ആധാറിലെ പരിഷ്‌ക്കാരങ്ങള്‍ നീറ്റ് അപേക്ഷകരെ വെട്ടിലാക്കി, വിദ്യാര്‍ത്ഥികളും രക്ഷിതാക്കളും നെട്ടോട്ടത്തില്‍
ആധാറിലെ പുതിയ പരിഷ്‌കാരം അഖിലേന്ത്യ മെഡിക്കല്‍ പ്രവേശന പരീക്ഷയായ നീറ്റ് അപേക്ഷകരെ വെട്ടിലാക്കി. നീറ്റിന് അപേക്ഷിക്കണമെങ്കില്‍ ആധാര്‍ നിര്‍ബന്ധമാണ്. ആധാറില്‍ തെറ്റുകള്‍ കടന്നുകൂടിയവര്‍ക്ക് അത് തിരുത്തിമാത്രമേ അപേക്ഷിക്കാനാകൂ.
അക്ഷയകേന്ദ്രങ്ങള്‍ വഴിയാണ് ആധാറിലെ തെറ്റുകള്‍ തിരുത്തുന്നത്. എന്നാല്‍ അക്ഷയസംരംഭകരുടെ കൃഷ്ണമണി സ്‌കാന്‍ ചെയ്താല്‍ (ഐറിസ് സ്‌കാന്‍) മാത്രമേ ലോഗിന്‍ ചെയ്യാന്‍ കഴിയൂവെന്ന പുതിയ നിബന്ധന വന്നതോടെ ഭൂരിഭാഗം കേന്ദ്രങ്ങളുടെയും പ്രവര്‍ത്തനം അവതാളത്തിലായി. ഇതോടെ തിരുത്തലുകള്‍ ആവശ്യമുള്ള വിദ്യാര്‍ത്ഥികളും രക്ഷിതാക്കളും ഓട്ടത്തിലാണ്.
ആധാര്‍ വിവരങ്ങള്‍ ചോര്‍ന്നുവെന്ന വാര്‍ത്തകളെ തുടര്‍ന്ന് സുരക്ഷ കര്‍ശനമാക്കുന്നതിന്റെ ഭാഗമായാണ് ഈ പരിഷ്‌കാരമെന്ന് കേന്ദ്ര ഐ.ടി.മന്ത്രാലയം ആറിന് പുറപ്പെടുവിച്ച ഉത്തരവില്‍ പറയുന്നു. പുതിയ ഐറിസ് സ്‌കാനറിന് 13,000 രൂപയാണ് വില. എന്നാല്‍ ഏതു മോഡല്‍ വാങ്ങണമെന്നത് സംബന്ധിച്ചും മാര്‍ഗനിര്‍ദേശം ലഭിച്ചിട്ടില്ല. യാതൊരു മുന്നറിയിപ്പുമില്ലാതെ ഒറ്റ ദിവസം കൊണ്ട് ഈ പരിഷ്‌കാരം വരുത്തിയതില്‍ അക്ഷയ സംരംഭകര്‍ക്കിടയിലും പ്രതിഷേധം നീറിപ്പുകയുകയാണ്.
ആധാറിലെ പേരോ, മേല്‍വിലാസമോ, മൊബൈല്‍ ഫോണ്‍ നമ്പറോ മാറ്റേണ്ടവരാണ് കുരുങ്ങിയത്. ഫിംഗര്‍ സ്‌കാനറുണ്ടെങ്കില്‍ സംരംഭകന്റെ വിരലടയാളം ഉപയോഗിച്ച് രണ്ടു മണിക്കൂറിനുള്ളില്‍ ആധാര്‍ അപ്‌ഡേറ്റ് ചെയ്യാന്‍ അക്ഷയ കേന്ദ്രങ്ങള്‍ക്ക് കഴിഞ്ഞിരുന്നു. എന്നാല്‍ ഇനി വിരലടയാളത്തിന് പുറമെ ഓപ്പറേറ്ററുടെ കൃഷ്ണമണിയുടെ സ്‌കാന്‍ കൂടി ചേര്‍ക്കണം.
കഴിഞ്ഞ വര്‍ഷം ഐറിസ് സ്‌കാനിംഗ് നടപ്പാക്കാന്‍ യു.ഐ.ഡി.എ.ഐ(യുണിക് ഐഡന്റിഫിക്കേഷന്‍ അതോറിറ്റി ഒഫ് ഇന്ത്യ)ശ്രമിച്ചെങ്കിലും കേരളത്തിന്റെ ശക്തമായ എതിര്‍പ്പിനെ തുടര്‍ന്ന് പിന്‍വലിച്ചു. സംസ്ഥാനത്ത് ആകെ 2600 അക്ഷയകേന്ദ്രങ്ങളാണുള്ളത്. ഇതില്‍ 1000 കേന്ദ്രങ്ങളില്‍ ആധാര്‍ എന്റോള്‍മെന്റിന് സൗകര്യമുണ്ട്. അവശേഷിച്ച കേന്ദ്രങ്ങളിലെ അപ്‌ഡേഷന്‍ സൗകര്യമാണ് ഇപ്പോള്‍ ഇല്ലാതായത്‌.
https://www.facebook.com/Malayalivartha
