വിവാദ സീരിയല്‍ അവസാനിപ്പിച്ച് കേന്ദ്രമന്ത്രി സ്മൃതി ഇറാനി
ഏറെ വിവാദങ്ങള്‍ സൃഷ്ടിച്ച പെഹരെദാര്‍ പിയാ കി എന്ന സീരിയല്‍ നിര്‍ത്തലാക്കാന്‍ മാനവ വിഭവ വകുപ്പ് മന്ത്രി സ്മൃതി ഇറാനി ഉത്തരവിട്ടു. സോണി എന്റര്‍ടെയിന്‍മെന്റ് ടെലിവിഷന്‍ പ്രക്ഷേപണം ചെയ്തു വന്ന ഈ സീരിയല്‍ പത്ത് വയസുകാരനും 18-കാരിയും തമ്മിലുള്ള പ്രണയകഥയാണ് പറഞ്ഞിരുന്നത്.
ഏറെ ചര്‍ച്ചകള്‍ക്കും വിവാദങ്ങള്‍ക്കും ഒടുവിലാണ് കേന്ദ്ര വാര്‍ത്താ വിതരണ മന്ത്രാലയം സീരിയല്‍ നിര്‍ത്തിവയ്ക്കാന്‍ ആവശ്യപ്പെടുന്നത്. ഇന്ത്യന്‍ ടെലിവിഷന്‍ ചരിത്രത്തില്‍ തന്നെ ഇത്തരമൊരു സംഭവം ഒരു പക്ഷേ ഇതാദ്യമായിരിക്കാം. വെള്ളിയാഴ്ചയായിരുന്നു സീരിയലിന്റെ ഒടുവിലത്തെ സംപ്രേക്ഷണം. ഇതിനു മുന്‍പും സീരിയില്‍ നിര്‍ത്താന്‍ സ്മൃതി മുന്നറിയിപ്പ് നല്‍കിയിരുന്നെങ്കിലും ചാനല്‍ കേട്ടില്ല. അതിനാല്‍ ഇത്തവണ നിരവധിപ്പേരുടെ പരാതികള്‍ക്കൊപ്പമായിരുന്നു സ്മൃതിയുടെ ഉത്തരവ്.
ആഴ്ചകള്‍ക്ക് മുന്‍പ്, സീരിയിലിന്റെ പ്രേക്ഷകരില്‍ ഒരു വിഭാഗം സമര്‍പ്പിച്ച പരാതിയിന്‍ മേലാണ് നടപടി കൈക്കൊണ്ടത്. 10 വയസ്സുകാരനായ ബാലന്‍ 18 വയസ്സുകാരിയെ വിവാഹം കഴിക്കുന്നതാണ് സീരിയലിന്റെ ഇതിവൃത്തം. മരണശയ്യയില്‍ കിടക്കുന്ന ബാലന്റെ അച്ഛന് മകന്റെ രക്ഷിതാവായിക്കൊള്ളാം എന്ന് പെണ്‍കുട്ടി വാക്ക് കൊടുക്കുന്നതിന്റെ അടിസ്ഥാനത്തിലാണ് വിവാഹം നടക്കുന്നത്.
പത്ത് വയസ്സ് മാത്രമുള്ള ഒരു കുട്ടി, തന്റെ ഇരട്ടി പ്രായമുള്ള പെണ്‍കുട്ടിയെ തലോടുന്നതും നെറ്റിയില്‍ സിന്ദൂരം തൊട്ട് കൊടുക്കുന്നതും പ്രൈം ടൈം ടെലിവിഷനില്‍ കാണാന്‍ ഞങ്ങള്‍ കുടുംബ പ്രേക്ഷകര്‍ ഇഷ്ടപ്പെടുന്നില്ല. ഇത് ആസ്വാദകമനസ്സില്‍ എന്ത് തരം സ്വാധീനമായിരിക്കും ചെലുത്തുക എന്നൂഹിച്ചു നോക്കാവുന്നതേയുള്ളൂ. ഞങ്ങളുടെ കുട്ടികള്‍ ഇതു കണ്ടു വളരാന്‍ ഞങ്ങള്‍ ആഗ്രഹിക്കുന്നില്ല. അതു കൊണ്ട് ഈ സീരിയല്‍ നിരോധിക്കണം എന്നാണ് സ്മൃതി ഇറാനിയ്ക്ക് പ്രേക്ഷകരിലെ ഒരു വിഭാഗം അയച്ച പെറ്റിഷനില്‍ പറയുന്നത്. എന്നാല്‍ ഇതിനോട് നിര്‍മ്മാതാക്കളായ ശശി മിത്തല്‍, സുമീത് മിത്തല്‍ എന്നിവര്‍ ഇങ്ങനെയാണ് പ്രതികരിച്ചത്...
ഞങ്ങളും യാഥാസ്ഥികര്‍ തന്നെയാണ്. കുടുംബവുമായി കാണാന്‍ പറ്റാത്തതൊന്നും അതില്‍ കാണിച്ചിട്ടില്ല. ഒരു ബാലനും പെണ്‍കുട്ടിയും തമ്മിലുള്ള ഒരു തീവ്രവും സത്യസന്ധവും മധുരവുമായ ഒരു ബന്ധത്തിന്റെ കഥയാണത്. ഇതില്‍ സമൂഹത്തിന് നിരക്കാത്തതായി ഒന്നുമില്ല.
രണ്ടാഴ്ച മുന്‍പാണ് സോണി ടി വിയോട് ഈ സീരിയലിന്റെ സമയം പ്രൈം ടൈമില്‍ നിന്ന് മാറ്റാനും ഇത് ബാല വിവാഹത്തെ ഒരു തരത്തിലും പ്രോത്സാഹിപ്പിക്കുന്നില്ല എന്ന് ഡിസ്‌ക്ലെമര്‍ ചേര്‍ക്കാനും ആവശ്യപ്പെട്ടത്. ചാനല്‍ ആ നിര്‍ദേശം നടപ്പിലാക്കുകയും ചെയ്തിരുന്നു. ഇതിനു പിന്നാലെയാണ് സീരിയല്‍ പൂര്‍ണ്ണമായി നിര്‍ത്തലാക്കണം എന്ന ഉത്തരവ്.
ഈ സീരിയല്‍ തങ്ങളുടെ സംസ്‌ക്കാരത്തെ അവഹേളിക്കുന്നു എന്ന് ചില രാജ കുടുംബങ്ങള്‍ പരാതി പറഞ്ഞതാണ് പെട്ടന്നുള്ള ഈ നടപടിക്കു കാരണം എന്ന് ചാനലുമായി ബന്ധപ്പെട്ട വൃത്തങ്ങള്‍ അറിയിച്ചു. എന്നാല്‍ ഈ വിഷയത്തില്‍ പ്രതികരിക്കാന്‍ ചാനലും സീരിയലിന്റെ അണിയറക്കാരും തയ്യാറായില്ല.
https://www.facebook.com/Malayalivartha
