മാമാങ്കം സിനിമയ്ക്ക് വേണ്ടി ഉണ്ണിമുകുന്ദന്‍ ഏറെ കഷ്ടപ്പെട്ടിരുന്നു. എന്നാല്‍ ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ പുറത്തിറങ്ങിയതോടെ സുഹൃത്തുക്കളും ആരാധകരും താരത്തിന് സമാധാനം കൊടുക്കുന്നില്ല. കിടിലം മേക്ക്ഓവര്‍ ആണെന്ന് പറഞ്ഞിട്ട് എവിടെ? ഇതില്‍ മമ്മൂട്ടിയും വേറൊരുത്തനും ഒരു നരന്ത് ചെക്കനും മാത്രമാണല്ലോ നിറഞ്ഞ് നില്‍ക്കുന്നത്. അത് കേട്ടപ്പോ തന്നെ ഉണ്ണിമുകുന്ദന് സന്തോഷമായി. ഫസ്റ്റ് ലുക്ക് പോസ്റ്ററിന് ബ്രഹ്മാണ്ട വരവേല്‍പ്പാണല്ലോ ലഭിക്കുന്നത്. പക്ഷെ, ചെറിയൊരു വിഷമം ഉണ്ടായി. ഇത്രയും നാള്‍ മാമാങ്കത്തിന് വേണ്ടി മെയ്യും മനസ്സും ഒരുപോലെ നല്‍കി അധ്വാനിച്ചിട്ട് പോസ്റ്റര്‍ ഇറങ്ങിയത് മുതല്‍ ഇതില്‍ 'ഉണ്ണിമുകുന്ദന്‍ എവിടെ' എന്നുള്ള നിരവധി മെസേജുകള്‍ ഫേസ്ബുകിലൂടെയും, ഇന്‍സ്റ്റാന്‍ഗ്രാമിലൂടെയും,വാട്‌സ്ആപ്പിലൂടെയും ലഭിക്കുന്നത് കണ്ടപ്പോള്‍. 

പ്രേക്ഷകര്‍ക്ക് എന്നെ തിരിച്ചറിയാന്‍ പറ്റുന്നില്ലാലോ എന്നുള്ള വിഷമം ഉണ്ടായിരുന്നെന്ന് ഉണ്ണിമുകുന്ദന്‍ ഫെയിസ്ബുക്കില്‍ കറിച്ചു. ബഹുമാനപെട്ട സുഹൃത്തുക്കളെ പോസ്റ്ററിന്റെ നടുക്ക് ആ വാളും പരിചയും ഏന്തി നില്‍ക്കുന്ന ദേഷ്യക്കാരന്‍ ആയ താടിക്കാരന്‍ ഞാനാണ് . ആദ്യമൊക്കെ അല്പം വിഷമം തോന്നിയെങ്കിലും ഞാന്‍ സ്വപ്നം കണ്ട കാര്യം തന്നെയാണല്ലോ കേട്ടു കൊണ്ടിരിക്കുന്നത് എന്ന് മനസ്സിലായതില്‍ സന്തേഷമുണ്ട്. .ചന്ദ്രോത് പണിക്കര്‍ എന്ന ഇതിഹാസ ചരിത്ര വേഷം ലഭിച്ചപ്പോള്‍ അതില്‍ ഉണ്ണി മുകുന്ദന്‍ എന്ന വ്യക്തിയുടെ യാതൊരു സാമ്യതയും ഉണ്ടാവാന്‍ പാടില്ല എന്ന ആഗ്രഹവും വാശിയും എനിക്ക് ഉണ്ടായിരുന്നു.അതിന്റെ ആദ്യ പടി വിജയിച്ചു എന്ന് ഞാനിപ്പോള്‍ വിശ്വസിക്കുന്നു. ഇതൊരു അംഗീകാരം ആയി കാണാന്‍ ആണ് ഞാന്‍ ഉദ്ദേശിക്കുന്നതെന്നും താരം ഫെയിസ്ബുക്കില്‍ കുറിച്ചു.

മിഖായേലിലെ മാര്‍കോ ജൂനിയറില്‍ നിന്നും മാമാങ്കത്തിലെ ചന്ദ്രോത്ത് പണിക്കര്‍ ആയി പരകായപ്രവേശം നടത്താന്‍ എട്ടു മാസത്തോളമായി മാനസികമായും ശാരീരികമായും ഉള്ള തയ്യാറെടുപ്പിലായിരുന്നു ഉണ്ണിമുകുന്ദന്‍. രാത്രിയുള്ള ഷൂട്ടിംഗ് ശാരീരികമായി ഒരുപാട് അസ്വസ്ഥതകള്‍ ഉണ്ടാക്കിയെങ്കിലും അതൊന്നും ചന്ദ്രോത്ത് പണിക്കര്‍ എന്ന കഥാപാത്രത്തിനോടുള്ള ഇഷ്ടത്തിന് കവച്ചുവെക്കുന്നതായിരുന്നില്ല. ഈ പോസ്റ്റില്‍ നിങ്ങള്‍ ഉണ്ണിമുകുന്ദനെ കണ്ടിട്ടില്ല എങ്കില്‍ അത് എന്റെ ആദ്യത്തെ അംഗീകാരമായി ഞാന്‍ കാണുന്നു. ചരിത്ര കഥാപാത്രങ്ങളെ അതിന്റെ പരമോന്നതിയില്‍ എത്തിച്ച മമ്മൂക്ക എന്ന് ഇതിഹാസത്തിന്റെ സാന്നിധ്യവും സഹകരണവും സപ്പോര്‍ട്ടും എന്നെ ഒരുപാട് സഹായിച്ചിട്ടുണ്ട് എന്ന് പറയാതെ വയ്യ എന്നും ഉണ്ണിമുകുന്ദന്‍ പറയുന്നു.

ചന്ദ്രോത്ത് പണിക്കര്‍ എന്ന കഥാപാത്രത്തെ പൂര്‍ണ്ണ വിശ്വാസത്തോടെ എനിക്ക് തന്ന സംവിധായകന്‍ പത്മകുമാറിനും മാമാങ്കത്തിന്റെ പൂര്ണതയ്ക്ക് വേണ്ടി യാതൊരു വിട്ടുവീഴ്ചയും ചെയ്യാത്ത നിര്‍മ്മാതാവ് വേണുവിനും താരം ഹൃദയം നിറഞ്ഞ നന്ദി അറിയിച്ചു. പല കഥാപാത്രങ്ങളും വരുമ്പോഴും അതില്‍ ഉണ്ണിമുകുന്ദന്‍ എവിടെ എന്ന ചോദ്യത്തിനായി വീണ്ടും കാത്തിരിക്കുകയാണെന്നും താരം പറയുന്നു. പഴശ്ശിരാജയ്ക്ക് ശേഷം മമ്മൂട്ടി ചരിത്രകഥാപാത്രമായി എത്തുന്ന മാമാങ്കം മലയാളത്തിന് പുറമേ തമിഴ്, തെലുങ്ക്, കന്നഡ, ഹിന്ദി ഭാഷകളിലും റിലീസ് ചെയ്യും. ഭാരതപ്പുഴയുടെ തീരത്ത് 12 വര്‍ഷത്തിലൊരിക്കല്‍ നടന്നിരുന്ന ഉത്സവമായിരുന്നു മാമാങ്കം. സജീവ് പിള്ള എന്നയാളാണ് ചിത്രത്തിന്റെ തിരക്കഥയും സംവിധാനവും ആദ്യം നിര്‍വഹിച്ചിരുന്നത്. എന്നാല്‍ നിര്‍മാതാവുമായുള്ള അഭിപ്രായവ്യത്യാസത്തെ തുടര്‍ന്ന് സജീവ് പിള്ളയെ ഒഴിവാക്കി എന്നാണ് ആരോപണം. എന്നാല്‍ സിനിമയുടെ എല്ലാ അവകാശവും സജീവ് തനിക്ക് എഴുതി നല്‍കിയെന്നാണ് നിര്‍മാതാവിന്റെ വാദം.