സിനിമാ ചിത്രീകരണസംഘത്തോടൊപ്പം ഹിമാചല്‍ പ്രദേശില്‍ എത്തിയ നടി മഞ്ജു വാരിയരും സംഘവും പ്രളയത്തില്‍ കുടുങ്ങിയെങ്കിലും സുരക്ഷിതരാണെന്ന് ഹിമാചല്‍ പൊലീസ് കമ്മിഷണര്‍ അറിയിച്ചു. ഡല്‍ഹിയിലെ കേരളത്തിന്റെ പ്രത്യേക പ്രതിനിധി എ. സമ്പത്തും ഇക്കാര്യം സ്ഥിരീകരിച്ചു. ഹിമാചല്‍ മുഖ്യമന്ത്രിയുമായും പൊലീസ് കമ്മിഷണറുമായും വിഷയം സംസാരിച്ചുവെന്നും മഞ്ജുവിനും സംഘത്തിനും ഭക്ഷണവും വെള്ളം എത്തിച്ചു നല്‍കിയെന്നും സമ്പത്ത് പറഞ്ഞു. കുടുങ്ങിയവരെ രക്ഷിക്കാന്‍ രക്ഷാപ്രവര്‍ത്തകര്‍ യാത്ര തിരിച്ചു. ഏകദേശം 20 കിലോമീറ്റര്‍ നടന്നു വേണം അവിടെ എത്താന്‍. ഡോക്ടര്‍മാരും രക്ഷാ പ്രവര്‍ത്തസംഘത്തില്‍ ഉണ്ട്. വൈകിട്ടോടെ ഇവരെ സുരക്ഷിത കേന്ദ്രത്തില്‍ എത്തിക്കുമെന്ന് അറിയിച്ചു.

സനല്‍കുമാര്‍ ശശിധരന്റെ 'കയറ്റ'മെന്ന സിനിമയുടെ ചിത്രീകരണത്തിനായി മൂന്നാഴ്ച മുന്‍പാണ് ഇവര്‍ ഹിമാചലിലെത്തിയത്. ഛത്രു എന്ന സ്ഥലത്താണ് ചിത്രീകരണം. കനത്ത മഴയും മണ്ണിടിച്ചിലും മൂലമാണ് നടി മഞ്ജു വാരിയരും സംവിധായകന്‍ സനല്‍ കുമാര്‍ ശശിധരനും അടങ്ങുന്ന സിനിമാ ചിത്രീകരണസംഘം ഹിമാചലില്‍ പ്രളയത്തില്‍ കുടുങ്ങിയത്. ഭക്ഷണമടക്കം കിട്ടാത്ത സാഹചര്യമാണ് നിലവിലുണ്ടായിരുന്നത്. മഞ്ജു വാരിയര്‍ സഹോദരന്‍ മധു വാരിയരെ ഫോണില്‍ അറിയിച്ചതാണിത്.

ഇവര്‍ താമസിക്കുന്ന സ്ഥലത്ത് വിനോദസഞ്ചാരികള്‍ അടക്കം 200 പേര്‍ കുടുങ്ങിയിട്ടുണ്ടെന്ന് മധു വാരിയര്‍ പറഞ്ഞു. രണ്ടു ദിവസത്തേക്കുള്ള ഭക്ഷണം മാത്രമേ അവശേഷിക്കുന്നുള്ളൂ. ഇന്റര്‍നെറ്റ്, ഫോണ്‍ സൗകര്യങ്ങളൊന്നും കൃത്യമായി ലഭിക്കുന്നില്ല. കേന്ദ്രമന്ത്രി വി.മുരളീധരനെ വിവരമറിയിച്ചിട്ടുണ്ടെന്നും മധു പറഞ്ഞു.

ദിവസങ്ങളായി ഹിമാചല്‍പ്രദേശില്‍ കനത്ത മഴ തുടരുകയാണ്. ഇതുവരെ 25 പേരാണ് മരിച്ചത്. അഞ്ഞൂറോളം പേര്‍ പ്രളയ ബാധിത മേഖലകളില്‍ കുടുങ്ങിക്കിടക്കുകയാണ്. 574 കോടി രൂപയുടെ നഷ്ടമുണ്ടായതായി സര്‍ക്കാര്‍ വക്താവ് പറഞ്ഞു. 24 മണിക്കൂര്‍ കൂടി മഴ തുടരുമെന്നാണ് കാലാവസ്ഥാ വകുപ്പിന്റെ പ്രവചനം.