ശനിയാഴ്ച കാലാവധി തീരുന്ന എല്‍.ഡി ക്ലര്‍ക്ക് റാങ്ക്‌ലിസ്റ്റില്‍നിന്ന് പുതുതായി 1000ലേറെ പേര്‍ക്കുകൂടി നിയമനം ലഭിക്കും. ബുധനാഴ്ച വരെ പി.എസ്.സിക്ക് റിപ്പോര്‍ട്ട് ചെയ്ത ഒഴിവുകളുടെ അടിസ്ഥാനത്തിലാണിത്. പുതുതായി അറിയിച്ച ഒഴിവുകളിലേക്ക് ഏപ്രില്‍ രണ്ടാംവാരത്തോടെ നിയമന ശിപാര്‍ശ നല്‍കുമെന്ന് പി.എസ്.സി അറിയിച്ചു.സംസ്ഥാനത്തെ 14 ജില്ലകളിലായി ചൊവ്വാഴ്ച വൈകീട്ട് വരെ 899 പേരുടെ ഒഴിവുകളാണ് പി.എസ്.സിയെ അറിയിച്ചത്.

തിരുവനന്തപുരത്താണ് ഏറ്റവും കൂടുതല്‍ ഒഴിവ് റിപ്പോര്‍ട്ട് ചെയ്തത് 103. മലപ്പുറമാണ് തൊട്ടുപിന്നില്‍ 102. ആലപ്പുഴ 52, തൃശൂര്‍ 77, പാലക്കാട് 59, കോഴിക്കോട് 97, വയനാട് 45, കണ്ണൂര്‍ 85, കാസര്‍കോട് 41, കൊല്ലം 40, പത്തനംതിട്ട 29, ആലപ്പുഴ 55, കോട്ടയം 60, ഇടുക്കി 26, ഏറണാകുളം 80 എന്നിങ്ങനെയാണ് മറ്റു ജില്ലകളിലെ കണക്ക്. ബുധനാഴ്ച വൈകീട്ടോടേ 70 ഒഴിവുകൂടി റിപ്പോര്‍ട്ട് ചെയ്തു.

റാങ്ക്‌ലിസ്റ്റിന്റെ കാലാവധി തീരുന്ന മാര്‍ച്ച് 31വരെ ഒഴിവുകളും റിപ്പോര്‍ട്ട് ചെയ്യാം. അവസാന തീയതിക്ക് നല്‍കുന്ന ഒഴിവുംകൂടി വരുമ്പോള്‍ 1000ത്തോളം പേര്‍ക്ക് പുതുതായി അവസരം വരുമെന്നാണ് പ്രതീക്ഷ. 10,050പേര്‍ക്കാണ് നിലവിലെ റാങ്ക്‌ലിസ്റ്റില്‍നിന്ന് നിയമനം നല്‍കിയത്. ഈമാസം 27നകം ഒഴിവുകള്‍ പൊതുഭരണ വകുപ്പിന് റിപ്പോര്‍ട്ട് ചെയ്യണമെന്ന് സര്‍ക്കാര്‍ അന്ത്യശാസനം നല്‍കിയതിനെ തുടര്‍ന്നാണ് ഇത്രയും ഒഴിവുകള്‍ അറിയിച്ചതെന്നാണ് സൂചന.

സെക്രട്ടേറിയറ്റിനു മുന്നില്‍ ഉദ്യോഗാര്‍ഥികള്‍ തുടരുന്ന അനിശ്ചിതകാല സമരം മുന്നില്‍കണ്ട് ഒഴിവ് റിപ്പോര്‍ട്ട് ചെയ്യാന്‍ മുഖ്യമന്ത്രി തന്നെ നിര്‍ദേശം നല്‍കുകയായിരുന്നു. മുന്‍ റാങ്ക്‌ലിസ്റ്റിലുള്ളവര്‍ക്കായി 1600ലേറെ സൂപ്പര്‍ന്യൂമറി തസ്തിക സൃഷ്ടിച്ച് നിയമനം നടന്നതിനാല്‍ അവസരം നഷ്ടമായെന്നും അതിനാല്‍ റാങ്ക്‌ലിസ്റ്റ് നീട്ടണമെന്നും ആവശ്യപ്പെട്ടാണ് ഉദ്യോഗാര്‍ഥികള്‍ സമരം നടത്തുന്നത്. റാങ്ക്‌ലിസ്റ്റ് കാലാവധി നീട്ടാന്‍ കഴിയില്ലെന്ന് സര്‍ക്കാര്‍ ആവര്‍ത്തിച്ച് വ്യക്തമാക്കിയിട്ടുണ്ട്.