അമല വിജയിക്കെതിരെ ഒന്നും മിണ്ടില്ല. സംസാരം കോടതിയില്‍ മാത്രം. അമലപോള്‍തന്നെയാണു വിവാഹമോചനത്തിനു തീരുമാനിച്ചതെന്നും എല്ലാം വിജയിന്റെ വീട്ടുകാരുടെ കുഴപ്പം കൊണ്ടാണെന്നും വെളിപ്പെടുത്തി കുടുംബസുഹൃത്തുക്കള്‍. മികച്ച കരിയറുണ്ടായിരുന്ന നടിയെ വീട്ടുകാര്‍ അഭിനയിക്കാന്‍ വിടാതിരുന്നതും ക്രൂരമായ മാനസിക സമ്മര്‍ദത്തിലാക്കിയതും തന്നെയാണ് അമലയെ തീരുമാനത്തിലെത്തിച്ചതെന്നുമാണ് അവര്‍ പറയുന്നത്. എന്തായാലും അമല വൈകാതെ വിവാഹമോചനത്തിനു കേസ് നല്‍കുമെന്നും പറയാനേറെയുണ്ടെങ്കിലും എല്ലാം കോടതിയില്‍ മാത്രമേ പറയൂ എന്നുമാണു സൂചന.
വിവാഹമോചന വാര്‍ത്ത പുറത്തുവന്നതു മുതല്‍ വിവിധ മാധ്യമങ്ങള്‍ അമലപോളുമായി ആശയവിനിമയം നടത്തിയിരുന്നു. അവര്‍ പ്രതികരിച്ചില്ല. മാധ്യമങ്ങളിലൂടെ ഒന്നും പറയേണ്ടെന്ന നിയമോപദേശമാണ് അമലയ്ക്കു ലഭിച്ചിരിക്കുന്നത്. സിനിമയാണ് അമലയ്ക്കു വേണ്ടതെങ്കില്‍ കുടുംബം വേണ്ടെന്ന വിജയിന്റെ മാതാപിതാക്കളുടെ കടുംപിടിത്തമാണ് വിവാഹമോചനത്തിലേക്ക് എത്തിച്ച പ്രധാനകാര്യമെന്നാണ് റിപ്പോര്‍ട്ടുകള്‍ സമര്‍ഥിക്കുന്നത്. അമലയ്ക്ക് മറ്റൊരു ബന്ധമുണ്ടെന്ന രീതിയില്‍ വന്ന വാര്‍ത്തകള്‍ വിജയ് തള്ളിയിരുന്നു. അത്തരത്തില്‍ ഒരു പ്രശ്‌നവും തങ്ങളുടെ ഇടയില്‍ ഉണ്ടായിരുന്നില്ലെന്നും പിരിയുന്നു എന്നുമാത്രമാണ് പറയാനാവുകയെന്നുമാണ് വിജയ് പലരോടും പറഞ്ഞിരിക്കുന്നത്.
2014 ജൂണ്‍ പന്ത്രണ്ടിനായിരുന്നു അമലപോളിന്റെ വിവാഹം. വിവാഹത്തിനു ശേഷം ധനുഷിന്റെ വാടാ ചെന്നൈയില്‍ അഭിനയിക്കാന്‍ അമല തീരുമാനിച്ചതോടെയാണു വിജയിന്റെ വീട്ടുകാര്‍ പ്രശ്‌നമുണ്ടാക്കിയത്. രണ്ടുവര്‍ഷത്തേക്കാണ് ധനുഷ് ചിത്രത്തിന് അമല കരാര്‍ ഒപ്പുവച്ചത്. വിവാഹത്തിനു ശേഷവും സിനിമയില്‍ സജീവമായി തുടര്‍ന്നതാണു വീട്ടുകാരെ ചൊടിപ്പിച്ചതത്രേ. കല്യാണത്തിനു ശേഷം സിനിമയില്‍നിന്നു വിട്ടുനില്‍ക്കുമെന്ന് അമല പറഞ്ഞിരുന്നില്ല. വിവാഹശേഷം അമലയുടെ സിനിമാ ജീവിതം നിയന്ത്രിക്കാന്‍ വിജയിന്റെ വീട്ടുകാര്‍ ശ്രമിക്കുകയായിരുന്നു. വാടാ ചെന്നൈയില്‍ അഭിനയിക്കുന്നതിനെ വിജയിന്റെ അച്ഛനും അമ്മയും എതിര്‍ത്തു. അതേസമയം, അമലയുടെ സിനിമാ ജീവിതം നിയന്ത്രിക്കാന്‍ ശ്രമിച്ചെന്നു പറയുന്നത് തെറ്റാണെന്നാണു വിജയിന്റെ വിശദീകരണം.