പുതുനായകന്‍മാര്‍ തന്നെ അവഗണിക്കുന്നതായി കാവ്യ. നവാഗതരും സാനിയറുമായ പലരും തന്നോട് കഥകള്‍ പറയുന്നുണ്ടെങ്കിലും ഒന്നിലും കാമ്പും കരുത്തുമില്ലെന്ന് കാവ്യാമാധവന്‍. അടൂരിന്റെ പിന്നെയും എന്ന സിനിമയില്‍ അഭിനയിച്ച ശേഷം താരം ബ്രേക്ക് എടുത്തിരിക്കുകയാണ്. ജിത്തുജോസഫിന്റെ സിനിമയ്ക്ക് മാത്രമാണ് താരം ഡേറ്റ് നല്‍കിയിരിക്കുന്നത്. കാള്‍ട്ടണ്‍ ഫിലിംസിന്റെ ബാനറില്‍ കരുണാകരന്‍ നിര്‍മിക്കുന്ന ചിത്രം ഫീമെയില്‍ ഓറിയന്റഡ് സബ്ജക്ടാണ് പറയുന്നത്. അതേസമയം ഈ ചിത്രം എന്ന് തുടങ്ങുമെന്ന് കാവ്യയ്ക്ക് ഒരു ഉറപ്പുമില്ല. വളരെ നല്ല കഥയായത് കൊണ്ടാണ് കമ്മിറ്റ് ചെയ്തതെന്ന് താരം പറഞ്ഞു. 
മമ്മൂട്ടിയെയും പ്രണവിനെയും നായകന്‍മാരാക്കി ജിത്തുജോസഫ് സിനിമ പ്ലാന്‍ ചെയ്യുന്നുണ്ട്. ആദ്യം ചെയ്യുന്നത് മമ്മൂട്ടി ചിത്രമായിരിക്കും. അതിന്റെ തിരക്കഥാ രചനയിലാണ് സംവിധായകന്‍. അടുത്ത വര്‍ഷം പ്രണവ് ചിത്രം തുടങ്ങും. എന്നാല്‍ അടുത്തിടെ ഇറങ്ങിയ സിനിമകളെല്ലാം പരാജയമായതിനെ തുടര്‍ന്നാണ് കാവ്യ ബ്രേക്കെടുത്തത്. ഷീ ടാക്‌സി, ആകാശവാണി എന്നീ ചിത്രങ്ങള്‍ വലിയ പരാജയമാണ് വരുത്തിയത്. അതേസമയം മുന്‍നിര നായകന്‍മാരുടെ കൂടെ അഭിനയിച്ച കാവ്യ വിജയ്ബാബുവിന്റെ നായികയായി ആകാശവാണിയില്‍ അഭിനയിച്ചത് വിനയായെന്ന് പലരും ആക്ഷേപിക്കുന്നു. സാധാരണ നായികമാരാരും ഇമേജിനെ ബധിക്കുന്ന ഇത്തരം തീരുമാനങ്ങള്‍ എടുക്കാറില്ലെന്നും ഇന്‍ഡസ്ട്രിയിലുള്ളവര്‍ പറയുന്നു.
എന്നാല്‍ പല നല്ല കഥകളും പറഞ്ഞിട്ടും കാവ്യയ്ക്ക് ഇഷ്ടപ്പെട്ടില്ലെന്ന് നവാഗതരായ ചില സംവിധായകര്‍ പറയുന്നു. തങ്ങളുടെ കഥയില്‍ കഴമ്പില്ലെന്ന് പറയുന്ന കാവ്യ യാതൊരു കഴമ്പുമില്ലാത്ത പിന്നെയും എന്ന സിനിമയില്‍ അഭിനയിച്ചത് എന്തിനാണെന്ന് മനസിലാകുന്നില്ലെന്നും ഇവര്‍ ചോദിക്കുന്നു. യുവനായകന്‍മാരൊന്നും കാവ്യയെ നായികയാക്കാന്‍ സമ്മതിക്കില്ല. ദിലീപ്, പൃഥ്വിരാജ്, മമ്മൂട്ടി, മോഹന്‍ലാല്‍ തുടങ്ങിയവരുടെ നായികയായാണ് താരം അഭിനയിച്ചിട്ടുള്ളത്.