ഒരു സിനിമാ നടിയെ വിവാഹം ചെയ്യും എന്ന് സ്വപ്നത്തില്‍ പോലും ചിന്തിക്കാത്ത ആളാണ് ഞാന്‍. വീട്ടുകാര്‍ കണ്ടുപിടിക്കുന്ന ആരെ വേണമെങ്കിലും വിവാഹം ചെയ്യാം എന്ന ചിന്തയായിരുന്നു. പക്ഷേ, സ്നേഹയാണ് ജീവിതത്തില്‍ സംഭവിക്കാവുന്ന ഏറ്റവും നല്ല കാര്യമെന്ന് തോന്നിയതോടെ അവളെ മാത്രമേ വിവാഹം ചെയ്യൂ എന്ന് ഉറപ്പിച്ചു. എന്റെ അച്ഛനെ സമ്മതിപ്പിക്കാന്‍ ആറു മാസമെടുത്തു, ജാതി ആയിരുന്നു തടസ്സം. ഞങ്ങള്‍ ബ്രാഹ്മണരാണ്, സ്നേഹ നായിഡുവും. ഒടുവില്‍ വര്‍ഷങ്ങള്‍ക്കു മുന്‍പ് റിട്ടയറായ അച്ഛന്റെ സുഹൃത്തുക്കളെ വരെ ഇടപെടുത്തിയാണ് സമ്മതം വാങ്ങിയത്. 2012ലായിരുന്നു വിവാഹം. പറ്റിയാല്‍ എന്നെങ്കിലും ഞാന്‍ ഇതൊരു സിനിമയാക്കും. അത്രയ്ക്ക് സംഭവബഹുലമാണ് ആ കഥ. കൗതുകം അതല്ല, ഞാന്‍ സ്നേഹയെ പരിചയപ്പെടും മുന്‍പു തന്നെ അച്ഛന്‍ അവളുമായി സംസാരിച്ചിരുന്നു. ക്ഷേത്രദര്‍ശനവുമായി ബന്ധപ്പെട്ട ഒരു വിവാദമുണ്ടായപ്പോള്‍ പ്രശ്നങ്ങള്‍ അവസാനിപ്പിക്കാന്‍ അച്ഛനാണ് അന്ന് ഇടപെട്ടത്. എന്റെ അച്ഛനെ ഞാന്‍ മനസ്സിലാക്കിയത് എനിക്ക് മകന്‍ ജനിച്ചതോടെയാണ്. പലപ്പോഴും ഞാനും അച്ഛനും വലിയ ഉടക്കിലായിരുന്നു. അദ്ദേഹത്തിന്റെ ആഗ്രഹം പോലെ ജീവിക്കാന്‍ എനിക്കായിട്ടില്ല. എന്നെ എന്‍ജിനീയറായി കാണാനാണ് അദ്ദേഹം ആഗ്രഹിച്ചത്. പക്ഷേ, ഞാന്‍ നടനായി. വിവാഹവും അദ്ദേഹത്തിന്റെ ആഗ്രഹപ്രകാരമായിരുന്നില്ല. എന്നിട്ടും എന്റെ നന്മ മാത്രമാണ് അദ്ദേഹം ആഗ്രഹിച്ചത്. മകന്‍ ജനിച്ച ശേഷമാണ് അച്ഛന്‍ എന്ന ഫീല്‍ മനസ്സിലായത്.'

തെന്നിന്ത്യയുടെ പ്രിയ താരമാണ് സ്നേഹ. മമ്മൂട്ടി, മോഹന്‍ലാല്‍ തുടങ്ങിയ സൂപ്പര്‍ താരങ്ങളുടെ നായികയായി മലയാളികളുടെയും മനം കവര്‍ന്ന സ്നേഹയുടെ വിവാഹം പ്രതിസന്ധികള്‍ നിറഞ്ഞതായിരുന്നു. നടന്‍ പ്രസന്നയാണ് താരത്തിന്റെ ഭര്‍ത്താവ്. 2009 ല്‍ പുറത്തിറങ്ങിയ 'അച്ചമുണ്ട് അച്ചമുണ്ട്' എന്ന ചിത്രത്തില്‍ ഒരുമിച്ച്‌ അഭിനയിച്ചപ്പോള്‍ സ്നേഹയെ അടുത്തറിഞ്ഞതാണ് വിവാഹത്തിലെയ്ക്ക് എത്തിയതെന്ന് പ്രസന്ന പറയുന്നു. ജീവിതത്തില്‍ അഭിനയിക്കാത്ത നടിയാണ് സ്നേഹ എന്ന് അദ്ദേഹം പങ്കുവച്ചു. വിവാഹത്തെക്കുറിച്ച്‌ പ്രസന്ന പറയുന്നത് ഇങ്ങനെയാണ്.