വിമര്ശിക്കുന്നവര് വിമര്ശിച്ചോട്ടെ... ചുരുളി സിനിമ കാരണം ലാഭമുണ്ടായത് ഹെഡ്സെറ്റ് കമ്പനിക്കാര്ക്കെന്ന് ജാഫര് ഇടുക്കി; സിനിമ കണ്ട് ചിത്രത്തില് നിയമപരമായ പ്രശ്നങ്ങള് ഉണ്ടോയെന്ന് പരിശോധിച്ച് റിപ്പോര്ട്ട് നല്കാന് ഡി.ജി.പിക്ക് നിര്ദ്ദേശം നല്കി ഹൈക്കോടതി
ചുരുളി എന്ന സിനിമ കാരണം ഹെഡ്സെറ്റ് കമ്പനിക്കാര്ക്ക് ലാഭം ഉണ്ടായെന്ന് ജാഫര് ഇടുക്കി. തന്റെ അറിവില് ഇരുപത്തിയഞ്ച് കോടി ഹെഡ്സെറ്റ് ചെലവായെന്നും അവര്ക്ക് നന്ദിയുണ്ടെന്നും ജാഫര് പറഞ്ഞു. റിപ്പോര്ട്ടര് ടി.വിയോടായിരുന്നു ജാഫറിന്റെ പ്രതികരണം.
'എന്റെ അറിവില് ഒരു പത്തിരുപത്തിയഞ്ച് കോടി ഹെഡ്സെറ്റ് ചെലവായിട്ടുണ്ട്. ഒരു വീട്ടില് അച്ഛന് അമ്മ മകന് മകള് കല്യാണം കഴിച്ച് വിട്ട പെണ്കുട്ടി, ഇത്രയും പേര് ഉണ്ടെന്ന് വിചാരിക്ക്. ഇവര് ഒരു ഹെഡ്സെറ്റല്ല ഉപയോഗിക്കുന്നത്. അഞ്ച് ഹെഡ്സെറ്റാണ് ഉപയോഗിക്കുന്നത്. അച്ഛനും അമ്മേം ചിലപ്പോള് ഒരു ഹെഡ്സെറ്റ് വെച്ച് ഒന്നിച്ചിരുന്ന് കാണുമായിരിക്കും.
കല്ല്യാണം കഴിച്ച് മകളും ഭര്ത്താവും ഒന്നിച്ച് കാണും. പക്ഷേ കല്യാണം കഴിക്കാത്ത മകന് വന്ന് ഹെഡ്സെറ്റ് ചോദിച്ചാല് അച്ഛന് കൊടുക്കില്ല. നിനക്ക് മറ്റേ പടം കാണാനല്ലേ എന്ന് പറയും. അപ്പോള് എല്ലാരും ഹെഡ്സെറ്റ് മേടിക്കും. ചുരുളി സിനിമ കൊണ്ട് ഹെഡ്സെറ്റ് കമ്പനിക്കാര് ഭയങ്കരമായി വിജയിച്ചു. അവരോടും വിമര്ശിക്കുന്നവരോടുമെല്ലാം നന്ദി. വിമര്ശിക്കുന്നവര് വിമര്ശിച്ചോട്ടെ. പക്ഷേ പഠിച്ചിട്ട് വിമര്ശിക്കണം,' ജാഫര് ഇടുക്കി പറഞ്ഞു.
ലിജോ ജോസ് പെല്ലിശ്ശേരിയുടെ ചുരുളി റിലീസ് ചെയ്തതിന് പിന്നാലെ ചിത്രത്തിലെ തെറിവിളിക്കെതിരെ വിമര്ശനമുയര്ന്നിരുന്നു. ചിത്രത്തെ അനുകൂലിച്ചും പ്രതികൂലിച്ചും ചേരിതിരിഞ്ഞ് തര്ക്കങ്ങള് രൂപപ്പെട്ടു. ചെമ്പന് വിനോദ് ജോസ്, വിനയ് ഫോര്ട്ട്, ജാഫര് ഇടുക്കി എന്നിവരെ കേന്ദ്ര കഥാപാത്രങ്ങളാക്കിയാണ് ലിജോ ജോസ് പെല്ലിശ്ശേരി ചുരുളി സംവിധാനം ചെയ്തത്.
അതേസമയം ചുരുളി സിനിമയുടെ പ്രദര്ശനം തടയണമെന്ന ഹര്ജിയില് ഡി.ജി.പിയെ കക്ഷി ചേര്ത്ത് ഹൈക്കോടതി. സിനിമ കണ്ട് ചിത്രത്തില് നിയമപരമായ പ്രശ്നങ്ങള് ഉണ്ടോയെന്ന് പരിശോധിച്ച് റിപ്പോര്ട്ട് നല്കാനാണ് ഹൈക്കോടതി നിര്ദ്ദേശം നല്കിയിരിക്കുന്നത്.
ചുരുളി പൊതു ധാര്മ്മികതയ്ക്ക് നിരക്കാത്തതാണെന്നും സിനിമ ഒ.ടി.ടിയില് നിന്നടക്കം നീക്കം ചെയ്യണമെന്നും ആവശ്യപ്പെട്ട് തൃശൂര് കോലഴി സ്വദേശിനിയായ അഭിഭാഷക പെഗ്ഗിഫെന് സമര്പ്പിച്ച ഹര്ജിയിലാണ് കോടതിയുടെ നടപടി. ജസ്റ്റിസ് പി.വി.കുഞ്ഞികൃഷ്ണന് ആണ് ഹര്ജി പരിഗണിച്ചത്. സിനിമ പ്രഥമദൃഷ്ട്യാ നിയമലംഘനം നടത്തുന്നതായി തോന്നുന്നില്ലെന്നും കോടതി പറഞ്ഞു. സിനിമ സംവിധായകന്റെ സൃഷ്ടിയാണ്.
സംവിധായകന് കലാപരമായ സ്വാതന്ത്ര്യമുണ്ട്. ആവിഷ്കാരസ്വാതന്ത്ര്യം ഭരണഘടനാ അവകാശമാണെന്നും ഹര്ജി പരിശോധിക്കുമ്പോള് ഇക്കാര്യം പരിഗണിക്കാതിരിക്കാനാവില്ലെന്നും കോടതി വ്യക്തമാക്കി. നേരത്തെ സിനിമയുടെ സംവിധായകന് ലിജോ ജോസ് പെല്ലിശേരിക്കും നടന് ജോജു ജോര്ജിനും ഹൈക്കോടതി നോട്ടീസ് അയച്ചിരുന്നു.. കേന്ദ്ര സെന്സര് ബോര്ഡിനും ഹൈക്കോടതി നോട്ടീസ് നല്കിയിരുന്നു.
സര്ട്ടിഫൈ ചെയ്ത കോപ്പിയല്ല ഒ.ടി.ടി യില് വന്നതെന്ന് സെന്സര് ബോര്ഡ് കോടതിയെ അറിയിച്ചിരുന്നു. സിനിമാറ്റോഗ്രാഫ് ആക്ട് 1952, സര്ട്ടിഫിക്കേഷന് റൂള്സ് 1983 കേന്ദ്ര സര്ക്കാര് മാര്ഗ നിര്ദേശങ്ങള് ഇവ പ്രകാരം സിനിമയില് അവശ്യമായ മാറ്റങ്ങള് നിര്ദ്ദേശിച്ച് എ സര്ട്ടിഫിക്കറ്റാണ് 'ചുരുളി'ക്കു നല്കിയതെന്നും എന്നാല് ഈ മാറ്റങ്ങള് ഇല്ലാതെയാണ് സിനിമ ഒ.ടി.ടിയിലൂടെ പുറത്തു വന്നിരിക്കുന്നതെന്നും വ്യക്തമാക്കി നേരത്തെ തന്നെ സെന്സര് ബോര്ഡ് രംഗത്തെത്തിയിരുന്നു. ലിജോ പെല്ലിശ്ശേരീസ് മൂവി മൊണാസ്ട്രിയും ചെമ്പോസ്കിയും ഒപസ് പെന്റയും ചേര്ന്നാണ് ചുരുളി നിര്മ്മിച്ചത്.
https://www.facebook.com/Malayalivartha