തലസ്ഥാന നഗരിയെ ഒന്നാകെ ഞെട്ടിച്ചുകൊണ്ട് തിരുവനന്തപുരം പാങ്ങപ്പാറയിൽ കാണാതായ 17-കാരന്റെ തിരോധാനം ക്രൂരമായ കൊലപാതകമെന്ന് തെളിഞ്ഞു. കാര്യവട്ടം പാങ്ങപ്പാറ സംഗീത നഗറിലുള്ള പ്ലസ്ടു വിദ്യാർത്ഥിയായ അഭിറാം എം.ഡി.യുടെ മൃതദേഹമാണ് വിജനമായ സ്ഥലത്തെ വാഴത്തോട്ടത്തിൽ നിന്നും പോലീസ് കണ്ടെടുത്തത്. നാടിനെ നടുക്കിയ ഈ ദാരുണ സംഭവവുമായി ബന്ധപ്പെട്ട് ഒരു പെൺകുട്ടി ഉൾപ്പെടെ മൂന്നുപേരാണ് നിലവിൽ പോലീസിന്റെ കസ്റ്റഡിയിലുള്ളത്. കൗമാരക്കാർ ഉൾപ്പെട്ട കൊലപാതകത്തിന്റെ കൂടുതൽ വിവരങ്ങൾ പുറത്തുവന്നതോടെ വലിയ അമ്പരപ്പിലാണ് നാട്ടുകാർ.

കൊലയ്ക്ക് കാരണം കൊല നടത്തിയ 17കാരന്റെ മുൻ പെൺസുഹൃത്തും കൊല്ലപ്പെട്ട അഭിറാമിന്റെ സുഹൃത്തുമായുള്ള ബന്ധമെന്ന് മൊഴി. കേസിൽ ഒന്നാം പ്രതിയായ 17കാരന്റെ പെൺസുഹൃത്തിനെയും പ്രതി ചേർത്തു. ഈ പെൺകുട്ടിക്ക് പ്രായപൂർത്തിയായെന്നും പൊലീസ് വ്യക്തമാക്കി. മണക്കാട് സ്വദേശിനിയായ അനന്തയാണ് മൂന്നാം പ്രതി. 18കാരിയായ അനന്ത ഐടിഐ വിദ്യാർത്ഥിനിയാണ്.പക തീർക്കാനായി പെൺകുട്ടി ചിത്രങ്ങൾ പ്രതിക്ക് അയച്ചു. ഇതോടെയാണ് അഭിറാമിന്റെ സുഹൃത്തിനെ കൊലപ്പെടുത്താൻ തീരുമാനിച്ചതെന്നും പ്രതി പൊലീസിനോട് പറഞ്ഞു.

ശ്രീകാര്യം പാങ്ങപ്പാറ സംഗീത നഗർ നേതാജി ലെയിനിൽ വാടകയ്ക്ക് താമസിക്കുന്ന ഓട്ടോ ഡ്രൈവറായ മധുവിന്റെയും ധർമ്മജയുടെയുംമകൻ അഭിറാം (17) ആണ് കൊല്ലപ്പെട്ടത്.പ്രതിയായ 17കാരന് മുൻപ് ഒരു പ്രണയമുണ്ടായിരുന്നു. ഈ പെൺകുട്ടിയുമായി പിന്നീട് വേർപിരിഞ്ഞു. പിന്നീട് അഭിറാമിന്റെ മുൻ പെൺസുഹൃത്തുമായി പ്രണയത്തിലായി. പഴയ കാമുകി പക തീർക്കാനായി പുതിയ കാമുകനെ കണ്ടെത്തി. ഈ കാമുകനുമൊത്തുള്ള ചിത്രങ്ങൾ അഭിറാമിന്റെ സുഹൃത്തിന് അയച്ചുകൊടുത്തു. ഇതിൽ പ്രകോപിതനായ പ്രതി പുതിയ കാമുകനെ കൊലപ്പെടുത്താൻ പദ്ധതിയിട്ടു.

അഭിറാമിന്റെ സുഹൃത്താണ് പുതിയ കാമുകൻ. ഇയാളെ വിളിച്ചുവരുത്താനായി വേണ്ടി അഭിറാമിനെ ഉപയോഗിക്കാൻ പദ്ധതിയിട്ടു. തുടർന്ന് അഭിരാം എത്തുകയും തർക്കത്തിൽ കൊല്ലപ്പെടുകയുമായിരുന്നു. പ്രതി പുതിയ കാമുകിയുടെ ഫോൺ രണ്ട് ദിവസത്തേയ്ക്ക് വാങ്ങി. തുടർന്ന് പഴയ കാമുകിയാണെന്ന വ്യാജേന അഭിറാമിന് മെസേജ് അയക്കുകയും ബന്ധം പുനസ്ഥാപിക്കുകയും ചെയ്തു.ഈ പെൺകുട്ടിയാണെന്ന വ്യാജേന അഭിറാമിനെ വിളിച്ചുവരുത്തുകയായിരുന്നു.ഞായറാഴ്ച വൈകുന്നേരമാണ് സുഹൃത്തിനെ കാണാനായി വീട്ടിൽ നിന്നും ഇറങ്ങിയ അഭിറാം രാത്രി ഏറെ വൈകിയിട്ടും തിരികെ എത്താതിരുന്നത്.

കുട്ടിയുടെ മൊബൈൽ ഫോൺ പൂർണ്ണമായും സ്വിച്ച് ഓഫ് ചെയ്ത നിലയിലായതോടെ പരിഭ്രാന്തരായ വീട്ടുകാർ ഉടൻ തന്നെ പോലീസ് സ്റ്റേഷനിലെത്തി പരാതി നൽകുകയായിരുന്നു. പരാതിയുടെ അടിസ്ഥാനത്തിൽ തിരോധാനത്തിന് കേസെടുത്ത പോലീസ് അടിയന്തര അന്വേഷണം ആരംഭിച്ചു. അഭിറാമിന്റെ അടുത്ത സുഹൃത്തുക്കളെ കേന്ദ്രീകരിച്ച് ആദ്യഘട്ടത്തിൽ തിരച്ചിൽ നടത്തിയെങ്കിലും കാര്യമായ വിവരങ്ങളൊന്നും ലഭിച്ചിരുന്നില്ല.തുടർന്ന് നഗരത്തിലെ സിസിടിവി ദൃശ്യങ്ങൾ കേന്ദ്രീകരിച്ചും കുട്ടിയുടെ ഫോണിന്റെ അവസാന ടവർ ലൊക്കേഷൻ സൈബർ സെല്ലിന്റെ സഹായത്തോടെ നിരീക്ഷിച്ചുമാണ് പോലീസ് അന്വേഷണം മുന്നോട്ടുകൊണ്ടുപോയത്.