സുഡാനി ഫ്രെം നൈജീരിയ സൂപ്പര്ഹിറ്റായി ഓടുമ്പോള്, സുഡുവിന് മികച്ച പരിഗണന നല്കിയോ? സൗബിന് എത്ര നല്കി? വിവാദങ്ങളുടെ പശ്ചാത്തലത്തില് സംവിധായകന് പറയുന്നു...
സുഡാനി ഫ്രം നൈജീരിയ എന്ന സിനിമ കണ്ടിറങ്ങിയവര്ക്കാര്ക്കും സുഡു എന്ന സാമുവേല് അബിയോളയെ മറക്കാനാവില്ല. എന്നാല് ചിത്രം ഹിറ്റായതോടെ പ്രതിഫലം കുറഞ്ഞ് പോയെന്നും മറ്റ് പുതുമുഖ താരങ്ങള്ക്കടക്കം നല്കിയ പ്രതിഫലമോ പരിഗണനയോ നല്കിയില്ലെന്നുമുള്ള സാമുവേലിന്റെ പ്രതികരണങ്ങളോട് സംവിധായകന് സക്കറിയ മുഹമ്മദ് പ്രതികരിക്കുന്നു
സാമുവേല് വന്ന വഴി
നൈജീരിയയിലെ ലാഗോസുകാരനായ സാമുവേല് അവിടുത്തെ അറിയപ്പെടുന്ന നടനാണ്. കഥയിലെ ആത്മാവായ ആ കഥാപാത്രത്തിനായി ഘാനയില് ഉള്പ്പെടെ ഒഡീഷന് നടത്തിയിരുന്നു. കൂടാതെ ഓണ്ലൈന് ഒഡീഷനും നടത്തി. അങ്ങനെയാണ് മലയാളികള് ഇന്നേറെ ഇഷ്ടപ്പെടുന്ന സുഡുവായ സാമുവേല് കേരളത്തിലേക്ക് വന്നത്. സിനിമ കണ്ടിറങ്ങിയ ഏത് പ്രേക്ഷകന്റെയും മനസില് പ്രധാനമായും തങ്ങിനിന്നത് മാനേജര് മജീദും സുഡുവും രണ്ടു ഉമ്മമാരും കെ.ടി.സി.അബ്ദുല്ലയുടെ ബാപ്പയും ഒക്കെയാണ്. സുഡാനി എന്ന് വിളിക്കുന്ന നൈജീരിയന് സെവന്സ് ഫുട്ബോള് താരമായാണ് സാമുവേല് അഭിനയിച്ചത്.
സാമുവേലിന് നല്കിയത് സൗബിന് പോലും കൊടുത്തില്ല
സാമുവലിന്റെ ആരോപണങ്ങള്ക്ക് നിര്മ്മാതാക്കള് ഔദ്യോഗികമായി മറുപടി നല്കിയിട്ടുണ്ട്.അത് തന്നെയാണ് എന്റെയും അഭിപ്രായം. സാമുവേല് അബിയോളക്ക് മികച്ച പരിഗണനയാണ് ഞങ്ങള് നല്കിയത്. മലയാളത്തിലെ അറിയപ്പെടുന്ന നടനായ സൗബിന് സാഹിറിന് സാമുവേലിന് നല്കിയ പ്രതിഫലം പോലും നല്കിയിട്ടില്ല. ഒരു നല്ല സിനിമയുടെ ഭാഗമാകാന് അവരെല്ലാം സഹകരിച്ചു. ചിത്രത്തിന്റെ കളക്ഷന് ഉള്പ്പെടെയുള്ള കാര്യങ്ങളില് ഇപ്പോ വ്യക്തത വന്നിട്ടില്ല. സിനിമ ലാഭമാകുമെന്ന് ഉറപ്പാണ്. അതിന് ശേഷം സാമുവേലിന് അര്ഹമായ പരിഗണന നല്കും.
മജീദിനെ പോലുള്ള മാനേജര്മാര് മലപ്പുറത്തുണ്ട്
ഏതെങ്കിലും ഒരു വ്യക്തിയല്ല മജീദ് എന്ന മാനേജര്. മലപ്പുറത്ത് ഉള്പ്പെടെ മലബാറില് സെവന്സ് ഫുട്ബോളുകളില് നമുക്ക് ഇത്തരം മാനേജര്മാരെ കാണാന് കഴിയും. അവരുടെ ജീവിതമാണ് ഈ സിനിമ. ഞാന് കണ്ട ഭൂരിഭാഗം പേരും മാനേജര് മജീദിനെ പോലുള്ള ടീം മാനേജര്മാരാണ്. സ്വന്തമായി വലിയ സാമ്പത്തിക ചുറ്റുപാടില്ലെങ്കിലും ഫുട്ബോളിനോടുള്ള അടങ്ങാത്ത ഭ്രമത്താല് അവര് ടീമുകളെ ഇറക്കുന്നു.
അവര് ഇപ്പോഴും ഫുട്ബോളിലൂടെ തന്റെ ടീമിലൂടെ വലിയ ഭാസുരമായ ഭാവി സ്വപ്നം കാണുന്നവരാണ്. അത് തന്നെയാണ് സൗബിന്റെ മജീദും.
സെവന്സ് ഫുടബോള് മേളകള്
സെവന്സ് ഫുട്ബോള് മേളകള് എന്നും കായികവളര്ച്ചയ്ക്ക് ഒരു മുതല്ക്കൂട്ടാണ്. കരീബിയന്സ് അടക്കമുള്ള ടൂര്ണമെന്റുകള് പൊസിറ്റിവായി എടുക്കാവുന്ന മേളകളാണ്. നിരവധി കായികപ്രതിഭകള്ക്ക് അവസരം ലഭിക്കുന്നു. കൂടാതെ ചെറിയ തോതിലുള്ള കച്ചവടങ്ങള് പോലും അനുബന്ധമായി നടക്കുന്നു. ഫലത്തില് കുറേപ്പേരുടെ ഉപജീവനം കൂടിയാണിത്. ഇത്തരം ജീവിതങ്ങള് കൂടിയാണ് സുഡാനി ഫ്രം നൈജീരിയ സിനിമ പറഞ്ഞതും.
https://www.facebook.com/Malayalivartha
