കോശന്തരചലനങ്ങളുടെ 3ഡി ദൃശ്യങ്ങള്‍ പകര്‍ത്തി, സഹായകമായത് ഗൈഡ്സ്റ്റാര്‍ ഇമേജിംഗ് ടെക്‌നിക്ക് കൊണ്ട് പ്രവര്‍ത്തിക്കുന്ന മൈക്രോസ്‌കോപ്പ്
മൈക്രോസ്‌കോപ്പ് ഉപയോഗിച്ചാല്‍, നമ്മുടെ കണ്ണുകള്‍ കൊണ്ട് നമുക്ക് നേരിട്ട് കാണാനാവാത്ത വളരെ ചെറിയ വസ്തുക്കളെ വലുതായി കാണാന്‍ കഴിയും എന്ന് നമുക്കറിയാം. അങ്ങനെ കാണുന്നതിനായി വലുതായി കാണേണ്ട വസ്തുവിനെ എടുത്ത് ഒരു സ്ഫടിക സ്ലൈഡില്‍ വച്ച് മൈക്രോസ്‌കോപ്പിന്റെ ലെന്‍സിനടിയില്‍ വച്ചു നോക്കുകയാണ് ചെയ്യുന്നത്.
എന്നാല്‍ സചേനവസ്തുക്കളുടെ ഉള്ളില്‍ നടക്കുന്ന പ്രവര്‍ത്തനങ്ങളുടെ 'ലൈവ് ടെലികാസ്റ്റ്' കാണാന്‍ ഇനി സാധിക്കുമെന്ന് വേണമെങ്കില്‍ പറയാം. അതിനു സഹായിക്കുന്ന ഗൈഡ് സ്റ്റാര്‍ എന്ന സാങ്കേതിക സംവിധാനത്തില്‍ പ്രവര്‍ത്തിക്കുന്ന മൈക്രോസ്‌കോപ്പ് വികസിപ്പിച്ചെടുത്തതായി സയന്‍സ് ജേണല്‍ റിപ്പോര്‍ട്ടു ചെയ്തു. ജൈവിക പ്രവര്‍ത്തനങ്ങള്‍ 3ഡി മികവില്‍ ആലേഖനം ചെയ്യുന്നതിന് ഇതു മൂലം സാധിക്കുമെന്നാണ് ശാസ്ത്രജ്ഞര്‍ പറയുന്നത്.
ഹാര്‍വാര്‍ഡ് മെഡിക്കല്‍ കോളേജിലേയും ബോസ്റ്റണ്‍ ചില്‍ഡ്രന്‍സ് ആശുപത്രിയിലേയും ഹോവാര്‍ഡ് ഹ്യൂഗ്‌സ് മെഡിക്കല്‍ ഇന്‍സ്റ്റിറ്റിയൂട്ടിലേയും ശാസ്ത്രജ്ഞരുടെ സംയുക്ത പരിശ്രമഫലമാണ് ഇത് സാധ്യമാക്കിയത്.
അങ്ങനെ ആദ്യമായി കോശത്തിനുള്ളില്‍ നടക്കുന്ന പ്രവര്‍ത്തനങ്ങളെല്ലാം തത്സമയം കാണാന്‍ നമുക്ക് ഇടയായി എന്ന് തോമസ് കിര്‍ച്ച് ഹൗസെന്‍ അഭിപ്രായപ്പെട്ടു.
സീബ്രാഫിഷിന്റെ ഇനത്തില്‍ പെട്ട ഒരു മത്സ്യത്തിനെ സ്‌കാന്‍ ചെയ്തപ്പോള്‍ മത്സ്യത്തിന്റെ ആന്തരിക കര്‍ണ്ണത്തില്‍ നിന്നും നീല ഗ്ലൂക്കോസ് കണികകളെ ആഗിരണം ചെയ്യാനായി പ്രതിരോധ കോശങ്ങള്‍ സഞ്ചാരം നടത്തുന്നതായി കണ്ടുവത്രേ.
കൂടാതെ രക്താണുക്കളിലൂടേയും സുഷുമ്‌നാ നാഡീകോശങ്ങളിലൂടെയും കാന്‍സര്‍ കോശങ്ങള്‍ നിരനിരയായി കടന്നു പോകുന്നതിന്റെ വീഡിയോ ചിത്രങ്ങളും ലഭിക്കുകയുണ്ടായി എന്നും അദ്ദേഹം പറഞ്ഞു. കോശങ്ങള്‍ക്കുള്ളില്‍ ജൈവിക പ്രവര്‍ത്തനങ്ങള്‍ നടക്കുന്നത് ഇത്ര വിശദമായി ഇതിനു മുമ്പ് കണ്ടിട്ടില്ലാത്തതിനാല്‍ ഗവേഷണം ചെയ്തു തുടങ്ങേണ്ടത് എങ്ങനെയാണ് എന്നതിനെ കുറിച്ച് തന്നെ ഒരു ആശയക്കുഴപ്പത്തിലായിരിക്കുകയാണ് ശാസ്ത്ര സംഘം.
ഇവര്‍ പഠനത്തിനുപയോഗിച്ച സീബ്രാഫിഷിന്റെ ചര്‍മ്മം അര്‍ദ്ധതാര്യമായതിനാല്‍ ( സുതാര്യമല്ലെങ്കിലും പ്രകാശ ഭേദ്യമായത്) ജീവനോടെ തന്നെ അവയ്ക്കുള്ളില്‍ നടക്കുന്ന പ്രവര്‍ത്തനങ്ങളെ ദൃശ്യവത്ക്കരിക്കാനാവും. എന്നാല്‍ മറ്റു ജീവജാലങ്ങളുടെ കോശാന്തര പ്രവര്‍ത്തനങ്ങളെ പകര്‍ത്തുന്നത് ഇത്ര സുഗമമല്ല. അവയുടെ കോശങ്ങള്‍ ലോലമായതിനാല്‍ അവയുടെ ബഹുകോശ ഘടനയ്ക്കുള്ളില്‍ നിന്നു കൊണ്ട് അവയിലെ പ്രകാശ സംവേദിയായ വസ്തുക്കളെ പകര്‍ത്താനായാല്‍ മാത്രമേ അവയ്ക്കുള്ളിലെ പ്രവര്‍ത്തനങ്ങളെ എല്ലാ സൂക്ഷ്മ വിവരങ്ങളോടും കൂടി വീക്ഷിക്കാനാവൂ. കോശങ്ങള്‍ക്കു ചുറ്റുമായി കലകളും മറ്റ് ശാരീരിക ഘടകങ്ങളുമൊക്കെയുള്ളതിനാല്‍ കോശത്തെ കാണുക എന്നത് അത്ര എളുപ്പമുള്ള കാര്യമല്ല. ഈ പ്രശ്‌നത്തിന് പരിഹാരമായി, ലാറ്റിസ് ലൈറ്റ്ഷീറ്റ് മൈക്രോസ്‌കോപ്പി സാങ്കേതിക വിദ്യയെ ഒന്നു പരിഷ്‌ക്കരിച്ചെടുക്കുകയാണ് ഗവേഷകര്‍ ചെയ്തത്.
പ്രകാശത്തിന്റെ ഒരു അതിസൂക്ഷ്മഫലകം ഒരു വസ്തുവിനു മുകളില്‍ കൂടി വളരെ വേഗത്തില്‍ ആവര്‍ത്തിച്ച് നീക്കി ആ വസ്തുവിന്റെ പ്രതിബിംബം രൂപപ്പെടുത്തി എടുക്കുന്ന രീതിയാണ് ലാറ്റിസ് ലൈറ്റ് ഷീറ്റ് മൈക്രോസ്‌കോപ്പി. അപ്രകാരം ലഭിക്കുന്ന 2ഡി ഇമേജുകളെ യോജിപ്പിച്ചാണ് 3ഡി ഇമേജുകള്‍ രൂപപ്പെടുത്തി എടുക്കുന്നത്. അഡാപ്റ്റീസ് ഓപ്റ്റിക്‌സ് സാങ്കേതിക വിദ്യയും ഇതില്‍ സമന്വയിപ്പിച്ചിട്ടുണ്ട്. ഒരു മൈക്രോസ്‌കോപ്പ് ശേഖരിക്കുന്ന അപഭ്രംശം വന്ന ഇമേജുകളെ ഒരു ഗൈഡ് സ്റ്റാര്‍ (ഇവിടെ ഉപയോഗിക്കുന്നത് 2 ഫോട്ടോണ്‍ ലേസര്‍) രൂപപ്പെടുത്തുന്ന ഇമേജുകളുമായി അളന്നു നോക്കുകയാണ് അഡാപ്റ്റീവ് ഓപ്റ്റിക്‌സ് ചെയ്യുന്നത്. ഈ താരതമ്യത്തില്‍ അധികരിച്ചാണ് പിന്നീട് യഥാര്‍ത്ഥ ഇമേജ് രൂപപ്പെടുത്തുന്നത്.
ലാറ്റിസ് ലൈറ്റ് ഷീറ്റ് മൈക്രോസ്‌കോപ്പിയും അഡാപ്റ്റീവ് ഓപ്റ്റിസ്‌ക്‌സും സംയോജിപ്പിച്ച് ഉപയോഗിച്ചതിനാലാണ് കോശാന്തര പ്രവര്‍ത്തനങ്ങള്‍ അതീവ വ്യക്തതയോടെ കാണാനായത്.
https://www.facebook.com/Malayalivartha
