ഉപഗ്രഹവേധ മിസൈല്‍ വിജയകരമാക്കിയ നാലാമത്തെ രാജ്യമായി മാറിയിരിക്കുകയാണ് ഇന്ത്യ. താഴ്ന്ന സഞ്ചാരപാതയുള്ള ഉപഗ്രഹങ്ങളെ നശിപ്പിക്കുന്ന മിസൈലുകളാണ് ഉപഗ്രഹവേധ മിസൈല്‍. (ലോ എര്‍ത്ത് ഓര്‍ബിറ്റ് - ഭൂമിയില്‍ നിന്ന് 160 മുതല്‍ 2000 കിലോമീറ്റര്‍ ദൂരത്തിലുള്ള ബഹിരാകാശ പാതയാണിത്. അതിനു മുകളില്‍ മീഡിയം എര്‍ത്ത് ഓര്‍ബിറ്റും അതിനു മേലെ ജിയോ സ്‌റ്റേഷനറി ഓര്‍ബിറ്റ് എന്നും അറിയപ്പെടുന്നു)ഇങ്ങനെ ഭൂമിയുടെ ഉപരിതലത്തില്‍ 300 കിലോമീറ്റര്‍ അകലെയായി മാത്രം (താഴ്ന്ന ഓര്‍ബിറ്റിലൂടെ) സഞ്ചരിച്ച ഉപഗ്രഹത്തെയാണ് ഇന്ത്യ വിക്ഷേപിച്ച ആന്റി സാറ്റലൈറ്റ് മിസൈല്‍ നശിപ്പിച്ചത്.

മിഷന്‍ ശക്തി എന്ന് പേരിട്ട പദ്ധതിയില്‍ ഉപഗ്രഹത്തിന്റെ സഞ്ചാരപാത താഴ്ത്തിയ ശേഷമാണ് ഡി.ആര്‍.ഡി.ഒ ശാസ്ത്രജ്ഞര്‍ ആന്റി സാറ്റലൈറ്റ് മിസൈല്‍ പരീക്ഷിച്ചത്. മൂന്ന് മിനിട്ടിനുള്ളില്‍ ദൗത്യം പൂര്‍ത്തിയാക്കാന്‍ മിസൈലിന് സാധിച്ചു. യു.എസ്, ചൈന, റഷ്യ എന്നീ രാജ്യങ്ങള്‍ക്ക് മാത്രമായിരുന്നു ഉപഗ്രഹവേധ മിസൈലുകള്‍ ഉണ്ടായിരുന്നത്. ഈ ഗണത്തിലേക്കാണ് ഇന്ത്യയും എത്തിയത്. ഈ സാങ്കേതിക വിദ്യ കൈവശമുണ്ടെന്ന് ഇസ്രായേലും അവകാശപ്പെടുന്നുണ്ട്. എന്നാല്‍ ഇതുവരെ പരീക്ഷിച്ചിട്ടില്ല.

രാജ്യങ്ങള്‍ പ്രധാനമായും ഗതാഗതം, വാര്‍ത്താവിനിമയം തുടങ്ങിയ ആവശ്യങ്ങള്‍ക്കാണ് ഉപഗ്രഹങ്ങളെ ഉപയോഗിക്കാറുള്ളത്. മറ്റൊരു പ്രധാന ആവശ്യം രാജ്യങ്ങളുടെ മിസൈല്‍ ഉപയോഗങ്ങള്‍ക്ക് നിര്‍ദേശം നല്‍കി വിജയിപ്പിക്കുക എന്നതാണ്. മിസൈലുകള്‍ കൃത്യമായ സ്ഥലങ്ങളില്‍ പതിക്കുന്നതും മറ്റും ഉപഗ്രഹങ്ങളില്‍ നിന്നുള്ള നിര്‍ദേശങ്ങള്‍ക്കനുസരിച്ചാണ്. ഇത്തരം ഉപഗ്രഹങ്ങളെ നശിപ്പിക്കുന്നതിലൂടെ ഒരു രാജ്യത്തിന്റെ മിസൈലുകളെ ഉപയോഗ ശൂന്യമാക്കാന്‍ സാധിക്കും.

ശീതയുദ്ധകാലത്താണ് യു.എസും റഷ്യയും ഉപഗ്രഹ വേധ മിസൈല്‍ പരീക്ഷിച്ചത്. ഇതുവരെയും ഒരു രാജ്യവും മറ്റൊരു രാജ്യത്തിന്റെ ഉപഗ്രഹങ്ങളെ തകര്‍ത്തിട്ടില്ല. പരീക്ഷണത്തിന് അതാത് രാജ്യത്തിന്റെ ഉപഗ്രഹങ്ങളെയാണ് ഉപയോഗിക്കാറ്. ഓര്‍ബിറ്റില്‍ തുടരുന്ന കാലഹരണപ്പെട്ട ഉപഗ്രഹങ്ങളാണ് പരീക്ഷണത്തിന് ഉപയോഗിക്കുന്നത്. ഇന്ത്യയും സ്വന്തം ഉപഗ്രഹമാണ് ഉപയോഗിച്ചതെന്ന് പറയുന്നുണ്ടെങ്കിലും ഏതാണെന്ന് വ്യക്തമാക്കിയിട്ടില്ല.

ഉപഗ്രഹ വേധ മിസൈല്‍ പരീക്ഷണങ്ങള്‍ എല്ലാ തവണയും വിവാദങ്ങള്‍ക്കും വഴിവെച്ചിട്ടുണ്ട്. ബഹിരാകാശത്തെ ആയുധവത്കരണത്തിലേക്ക് നയിക്കുന്നതാണ് നടപടി എന്നാണ് വിമര്‍ശനങ്ങളുയരാറ്. ബഹിരാകാശ ആയുധവത്കരണം 1967-ലെ ബഹിരാകാശ ഉടമ്പടി പ്രകാരം നിരോധിച്ചതാണ്.  പ്രധാനമന്ത്രി മോദി പ്രസംഗത്തില്‍ ഇക്കാര്യം കൂട്ടിച്ചേര്‍ത്തിട്ടുണ്ട്.

ഇത് പ്രതിരോധത്തിന് വേണ്ടി മാത്രമാണെന്നും ഇന്ത്യയുടെ ബഹിരാകാശ സുരക്ഷ ഉറപ്പുവരുത്തുന്നതിനാണെന്നും പറഞ്ഞ മോദി ബഹിരാകാശ ആയുധവത്കരണത്തിന് ഇന്ത്യ എപ്പോഴും എതിരായിരിക്കുമെന്നും കൂട്ടിച്ചേര്‍ത്തു. ഉപഗ്രഹ വേധ മിസൈല്‍ പ്രയോഗങ്ങള്‍ ബഹിരാകാശ മാലിന്യങ്ങള്‍ക്കും വഴിവെക്കുന്നു. ബഹിരാകാശത്ത് തകര്‍ക്കപ്പെടുന്ന ഉപഗ്രഹങ്ങളുടെ അവശിഷ്ടങ്ങള്‍ മറ്റ് ബഹിരാകാശ പേടകങ്ങള്‍ക്ക് ഭീഷണിയാകാനും സാധ്യതയുണ്ട്.