ആര്‍.ബി.ഐ അസിസ്റ്റൻ്റ് പ്രിലിമിനറി പരീക്ഷയുടെ അഡ്മിറ്റ് കാര്‍ഡ് പ്രസിദ്ധീകരിച്ചു. അപേക്ഷ സമര്‍പ്പിച്ചവര്‍ക്ക് ആര്‍.ബി.ഐയുടെ ഔദ്യോഗിക വെബ്സൈറ്റിൽ നിന്നും ഫെബ്രുവരി 15 വരെ അഡ്മിറ്റ് കാര്‍‍ഡ് ‍ഡൗൺലോഡ് ചെയ്യാം.

ഡൗൺലോഡ് ചെയ്യുന്നത് ഇങ്ങനെയാണ്

1. ആദ്യമായി ആര്‍ബിഐയുടെ ഔദ്യോഗിക വെബ്സൈറ്റ് സന്ദര്‍ശിക്കുക (https://ibpsonline.ibps.in/rbiasstnov19/clopea_feb20/login.php?appid=93855bc46d07ace08f8c28c4c484fee3 )

2. കോൾ ലെറ്റര്‍ ടാബ് എന്ന ലിങ്കിൽ ക്ലിക്ക് ചെയ്യുക
3. അസിസ്റ്റൻ്റ് റിക്രൂട്ട്മെൻ്റ് എന്ന ഓപ്ഷനിൽ ക്ലിക്ക് ചെയ്യുക
4.ഇത്രയും ആയാൽ വിവരങ്ങൾ നൽകി കോൾ ലെറ്റര്‍ ഡൗൺലോഡ് ചെയ്യാം

റിസര്‍വ് ബാങ്ക് ഓഫ് ഇന്ത്യ രാജ്യത്തെ വിവിധ ഓഫീസുകളിലെ 926 ഒഴിവുകളിലേക്കാണ് അപേക്ഷകൾ ക്ഷണിച്ചിരിക്കുന്നത്. ഏതെങ്കിലും വിഷയത്തിൽ 50 ശതമാനം മാര്‍ക്കിൽ കുറയാത്ത ബിരുദമാണ് അടിസ്ഥാന യോഗ്യത. എസ്.സി അല്ലെങ്കിൽ എസ്.ടി, ഭിന്നശേഷി വിഭാഗത്തിൽപ്പെടുന്നവര്‍ക്ക് പാസ് മാര്‍ക്ക് മതി. അപേക്ഷകര്‍ക്ക് വേഡ് പ്രോസസങ് അറിഞ്ഞിരിക്കണം. കേരളത്തിൽ തിരുവനന്തപുരത്തും കൊച്ചിയിലുമായി ആകെ 20 ഒഴിവുകളാണ് ഉള്ളത്. ഭിന്നശേഷി, എക്സ്-സര്‍വീസ് വിഭാഗങ്ങൾക്കുള്ള ഒഴിവുകൾക്ക് പുറമെയാണത്.

പ്രാഥമിക പരീക്ഷ , മെയിൻ പരീക്ഷ , ഭാഷാ പ്രാവീണ്യ പരിശോധന എന്നിവയുടെ അടിസ്ഥാനത്തിലായിരിക്കും തിരഞ്ഞെടുപ്പ്

13150 മുതൽ 34990 രൂപ വരെയാണ് ശമ്പളം. മാത്രമല്ല, അസിസ്റ്റൻ്റ് തസ്തികയിൽ നിയമനം കിട്ടുന്നവര്‍ക്ക് വിവിധ അലവൻസുകൾ ഉൾപ്പെടെ ആദ്യമാസം ഏകദേശം 36091 രൂപയോളം ലഭിക്കും.

അപേക്ഷാ ഫീസ്

ജനറൽ വിഭാഗത്തിന് 450 രൂപയും മറ്റ് സംവരണ വിഭാഗങ്ങൾക്ക് 50 രൂപയുമാണ് അപേക്ഷാ ഫീസ്.

പ്രിലിമിനറി പരീക്ഷക്ക്

1. ഇംഗ്ലീഷ് - 30 ചോദ്യം
2. ന്യൂമറിക്കൽ എബിലിറ്റി - 35 ചോദ്യം
3. റീസണിങ് എബിലിറ്റി - 35 ചോദ്യം എന്നിങ്ങനെയാണ് ഉണ്ടായിരിക്കുക

മെയിൻ പരീക്ഷക്ക്

1. റീസണിങ് - 40 ചോദ്യം
2. ഇംഗ്ലീഷ് - 40 ചോദ്യം
3. ന്യൂമറിക്കൽ എബിലിറ്റി - 40 ചോദ്യം
4. ജനറൽ അവയര്‍നെസ്സ് - 40 ചോദ്യം
5. കംമ്പ്യൂട്ടര്‍ നോളജ് - 40 ചോദ്യം എന്നിങ്ങനെ ഉണ്ടായിരിക്കും

പരീക്ഷാ കേന്ദ്രം

കേരളത്തിൽ കണ്ണൂര്‍, കൊച്ചി, കൊല്ലം, കോട്ടയം, കോഴിക്കോട്, മലപ്പുറം, പാലക്കാട്, തിരുവനന്തപുരം, തൃശൂര്‍ എന്നിവടങ്ങളിൽ പ്രിലിമിനറി പരീക്ഷാ കേന്ദ്രങ്ങളും കൊച്ചി, കൊല്ലം, കോട്ടയം, കോഴിക്കോട്, തിരുവനന്തപുരം, തൃശൂര്‍ എന്നിവടങ്ങളിൽ മെയിൻ പരീക്ഷ കേന്ദ്രങ്ങളും ഉണ്ടാവും.

പ്രധാനപ്പെട്ട തീയതികൾ ഇവയൊക്കെയാണ്

1. അപേക്ഷ ക്ഷണിച്ചത് - 23 ഡിസംബര്‍
2. അവസാന തീയതി - 26 ജനുവരി 2020
3. പ്രിലിമിനറി പരീക്ഷ - ഫെബ്രുവരി 14, 15
4. ഓൺലൈൻ മെയിൻ പരീക്ഷ - മാര്‍ച്ച് 2020