ഫുട്ബോൾ താരങ്ങളിൽ കൃത്യമായി ഡയറ്റ് സൂക്ഷിക്കുന്ന ഒരു താരമാണ് ക്രിസ്റ്റ്യാനോ റൊണാൾഡോ. പോർച്ചുഗീസ് താരം ഡയറ്റ് സൂക്ഷിക്കുന്നത് കണ്ട് അത്ഭുതപ്പെട്ടിട്ടുണ്ടെന്ന് ക്രിസ്റ്റ്യാനോ മുമ്പ് മാഞ്ചസ്റ്റർ യുണൈറ്റഡിൽ ഉള്ളപ്പോൾ സഹതാരങ്ങൾ വ്യക്തമാക്കിയിരുന്നു. ഇപ്പോൾ റൊണാൾഡോ നേരിടുന്ന പ്രശ്നം തന്റെ ഡയറ്റ് കൃത്യമായി കൊണ്ടുപോകാൻ സാധിക്കാത്തതാണ്.

സൂപ്പതാരം റൊണാൾഡോയും പങ്കാളി ജോർജിന റോഡ്രിഗലും ഇപ്പോൾ ഗൾഫ് രാജ്യത്ത് നേരിടുന്ന ഏറ്റവും വലിയ വെല്ലുവിളി ഒരു വ്യക്തിഗത ഷെഫിനെ കണ്ടെത്തുക എന്നതാണ്. പോർച്ചുഗീസ് ഭക്ഷണവും സുഷി പോലുള്ള ലോകപ്രശസ്ത പലഹാരങ്ങളും പാകം ചെയ്യാൻ കഴിയുന്ന ഒരാളെയാണ് റൊണാൾഡോയും പങ്കാളിയും അന്വേഷിക്കുന്നത്.. മോഹവിലയായി ശമ്പളം നൽകാമെങ്കിലും റൊണാൾഡോയ്ക്കും താരത്തിന്റെ പങ്കാളി ജോർജിനാ റോഡ്രിഗ്രസിനും തങ്ങളുടെ ആഗ്രഹപ്രകാരമുള്ള ഒരു ഷെഫിനെ കണ്ടെത്താൻ ഇതുവരെ സാധിച്ചിട്ടില്ല.

താരം 17 മില്യൺ പൗണ്ടിന് പോർച്ചുഗീസിലെ റിവിയേരയിൽ വലിയ മാളിക പണിയാൻ ഒരുങ്ങുകയാണ്. അവിടെ തനിക്കും തന്റെ പാങ്കാളിക്കും മക്കൾക്കുമായി ഭക്ഷണം പാചകം ചെയ്ത് നൽകാൻ ഒരു ഷെഫിനെയാണ് താരം തേടുന്നത്. മാസം 4,500 പൗണ്ട് ശമ്പളമാണ് താരം തന്റെ ഷെഫിന് നൽകാനായി തീരുമാനിച്ചിരിക്കുന്നത്. സുഷി പോലെയുള്ള ജാപ്പനീസ് വിഭവങ്ങൾ പാചകം ചെയ്യാൻ അറിയാവുന്ന ഷെഫിനെയാണ് റോണോൾഡോ പ്രധാനമായും തേടുന്നത്.

എന്നാൽ മാസം നാലര ലക്ഷം രൂപ ഓഫർ ചെയ്തിട്ടും ഒരു ഷെഫിനെ റൊണാൾഡോയ്ക്ക് കിട്ടുന്നില്ല. അതിന് കാരണം താരം മുന്നോട്ടുവെക്കുന്ന കടുപ്പമേറിയ നിബന്ധനകൾ അംഗീകരിക്കാൻ ഷെഫുമാർ തയ്യാറാകാത്തതാണത്രെ.

അഞ്ച് തവണ ബാലൺ ഡി ഓർ പുരസ്കക്കാരം നേടിയ റൊണാൾഡോ തന്റെ പ്രൌഢഗംഭീരമായ കരിയറിന്റെ അവസാന ഘട്ടം അൽനാസറിൽ ആഘോഷത്തോടെ കഴിച്ചുകൂട്ടാനാണ് ആഗ്രഹിക്കുന്നത്, കൂടാതെ പോർച്ചുഗലിൽ തന്റെ കുടുംബത്തിനായി ഒരു മാളിക പണിയുന്ന തിരക്കിലുമാണ് താരം. 37 കാരനായ അദ്ദേഹം 2021 സെപ്റ്റംബറിൽ ഭൂമി വാങ്ങിയെന്നും അദ്ദേഹത്തിന്റെ സ്വപ്ന ഭവനം 2023 ജൂണിൽ പൂർത്തിയാകുമെന്നും പറയപ്പെടുന്നു.

2.5 വർഷത്തെ കരാറിൽ സൗദി അറേബ്യൻ ക്ലബ് അൽ നാസറിൽ ചേർന്ന റൊണാൾഡോയ്ക്ക് ഉജ്ജ്വല സ്വീകരണമാണ് ലഭിച്ചത്. കാമുകി ജോർജിന റോഡ്രിഗസും അവരുടെ കുട്ടികളും അദ്ദേഹത്തോടൊപ്പമുണ്ടായിരുന്നു. സ്ഥിരതാമസം അന്വേഷിക്കുന്നതിനിടെ റിയാദിന്റെ മധ്യഭാഗത്തുള്ള ഫോർ സീസൺസ് ഹോട്ടലിലെ സ്യൂട്ടിലാണ് കുടുംബം ഇപ്പോൾ താമസിക്കുന്നത്.

അതേസമയം, അൽ നാസറിന് വേണ്ടി കരാറൊപ്പിട്ട ശേഷം സൗദി അറേബ്യയിലെ തന്റെ ആദ്യ മത്സരത്തിൽ റൊണാൾഡോ രണ്ട് ഗോളുകൾ നേടി. റിയാദിൽ പാരീസ് സെന്റ് ജെർമെയ്‌നെതിരെ നടന്ന സൗഹൃദ മത്സരത്തിൽ പോർച്ചുഗീസ് സൂപ്പർതാരം സൗദി ഓൾ-സ്റ്റാർ ഇലവനെ നയിച്ചു. മത്സരം, 5-4-ന് വിജയിച്ചത് പിഎസ്.ജി ആയിരുന്നു. അപ്പോൾ ജാപ്പനീസ് ഭക്ഷണം സൂഷിയും മറ്റ് പോർച്ചുഗീസ് വിഭങ്ങളും പാചകം ചെയ്യാൻ അറിയാവുന്നവറുണ്ടെങ്കിൽ റൊണാൾഡോയുടെ കുക്ക് ആകാം.