നവ്യാ നായരുടെ മുന്നില്‍ വച്ച് നടന്‍ വിനായകന്റെ വിവാദ പരാമര്‍ശത്തിനെതിരെ നവ്യ പ്രതികരിച്ചില്ലെന്നതിൽ സോഷ്യല്‍ മീഡിയയില്‍ വിമര്‍ശനം ഉയര്‍ന്നിരുന്നു. അന്നത്തെ ദിവസം നടന്ന സംഭവങ്ങള്‍ക്ക് ക്ഷമ ചോദിച്ചാല്‍ പ്രശ്നം തീരുമെങ്കില്‍ താന്‍ അതിന് തയ്യാറാണെന്ന് വ്യക്തമാക്കിയിരിക്കുകയാണ് നവ്യയിപ്പോള്‍.

വിനായകന്റെ മീ ടൂ പരാമര്‍ശം തെറ്റായിപ്പോയി. വിവാദ പരാമര്‍ശങ്ങള്‍ ബുദ്ധിമുട്ടുണ്ടാക്കിയെന്നും താനും ക്രൂശിക്കപ്പെട്ടുവെന്നും നടി പറയുന്നു. ഒരു പുരുഷന്‍ പറഞ്ഞതിന് സ്ത്രീയേയാണ് ക്രൂശിക്കുന്നതെന്നും താരം കൂട്ടിച്ചേര്‍ത്തു.'അന്നുണ്ടായ മുഴുവന്‍ സംഭവത്തിനും ഞാന്‍ ക്ഷമ ചോദിച്ചാല്‍ പ്രശ്നം തീരുമെങ്കില്‍ എല്ലാവരോടും പൂര്‍ണമനസോടെ ക്ഷമ ചോദിക്കുന്നു.

പിന്നെ നിങ്ങള്‍ മനസിലാക്കേണ്ട ഒരു കാര്യമെന്താണെന്നറിയോ, അവിടെ നടന്നത് ഒരു പുരുഷന്റെ പരാമര്‍ശമാണെങ്കിലും ഇപ്പോഴും ക്രൂശിക്കപ്പെട്ടുകൊണ്ടിരിക്കുന്നത് മറ്റൊരു സ്ത്രീയാണ്. അവിടെ എത്ര പുരുഷന്മാരുണ്ടായിരുന്നു, നിങ്ങളെല്ലാം ചോദ്യം ചോദിക്കുന്നത് എന്റെയടുത്താണ്.

ഞാന്‍ ഇവിടെ വന്നിരിക്കുന്നത് ഒരുത്തീ എന്ന സിനിമ ഒരുപാട് കുടുംബ സ്ത്രീ പ്രവര്‍ത്തകര്‍ കാണാന്‍ വരുന്നുണ്ട്. ഈ സിനിമയാണ് ഞങ്ങളുടെ ടീമിനും പറയാനുള്ള സന്ദേശം. സ്ത്രീകളുടെ ശക്തിയാണ് സിനിമയില്‍ പറയുന്നത്. ഒരു സ്ത്രീ പ്രതികരണ ശേഷിയിലേക്ക് എങ്ങനെ എത്തുന്നുവെന്നാണ് സിനിമയിലൂടെ കാണുക്കുന്നത്. പത്ത് കൊല്ലത്തിന് ശേഷമാണ് ഞാന്‍ സിനിമയിലേക്ക് വരുന്നത്.

ഇതിന്റെയൊരു സന്തോഷം ആഘോഷിക്കാന്‍ ദയവ് ചെയ്ത് സമ്മതിക്കണം. കൂടുതല്‍ ചോദ്യങ്ങള്‍ ചോദിച്ച്‌ എന്നെ ബുദ്ധിമുട്ടിക്കരുത് എന്നാണ് താരം പറഞ്ഞത്. 'ഒരുത്തീ' സിനിമയുടെ പ്രസ് മീറ്റിനിടെ മീ ടൂ ആരോപണവുമായി ബന്ധപ്പെട്ടുള്ള നടന്‍ വിനായകന്റെ പരാമര്‍ശത്തിനെതിരെ സിനിമയ്ക്കകത്തുനിന്നും പുറത്തുനിന്നും രൂക്ഷവിമര്‍ശനമുയര്‍ന്നിരുന്നു.