താരസംഘടനയായ അമ്മയില്‍ അഭിപ്രായഭിന്നത രൂക്ഷം. കെ.ബി ഗണേഷ്‌കുമാറും മുകേഷും അടക്കമുള്ളവരുടെ നിലപാടുകളില്‍ പ്രതിഷേധിച്ച് യുവതാരങ്ങളായ പൃഥിരാജ്, നിവിന്‍പോളി, ഫഹദ് ഫാസില്‍, ഇന്ദ്രജിത്ത് എന്നിവര്‍ ഇന്നലത്തെ ജനറല്‍ ബോഡിയില്‍ പങ്കെടുത്തില്ല. നടി ആക്രമിക്കപ്പെട്ട സംഭവത്തെ തുടര്‍ന്നുള്ള അഭിപ്രായവ്യത്യാസത്തെ തുടര്‍ന്ന് നടി മഞ്ജുവാര്യര്‍ അമ്മയുടെ ഒരു പരിപാടിയുമായും സഹകരിക്കുന്നില്ല. ദിലീപിനെ പുറത്താക്കിയ ശേഷം അമ്മ നടത്തിയ സ്റ്റേജ്‌ഷോയിലും മഞ്ജു പങ്കെടുത്തിരുന്നില്ല. ദിലീപ് പുറത്താണെങ്കിലും സംഘടനയിലെ ഭൂരിപക്ഷം പേരും താരത്തിനൊപ്പമാണ്. മഞ്ജുവുമായി നല്ല അടുപ്പം ഉണ്ടായിരുന്നവര്‍ പോലും ഇക്കാര്യത്തില്‍ നീതിപൂര്‍വമായ നിലപാട് സ്വീകരിച്ചില്ല. മഞ്ജുവിന്റെ രണ്ടാംവരവിന് പലരും ദിലീപിനൊപ്പം നിന്ന് തടയിടുകയും ചെയ്തു. വിമന്‍ ഇന്‍ കളക്ടീവ് സിനിമയ്‌ക്കൊപ്പം നിന്ന് അമ്മയെ സമ്മര്‍ദ്ദത്തിലാക്കരുതെന്ന് ചിലര്‍ മഞ്ജുവിനോട് ആവശ്യപ്പെടുകയും ചെയ്തു. 

യുവതാരങ്ങള്‍ ഷൂട്ടിംഗിന്റെ തിരക്കുള്ളത് കൊണ്ടാണ് എത്താഞ്ഞതെന്നാണ് ജനറല്‍ സെക്രട്ടറി ഇടവേളബാബു നല്‍കുന്ന വിശദീകരണം. എന്നാല്‍ അമ്മ ജനറല്‍ബോഡി നടക്കുന്ന ദിവസം ഷൂട്ടിംഗ് ഒഴിവാക്കേണ്ടതാണെന്ന് നേരത്തെ സര്‍ക്കുലര്‍ ഇറക്കിയിട്ടുണ്ട്. അത് പിന്‍വലിച്ചിട്ടുമില്ല. നടിയെ ആക്രമിച്ച സംഭവത്തില്‍ ദിലീപിനെതിരെ ശക്തമായി നിലപാട് എടുത്തത് പൃഥ്വിരാജാണ്. നടിയെ തന്റെ നായികയാക്കുകയും ചെയ്തു. പൃഥ്വിരാജിന്റെ സമ്മര്‍ദ്ദത്തിന് വഴങ്ങിയാണ് മമ്മൂട്ടി ഉള്‍പ്പെടെ ചേര്‍ന്ന് ദിലീപിനെ പുറത്താക്കുന്ന തീരുമാനം എടുത്തതെന്ന്് ഗണേഷ്‌കുമാര്‍ ആക്ഷേപിച്ചിരുന്നു. ഇതേ തുടര്‍ന്നാണ് ദിലീപ് മമ്മൂട്ടിയുമായി അകന്നതെന്നും അറിയുന്നു. ദിലീപ് ജയിലില്‍ ആകുന്നതിന് മുമ്പ് വരെ മമ്മൂട്ടിയുമായി യാതൊരു പ്രശ്‌നവും ഉണ്ടായിരുന്നില്ല. അതിന് ശേഷമാണ് അകന്നത്. താന്‍ ഭാഗമല്ലാത്ത പ്രശ്‌നങ്ങളില്‍ തന്റെ പേര് വലിച്ചിഴയ്ക്കുന്നതിനെ തുടര്‍ന്നാണ് മമ്മൂട്ടി അമ്മയുടെ നേതൃസ്ഥാനത്തേക്ക് ഇല്ലെന്ന് തീരുമാനിച്ചത്. 

കുഞ്ചാക്കോ ബോബനും നടി ആക്രമിക്കപ്പെട്ടതിനെ തുടര്‍ന്നുണ്ടായ കാര്യങ്ങളില്‍ അഭിപ്രായവ്യത്യാസമുണ്ട്. പക്ഷെ, സംഭവത്തിന്റെ യാഥാര്‍ത്ഥ്യം എന്താണെന്ന് താന്‍ ഉള്‍പ്പെടെ ആര്‍ക്കും ഇതുവരെ വ്യക്തമായിട്ടില്ലെന്നാണ് താരം വ്യക്തമാക്കിയത്. മകന്റെ മാമോദീസയുമായി ബന്ധപ്പെട്ട് തിരക്കുകള്‍ ഉള്ളതിനാലാണ് ജനറല്‍ ബോഡിക്ക് കുഞ്ചാക്കോ എത്താഞ്ഞത്. മഞ്ജുവുമൊത്ത് അഭിനയിക്കുന്നതിന് ദിലീപ് തന്നെ ഭീഷണിപ്പെടുത്തിയെന്ന് കുഞ്ചാക്കോബോബന്‍ അന്വേഷണ സംഘത്തിന് മൊഴി നല്‍കിയിരുന്നു. പക്ഷെ, ഇരുവരും തമ്മില്‍ അഭിപ്രായഭിന്നതകള്‍ ഇല്ലെന്നാണ് അറിയുന്നത്. കുഞ്ചാക്കോബോബന്റെ മകന്റെ മാമോദീസയ്ക്ക് പള്ളിയിലെത്തിയ ഏക ദാരദമ്പതികള്‍ ദിലീപും കാവ്യയുമായിരുന്നു. മകള്‍ ജനിച്ച ശേഷം ഇരുവരും പങ്കെടുക്കുന്ന ആദ്യ ചടങ്ങുമായിരുന്നു ഇത്. 

ദിലീപും ഗണേഷും മുകേഷും അടങ്ങുന്ന അച്ചുതണ്ട് അമ്മയെ നിയന്ത്രിക്കുന്നതില്‍ പൃഥിരാജ് അടക്കമുള്ള യുവതാരങ്ങള്‍ക്ക് കടുത്ത എതിര്‍പ്പുണ്ട്. അതുകൊണ്ടാണ് പലരും അമ്മയുമായി സഹകരിക്കാതെ മാറിനില്‍ക്കുന്നത്. ആഷിഖ് അബു, അമല്‍ നീരദ്, അന്‍വര്‍ റഷീദ് തുടങ്ങിയവരും അമ്മയിലെയും ഫെഫ്കയിലെയും ചിലരും തമ്മിലുള്ള അഭിപ്രായ ഭിന്നതകള്‍ക്ക് ശേഷം അവരുടെ സുഹൃത്തായ ഫഹദ് ഫാസിലും അമ്മയുമായി സഹകരിക്കുന്നില്ല. ഇവരുടെ ഗ്യാംങിലുള്ള വിനായകന്‍ ഇതുവരെ അമ്മയില്‍ അംഗത്വം പോലും എടുത്തിട്ടില്ല. നിവിന്‍ പോളി നിര്‍വാഹക സമിതി അംഗം ആയിട്ട് പോലും ജനറല്‍ ബോഡിയില്‍ പങ്കെടുത്തില്ല. ഭരണഘടനാ ഭേദഗതിയില്‍ അടക്കം യുവതാരങ്ങള്‍ക്ക് വ്യത്യസ്തമായ നിലപാടുണ്ടെന്നാണ് അറിയുന്നത്.