ഉപജീവനവും നിലനില്പ്പും നഷ്ടപ്പെട്ട് സിനിമാ പ്രവര്ത്തകര്... കൊവിഡ് രണ്ടാം തരംഗത്തില് സിനിമാ മേഖല തകരുന്നു; ബിഗ് ബജറ്റ് ചിത്രങ്ങള് ഇനി മലയാള സിനിമയില് ഉണ്ടാകില്ലേ
കൊവിഡിന്റെ തുടക്കം മുതല് സിനിമാ മേഖല നേരിടുന്നത് വലിയ പ്രതിസന്ധിയാണ്. രണ്ടാം തരംഗം രൂക്ഷമായപ്പോള് ഇനി എന്തെന്ന് അറിയാതെ വലയുകയാണ് ഈ മേഖലയില് പ്രവര്ത്തിക്കുന്നവര്. പ്രമുഖരായ രണ്ട് സംവിധായകരുടെ ബിഗ് ബജറ്റ് സിനിമയാണ് ഇപ്പോള് തുടര്ന്ന് ചിത്രീകരണം നിര്ത്തിവച്ചത്. ജോഷി സംവിധാനം ചെയ്യുന്ന സുരേഷ് ഗോപി ചിത്രം 'പാപ്പന്' ഈരാറ്റുപേട്ടയിലും, ഷാജി കൈലാസ് സംവിധാനം ചെയ്യുന്ന പൃഥ്വിരാജ്, വിവേക് ഒബ്റോയി ചിത്രം 'കടുവ' കുട്ടിക്കലും നടന്നുവരികയായിരുന്നു. രണ്ട് ചിത്രത്തിലും കുടി 300ല് അധികം തൊഴിലാളികള് ജോലി എടുത്തിരുന്നു. ഇവയുടെ ചിത്രീകരണം നിര്ത്തിയതോടെ കൊവിഡ് പ്രതിസന്ധി എന്നുതീരും എന്ന ആശങ്കയിലാണ് തൊഴിലാളികള്.
കൊവിഡ് പ്രതിസന്ധിയില് ചിത്രീകരണം മുടങ്ങിയതോടെ സിനിമാ മേഖലയിലെ തൊഴിലാളികള് കടുത്ത ദുരിതത്തിലേക്ക് നീങ്ങുകയാണ്. തിയേറ്റര് തൊഴിലാളികള്, ജൂനിയര് ആര്ട്ടിസ്റ്റുകള് മറ്റുള്ള സിനിമ തൊഴിലില് പ്രവര്ത്തിക്കുന്നവരടക്കമുള്ളവര് ജീവിതം തള്ളിനീക്കാന് കഷ്ടപ്പെടുകയാണ്. സിനിമ മേഖലയിലെ ദിവസ വേതനക്കാരുടെ കാര്യവും കഷ്ടത്തിലാണ്. മരുന്നിനും വീട്ടുവാടകയ്ക്കും പോലും അവര്ക്ക് പണമില്ലാത്ത അവസ്ഥയാണ്.
സാമ്പത്തിക പ്രതിസന്ധിയിലായ തൊഴിലാളികളെ സഹായിക്കാന് സര്ക്കാര് നടപടിയെടുക്കണമെന്നാണ് ആവശ്യവുമായി സംഘടനകള് രംഗത്ത് വരുകയാണ്. ഒരുപാട് പ്രതീക്ഷകളോടെയാണ് മലയാള സിനിമ 2021ലേക്ക് കയറിയത്. കൊവിഡ് സാഹചര്യം കണക്കിലെടുത്ത് ആദ്യം അടച്ചത് തിയേറ്ററുകളാണ്. പ്രതിസന്ധിഘട്ടം തരണം ചെയ്ത് മുന്നോട്ടു വന്നാലും ഏറ്റവും ഒടുവിലായിരിക്കും തിയേറ്ററുകള് തുറക്കുക. കാരണം സിനിമയെന്നത് സാധാരണക്കാരനോ സര്ക്കാരിനോ ഒരവശ്യ സര്വീസ് അല്ല എന്നതു തന്നെയാണ്.
സാധാരണക്കാര്ക്ക് സിനിമ വെറും വിനോദ ഉപാധിയാണ്. എന്നാല് സിനിമ ജീവിതമാര്ഗമാക്കിയ ലക്ഷക്കണക്കിന് പേരുണ്ട്. അവരുടെ ഉപജീവനവും നിലനില്പ്പുമെല്ലാം സിനിമയാണ്. പ്രീ-പ്രൊഡക്ഷനില് തുടങ്ങി ഷൂട്ടിങ്ങും പോസ്റ്റ് പ്രൊഡക്ഷനും തിയെറ്റര് റിലീസും ഡിജിറ്റല്, സാറ്റലൈറ്റ് റിലീസുകളും വരെ നീളുന്ന ചങ്ങല മുറിയുമ്പോള് തകരുന്നത് ആയിരക്കണക്കിന് കുടുംബങ്ങളുടെ ജീവിതമാണ്. അഭിനേതാക്കള്, നിര്മ്മാതാക്കള്, സംവിധായകര്, എഴുത്തുകാര്, സാങ്കേതിക പ്രവര്ത്തകര് തുടങ്ങി തിയേറ്ററിലേക്ക് ടിക്കറ്റ് കീറി കാണികളെ കയറ്റി വിടുന്നവരുടെ വരെ അന്നം സിനിമയാണ്.
വര്ക്ക് ഫ്രം ഹോം ഒരിക്കലും സിനിമയില് നടക്കില്ല. ഇപ്പോഴത്തെ അവസ്ഥയില് സിനിമയില് ആകെ ചെയ്യാന് പറ്റുന്നത് രണ്ടു കാര്യങ്ങളാണ്. ഒന്ന് എഴുത്ത്. മറ്റൊന്ന് സംഗീത സംവിധാനം. ഇതൊഴികെ മറ്റൊന്നും ഒറ്റയ്ക്കു സാധ്യമല്ല. അഡ്വാന്സ് വാങ്ങിയ എഴുത്തുകാര്ക്ക് ഇതു നല്ല സമയമാണ്. എഴുതാനുള്ള സമയം ആവോളമുണ്ട്. സംഗീത സംവിധായകര്ക്കും പുതിയ ഈണങ്ങള് പരീക്ഷിക്കാം. അല്ലാത്തവര്ക്ക് ഒന്നും ചെയ്യാനുണ്ടാകില്ല. തിയേറ്ററുകള് ഇങ്ങനെ കുറച്ചു നാളുകള് കൂടി അടഞ്ഞു കിടന്നാല് ഞങ്ങള്ക്ക് ആത്മഹത്യയേ പോംവഴിയുള്ളുവെന്നാണ് ഒരു പ്രമുഖ നിര്മ്മാതാവ് പറയുന്നത്.
https://www.facebook.com/Malayalivartha
