിന്റെയും ടൈപ്പിങ് ടെസ്റ്റിന്റെയും മാർക്ക് റാങ്ക്ലിസ്റ്റ് നിർണയവേളയിൽ പരിഗണിക്കപ്പെടില്ല. രണ്ട് പരീക്ഷകളിലും യോഗ്യത നേടിയാൽ മതി. ടയർ-വൺ, ടു പരീക്ഷകളിൽ നേടിയ മാർക്കുമാത്രം കണക്കുകൂട്ടിയാണ് റാങ്ക്ലിസ്റ്റ് തയ്യാറാക്കുക.

ചോദ്യങ്ങൾ പ്ലസ്ടു നിലവാരത്തിൽ ഉള്ളതായതിനാൽ ലക്ഷക്കണക്കിന് പേർ പരീക്ഷക്ക് ഹാജരാകും എന്നതിനാൽ കട്ട്ഓഫ് മാർക്ക് എപ്പോഴും ഉയരാറുണ്ട്. 150 മാർക്കിനടുത്തായിരിക്കും ജനറൽ വിഭാഗത്തിന്റെ കട്ട്ഓഫ് മാർക്ക്. സംവരണവിഭാഗക്കാരുടെ കട്ട്ഓഫ് മാർക്ക് അല്പം കുറയുമെങ്കിലും നൂറിന് താഴെ പോകാനിടയില്ല. രണ്ട് മാർക്ക് വീതമുള്ള 100 ചോദ്യങ്ങളിൽ 75 എണ്ണമെങ്കിലും ശരിയാക്കിയാൽ മാത്രമേ വിജയമുറപ്പിക്കാനാവൂ. തെറ്റുത്തരത്തിന് നെഗറ്റിവ് മാർക്ക് ഉള്ളതിനാൽ എങ്ങനെയെങ്കിലും കറക്കിക്കുത്തി ജയിക്കാമെന്ന പ്രതീക്ഷ വേണ്ട.

പ്ലസ്ടു നിലവാരത്തിലുള്ള ചോദ്യങ്ങൾ മാത്രമേ വരൂഎങ്കിലും കൃത്യമായ പഠനം ഉണ്ടെങ്കിൽ മാത്രമേ ഉയർന്ന സ്‌കോർ നേടാൻ കഴിയൂ . പ്ലസ്ടു വരെ പഠിച്ച വിഷയങ്ങളിൽനിന്നുള്ള അടിസ്ഥാനപരമായ കാര്യങ്ങളും അല്പം പൊതുവിജ്ഞാനവും കണക്കും ഉൾപ്പെടുന്ന ചോദ്യങ്ങൾക്ക് നിശ്ചിത സമയത്തിനുള്ളിൽ ഉത്തരം നൽകണം. പത്ത് മുതൽ പന്ത്രണ്ടാംക്ലാസ് വരെയുള്ള എൻ.സി.ഇ.ആർ.ടി പാഠപുസ്തകങ്ങൾ ശ്രദ്ധയോടെ പഠിക്കണം. അടിസ്ഥാന വിവരങ്ങൾ അറിയാനും സൂത്രവാക്യങ്ങൾ മനസ്സിലാക്കാനുമൊക്കെ എൻ.സി.ഇ.ആർ.ടി. പുസ്തകങ്ങൾ സഹായിക്കും.

പൊതുവിജ്ഞാന ഭാഗത്തുനിന്നുള്ള ഏറ്റവുംപുതിയ വിവരങ്ങളും ക്വാണ്ടിറ്റേറ്റീവ് ആപ്റ്റിറ്റ്യൂഡ് റീസണിങ് എന്നിവയും വളരെ നല്ലതായി പരിശീലിക്കണം . എളുപ്പമായി തോന്നുന്ന ഭാഗങ്ങൾക്ക് അധികം സമയം കൊടുക്കാതെ ദുഷ്കരമായ ഭാഗങ്ങൾ മനസ്സിലാക്കിയെടുക്കാൻ കൂടുതൽ സമയം ചെലവഴിക്കാം.

മുൻവർഷത്തെ ചോദ്യപ്പേപ്പറുകൾ സമാഹരിക്കണം. ഇന്റർനെറ്റിനെയോ റാങ്ക് ഫയലുകളെയോ ആശ്രയിക്കാം. പഴയ ചോദ്യപ്പേപ്പറുകൾക്ക് ഉത്തരമെഴുതി പരിശീലിക്കുന്നത് പരീക്ഷയെ അടുത്തറിയാൻ സഹായിക്കും. 100 ചോദ്യങ്ങൾക്ക് ഉത്തരമെഴുതാൻ ആകെ 75 മിനിറ്റേയുള്ളൂ എന്ന് ഓർക്കുക. ഒരു ചോദ്യത്തിന് ഒരു മിനിറ്റുപോലും കിട്ടില്ലെന്നറിയുക. പരീക്ഷ സംബന്ധിച്ച നിർദേശങ്ങൾ അറിയാൻ ഇടയ്ക്കിടെ എസ്.എസ്.സി. വെബ്സൈറ്റ് സന്ദർശിക്കണം.