ആകാശത്തിലൂടെ സഞ്ചരിക്കാൻ സഹായിക്കുന്നത് വിമാനം എന്ന് നമ്മൾ ചെറിയ ക്ലാസ്സുകളിൽ തന്നെ പഠിച്ചിട്ടുണ്ട്. എന്നാൽ വിമാനം മാത്രമല്ല ടാക്സിയും പറക്കുമെന്നു തിരുത്തി പറയേണ്ടിയിരിക്കുന്നു. പറക്കും ടാക്സി യാഥാർഥ്യമാകാൻ പോകുന്നു. അമേരിക്കന്‍ നഗരങ്ങളിലൂടെ യാത്ര ചെയ്യുന്നതിനു വേണ്ടിയാണ് പറക്കും ടാക്‌സി എന്ന ആശയവുമായി നാസയും ഊബറും കൈകോർക്കുന്നത്.

പറക്കും ടാക്സി, എയര്‍ മൊബിലിറ്റി എന്ന പേരിലാണ് അറിയപ്പെടുക. ലോസ് ഏഞ്ചല്‍സില്‍ നടന്ന ഊബര്‍ എലവേറ്റ് ഉച്ചകോടിയില്‍ പറക്കും കാറുകളുടെ ആദ്യ മാതൃക പ്രദര്‍ശിപ്പിച്ചു. ഡെലിവറി ഡ്രോണ്‍ സംവിധാനവും ഉണ്ട് എന്നതാണ് എയർ മൊബിലിറ്റിയുടെ മാറ്റു കൂട്ടുന്നത്. വിമാനത്താവളത്തിന്റെ മാതൃകയിലുള്ള സ്‌കൈപോര്‍ട്ട് വഴിയാണ് എയർ മൊബിലിറ്റി കയറുന്നത്. റോഡില്‍ നിന്നും 2000 അടി ഉയരത്തിലാണ് എയര്‍ക്രാഫ്റ്റ് പറക്കുക.

ഒരേസമയം നാല് പേര്‍ക്ക് വരെ ഇരിക്കാന്‍ സാധിക്കുന്ന രീതിയിൽ ആണിതിന്റെ നിർമ്മാണം. ഈ കാറുകളുടെ പ്രവർത്തന രീതിയും ഇതിന്റെ സവിശേഷതകളും മനസിലാക്കുവാൻ വേണ്ടി വീഡിയോ പുറത്തിറക്കിയിട്ടുണ്ട്. മണിക്കുറില്‍ 150 മുതല്‍ 200 മൈല്‍ ദൂരം വരെ വേഗത്തില്‍ സഞ്ചരിക്കാന്‍ പറക്കും കാറുകൾക്ക് കഴിയും. സാധാരണ ടാക്സികളിലെപ്പോലെ അല്ല പറക്കും കാറുകളെ നിയന്ത്രിക്കുന്നത് പൈലറ്റ് തന്നെയാണ്. അഞ്ചു വർഷത്തിനുള്ളിൽ ഇത് യാഥാർഥ്യമാകും എന്നാണ് കമ്പനിയുടെ കണക്കുകൂട്ടൽ. നാസയാണ് പറക്കും കാറിനെ കുറിച്ചുള്ള വിവരം പുറത്തു വിട്ടിരിക്കുന്നത്.