2016 മലയാളത്തിന് നഷ്ടങ്ങളുടെ വര്‍ഷമാണ്. ക്ഷണനേരം കൊണ്ട് നക്ഷത്രശോഭ മാഞ്ഞ് ലോകത്തില്‍ നിന്നും വിടപറഞ്ഞ് പോയവര്‍ നിരവധിയാണ്. 2016ല്‍ മരണം പ്രശസ്തരെ പിന്‍തുടരുകയാണോ എന്ന് പോലും തോന്നിപ്പോയിരിക്കുന്നു. ഒരു സിനിമാക്കഥ പോലെ, മെലയാളികളുടെ ഓര്‍മയില്‍ അവര്‍ എന്നും ജീവിയ്ക്കും.

മലയാളികള്‍ ഞെട്ടലോടെ കേട്ട മരണവാര്‍ത്തയായിരുന്നു നടി കല്‍പ്പനയുടേത്. 2016ന്റെ ആരംഭത്തിലാണ് കല്‍പ്പനയെന്ന പ്രതിഭയെ മലയാളികള്‍ക്ക് നഷ്ടമായത്. ഹൈദരാബാദിലെ അപ്പോളോ ആശുപത്രിയില്‍ വെച്ചായിരുന്നു അന്ത്യം. ഹൃദയാഘാതമായിരുന്നു മരണകാരണമെന്നാണ് റിപ്പോര്‍ട്ടുകള്‍. മുന്നൂറിലേറെ ചിത്രങ്ങളില്‍ അഭിനയിച്ച കല്‍പ്പനയുടെ അവസാന ചിത്രം ചാര്‍ലിയായിരുന്നു.

സംഗീത സംവിധായകന്‍ ജോണസന്റെ മകള്‍ ഷാന്‍ ജോണ്‍സന്റെ അകാല മരണത്തില്‍ സിനിമാ ലോകം നടുങ്ങി. ച്ഛനും അനിയനും പിന്നാലെ ഷാനും ഈ ലോകത്ത് നിന്ന് പൊടുന്നനെ അപ്രത്യക്ഷയായപ്പോള്‍ ആ അമ്മയുടെ ഒപ്പം മലയാളക്കരയൊന്നാകെ തേങ്ങി. ചെന്നൈയിലെ ഒരു ഹോട്ടല്‍ മുറിയില്‍ മരിച്ച നിലയില്‍ കാണപ്പെടുകയായിരുന്നു ഷാനിനെ. ചെന്നൈയില്‍ മാര്‍ക്കറ്റിംഗ് രംഗത്തായിരുന്നു ഷാനിന് ജോലി. ജോലി കഴിഞ്ഞെത്തിയാല്‍ പിന്നെ സംഗീതജീവിതമാണ്. പാട്ടെഴുത്തും സംഗീതം നല്‍കലും റെക്കോര്‍ഡിംഗും ഒക്കെയായി ചെന്നൈയില്‍ തന്നെയായിരുന്നു ഷാനിന്റെ അവസാന നാളുകള്‍.

മലയാള സിനിമയിലെ ഏറ്റവും തിരക്കുള്ള അസോസിയേറ്റ് ഡയറക്ടര്‍മാരില്‍ ഒരാളായിരുന്ന സജി പരവൂര്‍ മാര്‍ച്ച് എട്ടിനാണ് അന്തരിച്ചത്. പക്ഷാഘാതത്തെ തുടര്‍ന്നായിരുന്നു മരണം. മോഹന്‍ലാലും സുരേഷ്‌ഗോപിയും ഒരുമിച്ചഭിനയിച്ച 'ജനകന്‍' എന്ന ചിത്രത്തിന്റെ സംവിധായകന്‍ കൂടിയാണ് സജി. ജനകന് ശേഷം രണ്ടാമത്തെ ചിത്രത്തിനായി ഏറെക്കാലമായി ശ്രമിച്ചുവരികയായിരുന്നു. വലിയ താരനിരയുമായി എത്തിയ ജനകന്‍ ഭേദപ്പെട്ട വിജയം നേടുകയും ചെയ്തിരുന്നു.

മലയാള സിനിമയെ മറ്റൊരു തലത്തില്‍ എത്തിച്ച സംവിധായകനായിരുന്നു രാജേഷ് പിള്ള. ഗുരുതരമായ കരള്‍രോഗത്തെ തുടര്‍ന്ന് കൊച്ചിയിലെ പി വി എസ് ആശുപത്രിയില്‍ ചികിത്സയിലായിരുന്നു. ഫെബ്രുവരി 27നായിരുന്നു മരണം. ട്രാഫിക് എന്ന സിനിമയിലൂടെ മലയാള സിനിമയില്‍ സ്വന്തമായി ഒരു സ്ഥാനം നേടിയെടുത്ത സംവിധായകനായിരുന്നു രാജേഷ് പിള്ള.

മലയാള സിനിമയുടെ തീരാനഷ്ടമാണ് നടന്‍ കലാഭവന്‍ മണി. കരള്‍ രോഗം മൂര്‍ച്ഛിച്ച് മണിയെ ആശുപത്രിയില്‍ എത്തിച്ചെങ്കിലും മാര്‍ച്ച് 6ന് ആ അതുല്യ പ്രതിഭ ഓര്‍മയായി. മലയാള സിനിമയില്‍ ഒരാള്‍ക്കും നല്‍കിയിട്ടില്ലാത്ത യാത്രയയപ്പ് ആയിരിന്നു മലയാളി പ്രേക്ഷകര്‍ മണിക്ക് നല്‍കിയത്. തെന്നിന്ത്യയിലെ ഏറ്റവും വിലപിടിപ്പുള്ള നടനായിരിക്കുമ്‌ബോഴും ചാലക്കുടിയിലെ ഏറ്റവും സാധാരണക്കാരനായി ജീവിക്കാന്‍ കലാഭവന്‍ മണിക്ക് കഴിഞ്ഞിരുന്നു. സഹായം അഭ്യര്‍ത്ഥിച്ച് തനിക്കരുകില്‍ എത്തിയ ആരെയും മണി വെറുംകൈയോടെ മടക്കി അയച്ചിരുന്നില്ല. അതുകൊണ്ടുതന്നെയാണ്, സ്വന്തം വീട്ടിലെ ഒരംഗം വിടവാങ്ങിയാലെന്ന പോലെ, അത്രയും വേദനനിറഞ്ഞ ഹൃദയവുമായി ആയിരക്കണക്കിന് ജനങ്ങള്‍ മണിയുടെ വീട്ടിലേക്ക് മലയാളികളുടെ സ്വന്തം മണിനാദത്തെ അവസാനമായി ഒരു നോക്ക് കാണാന്‍ ഒഴുകിയെത്തിയത്.ആ നാടന്‍പാട്ടുകളും ആ അഭിനയക്കരുത്തില്‍ ഉയിര്‍ക്കൊണ്ട കഥാപാത്രങ്ങളും മണിക്കുവേണ്ടി അനശ്വരമായി ജീവിക്കും.

പഴയകാല നടന്‍ രാഘവന്റെ മകനും ചലച്ചിത്രതാരവുമായ ജിഷ്ണു രാഘവന്‍ (35) മാര്‍ച്ച് 25നാണ് അന്തരിച്ചത്. കൊച്ചിയിലെ സ്വകാര്യ ആശുപത്രിയില്‍ വെച്ചായിരുന്നു അന്ത്യം. ദീര്‍ഘനാളായി കാന്‍സര്‍ രോഗബാധിതനായിരുന്ന ജിഷ്ണുവിന്റെ ആരോഗ്യനില ഗുരുതരമാവുകയും തുടര്‍ന്ന് മരണം സംഭവിക്കുകയുമായിരുന്നു. രോഗം കാര്‍ന്ന് തിന്നുമ്‌ബോഴും അസാമാന്യമായ ധൈര്യവും ആത്മവിശ്വാസവും പ്രകടിപ്പിച്ച താരമായിരുന്നു ജിഷ്ണു.നമ്മള്‍ എന്ന മലയാള സിനിമയിലൂടെ ചലച്ചിത്രത്തില്‍ അരങ്ങേറ്റം കുറിച്ച ജിഷ്ണു ഇരുപത്തിയഞ്ചോളം സിനിമകളില്‍ അഭിനയിച്ചിട്ടുണ്ട്.