മലയാളികളുടെ എക്കാലത്തെയും നിത്യഹരിത നായകനാണ് പത്മശ്രീ പ്രേം നസീർ. ഇദ്ദേഹത്തിന്റെ വീടായ ലൈല കോട്ടേജ് വിൽപ്പനയ്ക്ക് വച്ചിരിക്കുകയാണ്. ചിറയിൻകീഴ് പുളിമൂട് ജംഗ്ഷന് സമീപം കോരാണി റോഡിലാണ് ഈ വീട് സ്ഥിതിചെയ്യുന്നത്. അദ്ദേഹത്തിന്റെ ഓർമകളുടെ ഏക അവശേഷിപ്പ് കൂടിയാണ് ഈ വീട്. ഈ ലോകത്ത് നിന്ന് പ്രേം നസീർ വിട പറഞ്ഞ് 30 വർഷമായിട്ടും അദ്ദേഹത്തിന്റെ ഓർമകൾ നിറഞ്ഞ് നിൽക്കുന്ന ലൈല കോട്ടേജ് കാണാൻ നിരവധി സിനിമാ പ്രേമികൾ ഇന്നും എത്താറുണ്ട്.

സ്വത്ത് ഭാഗം വയ്പ്പിലൂടെ വീട് ലഭിച്ചത് നസീറിന്റെ ഇളയ മകളായ റീത്തയ്ക്കാണ്. പിന്നീട് റീത്ത തന്റെ മകൾക്ക് വീട് കൈമാറുകയുണ്ടായി. കുടുംബസമേതം അമേരിക്കയിൽ താമസിക്കുന്ന ഇവർക്ക് വീട് നിലനിർത്താൻ താൽപ്പര്യമില്ല. ഇതിനാലാണ് ഇപ്പോൾ വിൽപ്പനയ്ക്ക് വച്ചിരിക്കുന്നത്. മലയാള സിനിമയുടെ തന്നെ നിത്യഹരിത നായകന്റെ ലൈല കോട്ടേജ് സർക്കാർ വിലയ്ക്ക് വാങ്ങി സ്മാരകം ആക്കണമെന്നാണ് നാട്ടുകാരുടെയും സാംസ്കാരിക പ്രവർത്തകരുടെയും ഏക ആവശ്യം.

അതേസമയം 60വർഷത്തോളം പഴക്കമുള്ള വീടാണെങ്കിലും കോൺക്രീറ്റിനോ ചുമരുകൾക്കോ യാതൊരു കേടുപാടുകളും സംഭവിച്ചിട്ടില്ല എന്നതാണ് ഇതിന്റെ പ്രത്യേകത. എന്നാൽ തങ്ങളുടെ പ്രിയ നടന്റെ വീട് കാണാൻ എത്തുന്ന സിനിമാ പ്രേമികൾ കാണുന്നത് വീട് കാടുപിടിച്ച് നശിക്കുന്ന കാഴ്ചയാണ്. ആരാധകർക്ക് മാത്രമല്ല നിരവധി സിനിമാ താരങ്ങൾക്കും ഒരുപാട് പ്രിയപ്പെട്ട ഓർമകൾ സമ്മാനിച്ചതാണ് പ്രേം നസീറിന്റെ ഈ വീട്.