ഹോട്ടലില്നിന്ന് വാങ്ങിയ ഭക്ഷണത്തില് ചത്ത പാറ്റ
ഹോട്ടലില്നിന്ന് വാങ്ങിയ ഭക്ഷണത്തില് ചത്ത പാറ്റയെ കണ്ടെത്തിയതായി പരാതി. പാലക്കാട്ടെ പട്ടാമ്പി ബസ് സ്റ്റാന്ഡ് പരിസരത്തെ കിസ്മത്ത് ഹോട്ടലിനെതിരെയാണ് പരാതി ഉയര്ന്നത്. സംഭവത്തെ തുടര്ന്ന് ഭക്ഷ്യസുരക്ഷാ വകുപ്പിന്റെയും പട്ടാമ്പി നഗരസഭയുടെയും നേതൃത്വത്തില് പരിശോധന നടത്തി.
വള്ളൂര് സ്വദേശി മണികണ്ഠനും കുടുംബവും ഇന്ന് രാവിലെ 8.30ഓടെയാണ് പട്ടാമ്പി ബസ് സ്റ്റാന്ഡ് പരിസരത്തെ ഹോട്ടലിലെത്തിയത്. പൊറോട്ടയും ബീഫ് കറിയും ഓര്ഡര് ചെയ്ത ഇവര്ക്ക് ഭക്ഷണം ലഭിപ്പോഴാണ് ബീഫ് കറിയില് ചത്ത പാറ്റയെ കണ്ടെത്തിയത്. തുടര്ന്ന് മണികണ്ഠന് പാറ്റയടങ്ങിയ ഭക്ഷണവുമായി പട്ടാമ്പി നഗരസഭ അധികൃതരെ സമീപിച്ചു. ആരോഗ്യവിഭാഗം ഉദ്യോഗസ്ഥരും ഹെല്ത്ത് ഇന്സ്പെക്ടറും ഉള്പ്പെടെയുള്ളവര് സ്ഥലത്തെത്തി പരിശോധന നടത്തി.
ഹോട്ടലില് ഭക്ഷണം പാകം ചെയ്യുന്നതും സൂക്ഷിക്കുന്നതും വൃത്തിഹീനമായ സാഹചര്യത്തിലാണെന്ന് പരിശോധനയില് കണ്ടെത്തിയതായി അധികൃതര് അറിയിച്ചു. ഹോട്ടല് ഉടമയ്ക്കെതിരെ നടപടിയെടുക്കാനുള്ള നടപടിക്രമങ്ങള് ആരംഭിച്ചിട്ടുണ്ട്. സംഭവത്തിന് പിന്നാലെ പട്ടാമ്പി ബസ് സ്റ്റാന്ഡ് പരിസരത്തെ മറ്റ് ഹോട്ടലുകളിലും ബേക്കറികളിലും ആരോഗ്യവിഭാഗം ഉദ്യോഗസ്ഥരുടെ നേതൃത്വത്തില് പരിശോധന നടത്തി. ഭക്ഷണം പാകം ചെയ്യുന്നതിലും സൂക്ഷിക്കുന്നതിലും ശുചിത്വ മാനദണ്ഡങ്ങള് പാലിക്കാത്ത സ്ഥാപനങ്ങള്ക്കെതിരെ കര്ശന നടപടി സ്വീകരിക്കുമെന്ന് നഗരസഭ അധികൃതര് അറിയിച്ചു.
https://www.facebook.com/Malayalivartha
