നാഗചൈതന്യയും സാമന്ത അക്കിനേനിയും തെലുങ്ക് സിനിമയിലെ മിന്നുന്ന താര ദമ്പതിമാരാണ്. ഇരുവരും രണ്ടാം വിവാഹവാര്‍ഷികം ആഘോഷിക്കാനുള്ള ഒരുക്കത്തിലാണ്. തങ്ങളുടെ സ്വകാര്യ ജീവിതത്തെക്കുറിച്ച് സാമന്ത ഇടയ്ക്ക് നടത്താറുള്ള ചില വെളിപ്പെടുത്തലുകള്‍ ആരാധകരും മാധ്യമങ്ങളും ആഘോഷമാക്കാറുണ്ട്.

ഈയിടെ ലക്ഷ്മി മാഞ്ചുവിന്റെ പുതിയ ചാറ്റ്‌ഷോയില്‍ പങ്കെടുത്തു സാമന്ത. ആ ഷോയില്‍ ഒരു കൊച്ചു കിടപ്പറരഹസ്യം സാമന്ത വെളിപ്പെടുത്തി. കുറച്ച് കിടപ്പറ രഹസ്യങ്ങള്‍ തുറന്നുപറയാമോ എന്ന അവതാരകയുടെ ചോദ്യത്തില്‍ നിന്ന് ആദ്യം തന്ത്രപൂര്‍വം ഒഴിഞ്ഞുമാറിയെങ്കിലും അവതാരക വിട്ടില്ല. നിങ്ങള്‍ ഒന്നും പറയുന്നില്ലെങ്കില്‍ എനിക്ക് ചില കാര്യങ്ങള്‍ പറയേണ്ടിവരുമെന്നായി അവര്‍.

വിവാഹത്തിന് മുമ്പു തന്നെ നിങ്ങള്‍ ഇരുവരും ഒന്നിച്ചായിരുന്നു താമസമെന്ന് എനിക്കറിയാം. നിങ്ങള്‍ തനിച്ചായിരിക്കുമ്പോഴും ഒരു പുരുഷനോടൊപ്പമുള്ളപ്പോഴും കിടപ്പുമുറിയിലെ മൂന്ന് വ്യത്യാസങ്ങള്‍ എന്തൊക്കെയാണ് എന്നായി ലക്ഷ്മിയുടെ ചോദ്യം. ആ ചോദ്യത്തിന് ഉത്തരം പറയാതെ തരമില്ലെന്നായി സാമന്തയ്ക്ക്. ഞങ്ങള്‍ക്കിടയില്‍ ഒരു സംഗതിയുണ്ടെന്ന് പറഞ്ഞുകൊണ്ടായിരുന്നു സാമന്ത ഉത്തരം പറഞ്ഞുതുടങ്ങിയത്.

തലയണയാണ് നാഗ ചൈതന്യയുടെ ആദ്യ ഭാര്യയെന്നും എനിക്കൊന്ന് ചുംബിക്കണമെങ്കില്‍ പോലും ഞങ്ങള്‍ക്കിടയില്‍ ആ തലയണ ഒരു തടസ്സമാണെന്നും പറഞ്ഞശേഷം ഇപ്പോള്‍ ഇത്ര മതി, ഇതുതന്നെ ഞാന്‍ ഒരുപാട് പറഞ്ഞുപോയെന്നാണ് തോന്നുന്നത് എന്ന് സാമന്ത പറഞ്ഞു. മന്മധുവാണ് സാമന്ത അവസാനമായി അഭിനയിച്ച് പുറത്തിറങ്ങിയ ചിത്രം. ഭര്‍ത്താവിനൊപ്പം അഭിനയിച്ചതാവട്ടെ സൂപ്പര്‍ഹിറ്റ് ചിത്രം മജിലിയും. വെങ്കി മാമയാണ് നാഗ ചൈതന്യ അഭിനയിച്ചുകൊണ്ടിരിക്കുന്ന ചിത്രം. എന്തായാലും കിട്ടിയതാകട്ടെ എന്ന നിലയില്‍ ഈ വെളിപ്പെടുത്തലും ആരാധകര്‍ ആഘോഷമാക്കിയിരിക്കുകയാണ്.