കുടുംബവിളക്ക് എന്ന സീരിയലിലൂടെ പ്രേക്ഷകര്‍ക്ക് പരിചിതനായ നടനാണ് ആനന്ദ് നാരായണന്‍. സീരിയലിന് പുറമെ ആനന്ദിന് ആരാധകരെ നേടിക്കടുത്തത് യൂട്യൂബ് ചാനലാണ്. ചെറുപ്പക്കാരായ ആരാധകര്‍ ഇപ്പോള്‍ തന്നെ തിരിച്ചറിയുന്നത് യൂട്യൂബിലൂടെയാണെന്നാണ് ആനന്ദ് പറയുന്നത്.

ഇപ്പോഴിതാ യൂട്യൂബില്‍ നിന്നും കിട്ടിയ വരുമാനം കൊണ്ട് ഭാര്യയ്ക്ക് ഒരു സമ്മാനം വാങ്ങി നല്‍കിയിരിയ്ക്കുകയാണ് ആനന്ദ്. ചെറുതൊന്നുമല്ല, ഒരു വലിയ സമ്മാനം. വര്‍ഷങ്ങള്‍ക്ക് മുന്‍പ് കൊടുത്ത വാക്ക് പാലിക്കുകക കൂടെയായിരുന്നു നടന്‍.

പ്രേമിയ്ക്കുന്ന കാലത്ത് പരസ്പരം സംസാരിക്കുന്നതിനായി ഭാര്യ മിനിയ്ക്ക് ഒരു ഫോണ്‍ വാങ്ങി കൊടുത്തിരുന്നു. ആയിരം രൂപയില്‍ താഴെ മാത്രം ചെലവായ ആ ഫോണില്‍ വിളിക്കാനല്ലാതെ മറ്റൊന്നിനും പറ്റുമായിരുന്നില്ല. അന്ന് വാട്‌സ് ആപ്പ് ഒന്നും ഇല്ലായിരുന്നുവെങ്കിലും, ഫേസ്ബുക്ക് ഉപയോഗിക്കാനുള്ള സൗകര്യമെങ്കിലും ചില ഫോണുകളില്‍ ഉണ്ടായിരുന്നു.

പക്ഷെ അതിനും പറ്റാത്ത ഒരു ഫോണാണ് ഞാന്‍ അന്ന് വാങ്ങി കൊടുത്തിരുന്നത്. അന്ന് പറഞ്ഞ വാക്കാണ്, എന്റെ കൈയ്യില്‍ കാശ് വരുമ്പോള്‍ നിനക്ക് നല്ലൊരു ഫോണ്‍ വാങ്ങി തരും എന്ന്.

കല്യാണം കഴിഞ്ഞ് ഇത്രയും വര്‍ഷമായി, പിള്ളേരും ആയ ശേഷം ഭാര്യയ്ക്ക് അന്ന് കൊടുത്ത വാക്ക് പാലിച്ചിരിയ്ക്കുകയാണ് ആനന്ദ് നാരായണന്‍. സാംസങ് ഗാലക്‌സി ഇന്ത്യയില്‍ ഇറക്കിയിരിയ്ക്കുന്ന ഏറ്റവും ലേറ്റസ്റ്റും ഏറ്റവും വില കൂടിയതുമായ ഫോണ്‍ ആണ് മിനിക്ക് ആനന്ദ് സമ്മാനമായി നല്‍കിയത്. സാംസങ് ഗാലക്‌സി എസ് 22 അള്‍ട്ര മോഡല്‍ ഫോണിന് ഒരുലക്ഷത്തി പതിനായിരം രൂപയാണ് വില. ആ വിലയ്ക്ക് ഉള്ള ഗുണങ്ങളും ഫോണിന് ഉണ്ട് എന്ന് ആനന്ദ് നാരായണന്‍ പറയുന്നു.

യൂട്യൂബ് വരുമാനത്തില്‍ നിന്നുമാണ് ഈ സമ്മാനം ഭാര്യയ്ക്ക് നല്‍കിയത് എന്ന് ആനന്ദ് പ്രത്യേകം പറയുന്നുണ്ട്. കുടുംബത്തിനൊപ്പമാണ് യൂട്യൂബ് ചാനല്‍ തുടങ്ങിയത് എങ്കിലും ഫാമിലി റിലേറ്റഡ് കണ്ടന്റുകള്‍ ഇടയ്ക്കിടെ മാത്രമേ നടന്‍ പങ്കുവയ്ക്കാറുള്ളൂ. കൂടുതലും സീരിയല്‍ ലോകത്തെ സെലിബ്രിറ്റികളുമായുള്ള ചാറ്റ് ഷോകളാണ് ആനന്ദിന്റെ യൂട്യൂബ് ചാനലില്‍ വരുന്നത്. അതുകൊണ്ട് തന്നെ വളരെ പെട്ടന്ന് തന്നെ ഹിറ്റ് ആവാന്‍ ആനന്ദിന് സാധിച്ചു.

അനിരുദ്ധ് എന്ന കഥാപാത്രത്തെയാണ് കുടുംബ വിളക്ക് എന്ന സീരിയലില്‍ ആനന്ദ് നാരായണന്‍ അവതരിപ്പിയ്ക്കുന്നത്. കേന്ദ്ര കഥാപാത്രമായ സുമിത്രയുടെ മൂത്ത മകനാണ്. തുടക്കത്തില്‍ അല്പം നെഗറ്റീവ് ഷേഡുള്ള കഥാപാത്രം ആയിരുന്നുവെങ്കിലും ഇപ്പോള്‍ അനി സുമിത്രയെ പിന്തുണയ്ക്കുന്ന ഉത്തമപുത്രനാണ്. സീരിയല്‍ വിജയരമായി മുന്നോട്ട് പോകുന്നതിന് ഇടയിലാണ് നടന്‍ യൂട്യൂബ് ചാനല്‍ ആരംഭിച്ചത്.