വിവാഹശേഷം അഭിനയ ജീവിതത്തിൽ നിന്നും ഒരു ഇടവേള എടുത്തിരിക്കുകയാണ് നസ്രിയ നസീം. നസ്രിയ നായികയായി തിളങ്ങിയ മിക്ക സിനിമകളും ഹിറ്റായിരുന്നു. മലയാളവും തമിഴും കടന്ന് തെലുങ്കിലും നടി നായികയായിരിക്കുകയാണ്. അണ്ടെ സുന്ദരനികി എന്ന സിനിമയിലൂടെയാണ് തെലുങ്കിൽ നായികയായെത്തുന്നത്.

ഈച്ച സിനിമയിലെ നായകൻ നാനിയാണ് നസ്രിയയുടെ നായകനായെത്തുന്നത്. കഴിഞ്ഞ ദിവസം സിനിമയുടെ ടീസർ പുറത്തിറങ്ങി. നല്ല രീതിയിലുള്ള പ്രതികരണമാണ് ടീസറിന് ലഭിക്കുന്നത്. ടീസർ പുറത്ത് വിടും മുന്നേ അണിയറപ്രവർത്തകർ ചേർന്ന് പ്രത്യേക പരിപാടികളും സംഘടിപ്പിക്കുകയുണ്ടായി. നസ്രിയയെ തന്റെ സിനിമയുടെ ഭാ​ഗമാക്കിയ കാര്യം നാനി വെളിപ്പെടുത്തി.

പലരും ശ്രമിച്ചിട്ട് നടക്കാത്ത കാര്യമാണ് ഞങ്ങൾ സാധിച്ച് എടുത്തത്. നസ്രിയയെ തെലുങ്കിലേക്ക് കൊണ്ടുവരാൻ പലരും ശ്രമിച്ചു. അവൾ ആരുടെയും ഫോൺകോൾ പോലും എടുത്തില്ല. ഞങ്ങളുടെ സിനിമ മാത്രമാണ് അവൾ സ്വീകരിച്ചതെന്നും നാനി പറഞ്ഞു. സിനിമയക്ക് വേണ്ടി ടീം നടത്തിയ ഹാർഡ് വർക്ക് സിനിമ കാണുമ്പോൾ മനസിലാകും.

വിവേകിന്റെ ചിത്രങ്ങൾ ചെയ്യാൻ മറ്റൊരു സംവിധായകനും കഴിയില്ല. ട്രെയിലറിൽ ടീസറിന്റെ ഇരട്ടി മധുരമുള്ള കാര്യങ്ങളുണ്ട്. ട്രെയിലറിനേക്കാൾ പത്തിരട്ടിയായിരിക്കും സിനിമയെന്നും അവർ പറഞ്ഞു. ഇത് എന്റെ വാഗ്ദാനമാണ്. ശ്യാം സിം​ഗ റോയി ക്രിസ്മസ് നമ്മുടേതാക്കുമെന്ന് ഞാൻ പറഞ്ഞു. അണ്ടെ സുന്ദരനിക്കി വേനൽ മുതൽ ക്രിസ്മസ് വരെയുള്ള സമയം നമ്മുടേതാക്കി മാറ്റും ഉറപ്പെന്നും നാനി പറഞ്ഞു.

ചിത്രത്തിന്റെ പ്രമേയം മിശ്രവിവാഹമാണ് . ലീല തോമസ് എന്ന കഥാപാത്രമായി നസ്രിയ. സുന്ദർ എന്ന ബ്രാഹ്മണ യുവാവായി നാനി . ഹർഷ വർധൻ, നദിയ മൊയ്തു, രോഹിണി, തൻവി റാം എന്നിവരാണ് മറ്റ് താരങ്ങൾ. വിവേക് അത്രേയാണ് സംവിധാനം. മൈത്രി മൂവി മേക്കേർസ് ആണ് നിർമാണം. ജൂൺ 10ന് ചിത്രം റിലീസ് ചെയ്യുകയാണ്.