കൊവിഡ് രോഗവ്യാപനത്തിന്റെ പശ്ചാത്തലത്തില്‍ നിര്‍ത്തി വച്ചിരുന്ന പുതിയ വര്‍ക്ക് പെര്‍മിറ്റിന് അപേക്ഷ സ്വീകരിക്കുമെന്ന് ബഹറൈൻ ലേബര്‍ മാര്‍ക്കറ്റ് റഗുലേറ്ററി അതോറിറ്റി (എൽ എം ആര്‍ എ) അറിയിച്ചു..

ഓഗസ്റ്റ് ഒന്‍പത് മുതല്‍ അപേക്ഷകൾ സ്വീകരിക്കും .വർക്ക്​ പെർമിറ്റ്​ അനുവദിക്കാൻ തീരുമാനിച്ചതോടെ, സ്വകാര്യ തൊഴിൽ ദാതാക്കൾക്ക്​ വിദേശത്തുനിന്ന്​ തൊഴിലാളികളെ റിക്രൂട്ട്​ ചെയ്യാൻ കഴിയും...

ബഹറൈൻ കിരീടാവകാശിയും ഒന്നാം ഉപപ്രധാനമന്ത്രിയുമായ സല്‍മാന്‍ ബിൻ ഹമദ് ആല്‍ ഖലീഫ രാജകുമാരന്റെ അധ്യക്ഷതയിലുള്ള ഗവണ്‍മെന്റ് എക്സിക്യൂട്ടീവ് കമ്മിറ്റിയാണ് ഇക്കാര്യത്തിൽ തീരുമാനം എടുത്തത്.

ഇതിന്റെ ഭാഗമായി റിക്രൂട്ട്മെന്റ് പരസ്യങ്ങള്‍ പ്രാദേശിക പത്രങ്ങളില്‍ പ്രസിദ്ധീകരിക്കണമെന്ന വ്യവസ്ഥയോടെയാണ് അനുമതി നല്‍കിയത്. ഈ തീരുമാനത്തോടെ സ്വദേശികള്‍ക്കും നിലവിൽ ബഹറൈനിലുള്ള പ്രവാസികള്‍ക്കും അപേക്ഷകള്‍ അയക്കാന്‍ അവസരമൊരുങ്ങുകയാണ്. നിരവധി ആളുകള്‍ക്കാണ് ഇവിടെ ജോലി നഷ്ടപ്പെട്ടിരുന്നത്.

പത്രങ്ങളില്‍ പരസ്യം വന്ന രണ്ടാഴ്ച്ചക്കുള്ളില്‍ സ്വദേശികളോ പ്രവാസികളോ അപേക്ഷിച്ചില്ലെങ്കില്‍ വിദേശത്തു നിന്നുള്ള മറ്റ് തൊഴിലാളികളെ തെരഞ്ഞെടുക്കുവാനാണ് കമ്മിറ്റിയുടെ തീരുമാനം

വൈറസ് വ്യാപനം രൂക്ഷമായ മാര്‍ച്ച് മുതലാണ് വര്‍ക്ക് പെര്‍മിറ്റ് അനുവദിക്കുന്നത് നിര്‍ത്തിവച്ചിരുന്നത്. സര്‍ക്കാര്‍ വര്‍ക്ക് പെര്‍മിറ്റ് അനുവദിക്കാൻ തീരുമാനിച്ചതോടെ, സ്വകാര്യ തൊഴില്‍ ദാതാക്കള്‍ക്ക് വിദേശത്തു നിന്നും തൊഴിലാളികളെ റിക്രൂട്ട് ചെയ്യുവാന്‍ സാധിക്കുമെന്നാണ് കരുതുന്നത്.

കോവിഡ്​ സൃഷ്​ടിച്ച സാമ്പത്തിക പ്രതിസന്ധിയെത്തുടർന്ന്​ തൊഴിൽ നഷ്​ടമായി രാജ്യത്ത്​ തുടരുന്ന പ്രവാസികൾക്ക് ഈ തീരുമാനം ഗുണം ചെയ്യും