പരിചയമില്ലാത്ത വ്യക്തികളെ പോലും സൈബര് ഇടങ്ങളില് അധിക്ഷേപിക്കുകയും അശ്ലീലം പറയുകയും അതിനെ പൊങ്കാല എന്ന പേരില് ആഘോഷിക്കുകയും ചെയ്യുന്ന മലയാളിയുടെ നവവൈകൃതത്തിന് നേരെ പിടിച്ച കണ്ണാടിയാണ് തമാശ
പരിചയമില്ലാത്ത വ്യക്തികളെ പോലും സൈബര് ഇടങ്ങളില് അധിക്ഷേപിക്കുകയും അശ്ലീലം പറയുകയും അതിനെ പൊങ്കാല എന്ന പേരില് ആഘോഷിക്കുകയും ചെയ്യുന്ന മലയാളിയുടെ നവവൈകൃതത്തിന് നേരെ പിടിച്ച കണ്ണാടിയാണ് നവാഗതനായ അഷ്റഫ് ഹംസ സംവിധാനം ചെയ്ത തമാശ. കാലങ്ങളായി മലയാളി മനസ്സില് കൊണ്ടുനടക്കുന്ന സൗന്ദര്യസങ്കല്പ്പങ്ങളെയും അത് ഉപയോഗിച്ച് മറ്റുള്ളവരുടെ വ്യക്തിത്വത്തെ അറിഞ്ഞും അറിയാതെയും പരിഹസിക്കുകയും ചെയ്യുന്നതിനെയും പൊളിച്ചടുക്കുന്നു. തടി കൂടിയവരെയും തലയില് മുടിയില്ലാത്തവരെയും കറുത്തവരെയും പൊക്കംകുറഞ്ഞവരെയും മോശക്കാരായി കാണുകയും അവരെ കളിയാക്കി ആഹഌദിക്കുകയും ചിലപ്പോള് ഒഴിവാക്കുകയും ചെയ്യുന്ന ശരാശരി കേരളീയന്റെ അവസ്ഥയില് തുടങ്ങി, സമൂഹമാധ്യമങ്ങളിലെ വ്യക്തിഹത്യയിലേക്കും അത് ഉണ്ടാക്കുന്ന ദുരന്തങ്ങളിലേക്കും നമ്മെ കൂട്ടി കൊണ്ട് പോയാണ് ജീവിതം തമാശയല്ലെന്ന സന്ദേശം നല്കി തമാശ അവസാനിക്കുന്നത്.
ശ്രീനിവാസന് 30 വയസുള്ള നല്ലൊരു കോളജ് അധ്യാപകനാണ്. പക്ഷെ, തലയില് മുടിയില്ലാത്തത് അദ്ദേഹത്തിന് വലിയ അപകര്ഷാബോധമായി തോന്നുന്നു. ചുറ്റുപാടും ഉള്ളവരുടെ ഇടപെടലുകളാണ് മുടിയില്ലാത്തത് വലിയ കുറവാണെന്ന തോന്നല് അയാളില് സൃഷ്ടിച്ചത്. വീട്ടുകാരും ശിഷ്യഗണങ്ങളും തുടങ്ങി വിവാഹ ബ്രോക്കര് വരെ അതിലെ കണ്ണികളാണ്. മനസ്സിന്റെ സൗന്ദര്യത്തേക്കാള് വലിയ സൗന്ദര്യം ലോകത്തിതുവരെ ആരും കണ്ടെത്തിയിട്ടില്ലെന്ന സത്യം പലപ്പോഴും നമ്മള് തിരിച്ചറിയുന്നില്ല. അഥവാ അറിയാമെങ്കിലും സൗകര്യപൂര്വ്വം ഒഴിവാക്കും. അല്ലെങ്കില് ഒഴിവാക്കപ്പെടും. അതൊക്കെ നമ്മുടെ മനസ്സില് സൃഷ്ടിക്കുന്ന സങ്കീര്ണ്ണതകളുണ്ട്. അത് മറ്റുള്ളവര്ക്ക് പറഞ്ഞാല് മനസ്സിലാവില്ല. നവാസ് വള്ളിക്കുന്ന് എന്ന നടന് അവതരിപ്പിക്കുന്ന മുജീബ് കറുത്തയാളാണ്. മൂന്ന് വെളുത്ത് തുടുത്ത സുന്ദരന്മാര് അവള്ടെ പിന്നാലെ കൂടിയെങ്കിലും റസിയ മുജീബിനെയാണ് പ്രണയിച്ചത്. അതാണ് മനസ്സിന്റെ രസതന്ത്രം. ആ രസതന്ത്ര പരീക്ഷയില് ശ്രീനിവാസന് പലപ്പോഴും പരാജയപ്പെട്ടുന്നു.
പെണ്ണുകാണലുകള് ശ്രീനിവാസന് ഒരു ഭാരമായി മാറിയതോടെ പാര്ക്കിലാക്കി കൂടിക്കാഴ്ച. മെലിഞ്ഞ ശ്രീനിവാസന് അവിടെയെത്തി കണ്ടതാകട്ടെ തടിച്ച് വെളുത്തൊരു കുട്ടിയെ (ചിന്നു). അതോടെ അയാളിലെ സാധാരണ മലയാളി ഉയര്ന്നെണീറ്റു. ' ഏയ് അത് ശെരിയാവൂലാ, അതൊത്തിരി തടിച്ച പെണ്ണാ' എന്നാണ് അച്ഛനോട് ശ്രീനിവാസന് പറയുന്നത്. കൂടിക്കാഴ്ചയ്ക്ക് മുമ്പ് തന്റെ ഫോട്ടോ ചെക്കന് കൊടുക്കാത്തത് എന്തെന്ന് പറഞ്ഞ് ചിന്നു അമ്മയോട് ദേഷ്യപ്പെടുകയും ചെയ്യുന്നു. ശരീരസൗന്ദര്യം മാത്രം അളന്ന് പരസ്പ്പരം ജീവിക്കാന് തീരുമാനിക്കുന്ന ശരാശരി മലയാളിയുടെ യുക്തിയെ അരിഞ്ഞുവീഴ്ത്താന് ഈ രണ്ട് ഡയലോഗുകള് മതി. പരസ്പ്പരം തിരിച്ചറിഞ്ഞ ശേഷം അതില് നിന്ന് പ്രണയവും ജീവിതവും പടുത്തുയര്ത്തുമ്പോഴാണ് അതിന് ശക്തിയുണ്ടാവുക, സ്നേഹത്തിന്റെ ആ ശക്തിക്ക് മുന്നില് ആരും തോറ്റ് പോകും. മുജീബിന്റെ വീട്ടില് ചെല്ലുമ്പോഴാണ് ശ്രീനിവാസന് അത് തിരിച്ചറിയുന്നത്.
അപ്രതീക്ഷിതമായാണെങ്കിലും ചിന്നുവുമായി ശ്രീനിവാസന് സൗഹൃദം സ്ഥാപിക്കുന്നു. അതിനിടെ ഇരുവരും തമ്മില് എടുക്കുന്ന ഒരു സെല്ഫി, രണ്ട് പേരുമായും യാതൊരു ബന്ധവും ഇല്ലാത്ത ചിലരില് ഉണ്ടാക്കുന്ന അസഹിഷ്ണുത ഇരുവരുടെയും അടുപ്പത്തെ തകര്ക്കുന്നു. അറിഞ്ഞോ, അറിയാതെയോ രസത്തിന് വേണ്ടി നമ്മള് ചെയ്യുന്ന കമന്റുകളും സൃഷ്ടിക്കുന്ന ട്രോളുകളും മറ്റുള്ളവരുടെ മനസ്സിലെ എത്രത്തോളും ആഴത്തില് മുറിപ്പെടുത്തുന്നു, അത് അവരിലും അവര്ക്ക് ചുറ്റുപാടിലും തീര്ക്കുന്ന ആഘാതം എത്രവലുതാണ് എന്നൊക്കെ തിരിച്ചറിയാന് കഴിയുന്നതാണ് അഷ്റഫ് ഹംസയുടെ തമാശ. ശ്രീനാരായണ ഗുരു പറഞ്ഞത് പോലെ 'അവനവനാത്മ സുഖത്തിനാചരിക്കുന്നവയപരന്നു സുഖത്തിനായ് വരേണം'
https://www.facebook.com/Malayalivartha