ആദിവാസി യുവതീയുവാക്കള്‍ക്ക് പൊലീസിലും എക്‌സൈസിലും പ്രത്യേക നിയമനം നടത്തുന്നതിനായി പി.എസ്.സി ചട്ടത്തില്‍ ഭേദഗതി വരുത്തി. ഇരു തസ്തികകളിലും എഴുത്തുപരീക്ഷയില്ലാതെ 100 മാര്‍ക്കിന്റെ ഇന്റര്‍വ്യൂ അടിസ്ഥാനത്തില്‍ നിയമനം നടത്തുന്ന വിധത്തിലാണ് ദേഭഗതി. പ്ലസ് ടു, 10, ഒമ്പത്, എട്ട് ക്ലാസ് യോഗ്യത കണക്കാക്കി പ്രത്യേക പട്ടികയും തയ്യാറാക്കാന്‍ തിങ്കളാഴ്ച ചേര്‍ന്ന പി.എസ്.സി യോഗം തീരുമാനിച്ചു. പാലക്കാട്, മലപ്പുറം, വയനാട് ജില്ലകളിലെ വനാന്തരങ്ങളിലും വനാതിര്‍ത്തിയിലും കഴിയുന്ന കാട്ടുനായ്ക്ക, പണിയ, അടിയ വിഭാഗങ്ങളിലെ ആദിവാസികള്‍ക്കാണ് പ്രത്യേക നിയമനം നടത്തുക. എഴുത്തുപരീക്ഷയില്ലാത്തതും യോഗ്യതയില്‍ ഇളവ് വരുത്തുന്നതും കണക്കിലെടുത്താണ് ചട്ടഭേദഗതി.

പാലക്കാട് 466ഉം വയനാട്ടില്‍ 651ഉം മലപ്പുറത്ത് 200ഉം പേര്‍ കായിക ക്ഷമത പരീക്ഷ പാസായി. 21, 22, 23 തീയതികളിലാണ് കൂടിക്കാഴ്ച. പൊലീസ്, എക്‌സൈസ് വിഭാഗങ്ങളിലായി 100 പേരെയാണ് ആദ്യഘട്ടം നിയമിക്കുക. 21 വനിതകള്‍ ഉള്‍പ്പെടെ 75 പേരാണ് സിവില്‍ പൊലീസ് ഓഫിസര്‍ തസ്തികയിലുണ്ടാവുക. രണ്ട് വനിതകള്‍ ഉള്‍പ്പെടെ 25 പേരെ സിവില്‍ എക്‌സൈസ് ഓഫിസര്‍ തസ്തികയിലും നിയമിക്കും

റാങ്ക്‌ലിസ്റ്റിന്റെ കാലാവധി ഒരുവര്‍ഷമായതിനാല്‍ താമസിയാതെ നൂറുപേരെ കൂടി നിയമിക്കാനാണ് സര്‍ക്കാര്‍ ലക്ഷ്യമിടുന്നത്. മലപ്പുറം ജില്ലയില്‍ വിദ്യാഭ്യാസ വകുപ്പില്‍ പാര്‍ട്ട് ടൈം ജൂനിയര്‍ ലാംഗ്വേജ് ടീച്ചര്‍ (ഉര്‍ദു) എല്‍.സി (487/17), എസ്.ഐ.യു.സി നാടാര്‍ (488/2017), ഹിന്ദു നാടാര്‍ (489/2017) രണ്ട് എന്‍.സി.എ. വിജ്ഞാപനങ്ങള്‍ക്കുശേഷവും യോഗ്യരായ ഉദ്യോഗാര്‍ഥികളെ ലഭിക്കാത്ത സാഹചര്യത്തില്‍ ഈ ഒഴിവ് മാതൃ റാങ്ക് പട്ടികയിലെ അര്‍ഹരായ അടുത്ത സവരണ വിഭാഗത്തിന് ചട്ടപ്രകാരം നല്‍കി നികത്തും.

കേരള കാര്‍ഷിക ഗ്രാമ വികസന ബാങ്ക് സമര്‍പ്പിച്ച കരട് വിശേഷാല്‍ ചട്ടത്തിനുമേലുള്ള ഉപസമിതി നിര്‍ദേശങ്ങള്‍ അംഗീകരിച്ചു. സാങ്കേതിക വിദ്യാഭ്യാസ വകുപ്പില്‍ േട്രഡ്‌സ്മാന്‍ (ഓട്ടോമൊബൈല്‍/ഹീറ്റ് എന്‍ജിന്‍) തസ്തികക്ക് നിലവിലുള്ള റൊട്ടേഷന്‍ തുടരാനും പി.എസ്.സി യോഗം തീരുമാനിച്ചു.