ലൂസിഫറിലെ 'ആ ഡയലോഗ്' പറഞ്ഞു കേള്ക്കണമെന്ന് ആരാധികയ്ക്ക് മോഹം, 'അച്ഛനുണ്ടോ കൂടെ ?' എന്ന് പൃഥ്വിയുടെ ചോദ്യം!
ലൂസിഫറില് ഏറ്റവുമധികം കൈയ്യടി നേടിയ മോഹന്ലാല് ഡയലോഗ് ആണ്, 'ഉപദേശം കൊള്ളാം വര്മ്മ സാറേ പക്ഷേ ചെറിയൊരു പ്രശ്നമുണ്ട് .. തന്റെ തന്തയല്ല എന്റെ തന്ത' എന്നത്. ഇതേ ഡയലോഗ് ചിത്രത്തിന്റെ സംവിധായകനായ പൃഥ്വിയും പല വേദികളില് ഏറ്റുപറഞ്ഞിട്ടുണ്ട്.
പൃഥ്വിയെ നേരിട്ടു കണ്ടപ്പോള് ഒരാരാധികയ്ക്ക് പൃഥ്വി പാടുന്നത് കേള്ക്കണമെന്നായി ആഗ്രഹം. എന്നാല് തന്റെ സിനിമയിലെ പാട്ടുകളുടെ ഒരെണ്ണത്തിന്റെ പോലും വരികള് തനിക്ക് ഹൃദിസ്ഥമല്ലെന്നും പക്ഷേ ഡയലോഗുകള് മുഴുവന് കാണാപാഠമാണെന്നും പൃഥ്വി തന്റെ നിസ്സഹായത വെളിപ്പെടുത്തി. എന്നാല് ലൂസിഫറിലെ പ്രസിദ്ധമായ ആ ഡയലോഗ് പറഞ്ഞുകേള്ക്കണമെന്നായി ആഗ്രഹം. ഉടന് തന്നെ താരത്തിന്റെ മറുപടി വന്നു, 'അച്ഛനുണ്ടോ കൂടെ'. സദസ്സിനെ മൊത്തം പൊട്ടിച്ചിരിപ്പിച്ച ആ മറുപടിയ്ക്കു ശേഷം താരം ആരാധികയുടെ അഭ്യര്ഥന പ്രകാരം ആ ഡയലോഗ് ഏറ്റുപറഞ്ഞു.
കലാഭവന് ഷാജോണ് സംവിധാനം ചെയ്ത ബ്രദേഴ്സ് ഡേ എന്ന ചിത്രത്തിന്റെ പ്രചാരണത്തിന്റെ ഭാഗമായി മനോരമ ഓണ്ലൈനും വിവോയും ചേര്ന്ന് സംഘടിപ്പിച്ച പ്രത്യേക പരിപാടിയിലായിരുന്നു സംഭവം.
അഭിനയിച്ച വേഷങ്ങളില് തന്നെ സ്വാധീനിച്ച കഥാപാത്രങ്ങള് ഒന്നും തന്നെ ഇല്ലെന്നും ആരാധകരുടെ ചോദ്യത്തിന് മറുപടിയായി പറഞ്ഞു. 'ഇന്ന് സിനിമകളൊക്കെ നൂറ് ദിവസം ചിത്രീകരണം ഉണ്ടാകും. സിനിമ ചെയ്ത് തുടങ്ങി രാവിലെ മുതല് വൈകിട്ട് വരെ ആ കഥാപാത്രമായാകും അവിടെ ഇരിക്കുക. അപ്പോള് കുറച്ചൊക്കെ നമ്മളെയും ആ കഥാപാത്രം ആ സമയത്ത് സ്വാധീനിക്കും. എന്നാല് ആ സിനിമ തീരുമ്പോള് ആ കഥാപാത്രം വിട്ടുപോകാന് നമ്മള് തന്നെ മുന്കൈ എടുക്കും.'
'എനിക്ക് നന്നായി അറിയാം, ലൂസിഫര് പകുതി ഷൂട്ട് കഴിഞ്ഞപ്പോള് തന്നെ ലാലേട്ടന് സ്റ്റീഫന് നെടുമ്പള്ളിയായി മാറിക്കഴിഞ്ഞു. അദ്ദേഹം രാവിലെ സെറ്റില് വരുമ്പോള് തന്നെ സ്റ്റീഫനാണ്. എന്നാല് ഇപ്പോള് ബിഗ് ബ്രദര് ഷൂട്ടിനിടയില് കാണുമ്പോള് ഞാന് കണ്ട ലാലേട്ടനേ അല്ല അത്. ഇത് എല്ലാവര്ക്കും സംഭവിക്കും.'-പൃഥ്വി പറഞ്ഞു.
https://www.facebook.com/Malayalivartha
