നടിയായി തുടങ്ങി സംവിധാനത്തിലെത്തി നില്‍ക്കുകയാണ് ഗീതു മോഹന്‍ദാസ്. ചുരുങ്ങിയ കാലയളവിനുള്ളില്‍ തന്നെ മികച്ച സംവിധായിക എന്ന് പേരെടുക്കാന്‍ കഴിഞ്ഞ താരവുമാണ്.

എന്നാല്‍ സിനിമ ഇന്‍ഡസ്ട്രിയില്‍ താന്‍ മിസ് ഫിറ്റാണെന്ന് ചിന്തിച്ചുപോയ സമയം ഉണ്ടായിരുന്നെന്ന് വെളിപ്പെടുത്തുകയാണ് ഗീതു.

ഗീതു ഇങ്ങനെ പറയുന്നു, വ്യക്തിത്വം രൂപപ്പെടുന്ന പ്രായത്തില്‍ ഞാന്‍ വിദേശത്താണ് പഠിച്ചത്. പിന്നീട് നാട്ടില്‍ മടങ്ങി വന്നു. ഞാന്‍ ഇന്‍ഡസ്ട്രിയില്‍ ഒരു മിസ്ഫിറ്റ് ആണോയെന്ന് സംശയം തോന്നിയ സമയം ഉണ്ടായിരുന്നു. ആ സമയത്തെ മറ്റ് നായികമാരെ വെച്ചു നോക്കുമ്പോള്‍ ഞാന്‍ അരഗന്റ് ആയാണ് കരുതപ്പെട്ടിരുന്നത്. സെറ്റില്‍ ഇംഗ്ലീഷ് സംസാരിച്ചാല്‍ നമ്മളെ അരഗന്റ് ആയി കരുതി മാറ്റി നിര്‍ത്തിയിരുന്നു. ഗീതു മോഹന്‍ദാസ് പറയുന്നു.

അക്കാലത്ത് അച്ഛനാണ് പുതിയ ഊര്‍ജ്ജം പകര്‍ന്നത്. അദ്ദേഹം പറയുമായിരുന്നു, നിന്റെ വ്യത്യസ്തതയാണ് നിന്റെ ശക്തിയെന്ന്. പിന്നെ, ജീവിതം അതിന്റെ ഒഴുക്കില്‍ നമ്മളെ പലതും പഠിപ്പിക്കും. കാഴ്ചപ്പാടുകള്‍ക്ക് കൂടുതല്‍ തെളിച്ചം വരും. ഇന്നു ഞാന്‍ ആത്മവിശ്വാസമുള്ള സ്ത്രീയാണ്. അവര്‍ കൂട്ടിച്ചേര്‍ത്തു.

ഇന്ന് രാജ്യത്തെ തന്നെ വനിതാ സംവിധായകരില്‍ ശ്രദ്ധേയയാണ് ഗീതു. നിവിന്‍ പോളിയെ നായകനാക്കി പുറത്തിറങ്ങിയ മൂത്തോനാണ് ഗീതുവിന്റേതായി അവസാനമായി പുറത്തിറങ്ങിയ ചിത്രം. ചിത്രം മികച്ച നിരൂപക പ്രശംസയാണ് നേടിയത്.