വഡോദരയില്‍ നിന്ന് മുംബയിലേക്ക് 30 ലക്ഷം രൂപയുടെ മയക്കുമരുന്ന് കടത്താന്‍ ശ്രമിച്ച മുന്‍ എയര്‍ ഹോസ്റ്റസും സഹായിയും അറസ്റ്റില്‍. മലേഷ്യന്‍ എയര്‍ലൈന്‍സ് മുന്‍ എയര്‍ ഹോസ്റ്റസായ മാന്‍സി സയ്യിദ് (41), ഇവരുടെ സഹായി സൊഹൈല്‍ സുലൈമാന്‍ ഷെയ്ഖ് (20) എന്നിവരാണ് പിടിയിലായത്. കാറില്‍ വന്‍തോതില്‍ മെഫെഡ്രോണ്‍ മയക്കുമരുന്ന് കടത്തുന്നുവെന്ന രഹസ്യവിവരത്തിന്റെ അടിസ്ഥാനത്തില്‍ സൂറത്ത് ക്രൈംബ്രാഞ്ചാണ് അന്തര്‍സംസ്ഥാന മയക്കുമരുന്ന് സംഘത്തെ പിടികൂടിയത്. ഇവര്‍ക്ക് മദ്ധ്യപ്രദേശിലെ മയക്കുമരുന്ന് സംഘങ്ങളുമായി ബന്ധമുണ്ട്. ഇവര്‍ക്ക് വഡോദരയില്‍ മയക്കുമരുന്ന് നല്‍കിയ അപരിചിതയായ സ്ത്രീയെ കേന്ദ്രീകരിച്ചും അന്വേഷണം നടക്കുന്നുണ്ട്.

കാറില്‍ നിന്ന് 977 ഗ്രാം മയക്കുമരുന്ന്, മൊബൈല്‍ ഫോണ്‍, മയക്കുമരുന്ന് പാക്ക് ചെയ്യാന്‍ ഉപയോഗിക്കുന്ന പ്ലാസ്റ്റിക് കവറുകള്‍, കണ്ടെയ്‌നറുകള്‍ തുടങ്ങിയവയാണ് പൊലീസ് പിടിച്ചെടുത്തത്. മുംബയിലെ സാന്റാക്രൂസ് സ്വദേശികളായ ഇരുവരും വര്‍ഷങ്ങളായി പരിചയക്കാരാണ്. മുംബയില്‍ നിന്ന് വാടകയ്‌ക്കെടുത്ത കാറിലാണ് പ്രതികള്‍ വഡോദരയിലെത്തിയത്. ഇവിടെ റെയില്‍വേ സ്‌റ്റേഷനില്‍ ഒരു സ്ത്രീയില്‍ നിന്ന് മയക്കുമരുന്ന് വാങ്ങി, ഇത് മുംബയിലെത്തിച്ച് അഞ്ച് മുതല്‍ പത്ത് ഗ്രാം വരെയുള്ള പാക്കറ്റുകളിലാക്കി ആവശ്യക്കാര്‍ക്ക് വില്‍ക്കാനായിരുന്നു പദ്ധതിയെന്ന് ചോദ്യംചെയ്യലില്‍ ഇരുവരും സമ്മതിച്ചു.

എയര്‍ ഹോസ്റ്റസ് ജോലി രാജിവച്ച ശേഷം 2015 മുതല്‍ മാന്‍സി മയക്കുമരുന്ന് ശൃംഖലയുമായി ബന്ധപ്പെട്ട് പ്രവര്‍ത്തിക്കുന്നുണ്ട്. 2021ല്‍ മദ്ധ്യപ്രദേശിലെ ഇന്ദോറില്‍ 100 ഗ്രാം മയക്കുമരുന്നുമായി ഇവര്‍ പിടിയിലാവുകയും നാല് വര്‍ഷത്തോളം ജയില്‍ ശിക്ഷ അനുഭവിക്കുകയും ചെയ്തിട്ടുണ്ട്.